UPSC ಪರೀಕ್ಷೆಯಲ್ಲಿ ನಕಲು ಮಾಡಿದರೆ ಏನು ಶಿಕ್ಷೆ ಗೊತ್ತಾ? ಇಲ್ಲಿದೆ ಶಾಕಿಂಗ್​ ಮಾಹಿತಿ

ಯುಪಿಎಸ್‌ಸಿ ತನ್ನ ಪರೀಕ್ಷಾ ವ್ಯವಸ್ಥೆಯಲ್ಲಿ ಹೈಟೆಕ್ ಜಾಮರ್‌ಗಳು, ಸಿಸಿಟಿವಿ ನಿಗಾ, ಬಯೋಮೆಟ್ರಿಕ್ ಗುರುತಿಸುವಿಕೆ ಮುಂತಾದ ವಿವಿಧ ಭದ್ರತಾ ಕ್ರಮಗಳನ್ನು ಅನುಸರಿಸುತ್ತಿದೆ. ಆದರೆ ಕೆಲ ಅಭ್ಯರ್ಥಿಗಳು ಬ್ಲೂಟೂತ್ ಸಾಧನಗಳು, ಮೈಕ್ರೋ ಇಯರ್‌ಫೋನ್, ನಕಲಿ ಗುರುತಿನ ಚೀಟಿಗಳು ಮುಂತಾದ ಉಪಕರಣಗಳನ್ನು ಬಳಸಿ ವಂಚನೆ ಮಾಡಲು ಯತ್ನಿಸುತ್ತಾರೆ.

ಯಾವುದೇ ಪರೀಕ್ಷೆಯಲ್ಲಿ ನಕಲುಮಾಡುವುದು ಗಂಭೀರ ಅಪರಾಧ. ಯುಪಿಎಸ್‌ಸಿ ಪರೀಕ್ಷೆಯ ಸಂದರ್ಭದಲ್ಲಿ ಯಾರಾದರೂ ನಕಲು ಮಾಡುತ್ತಿರುವುದು ಪತ್ತೆಯಾದರೆ, ತಕ್ಷಣವೇ ಅವರನ್ನು ಪರೀಕ್ಷಾ ಕೇಂದ್ರದಿಂದ ಹೊರಹಾಕಲಾಗುತ್ತದೆ. ನಂತರ ಅವರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿ, ನ್ಯಾಯಾಲಯದ ಕ್ರಮಕ್ಕೆ ಒಳಪಡಿಸುತ್ತಾರೆ. ಅಲ್ಲದೆ, ಅಂತಹ ಅಭ್ಯರ್ಥಿಗಳಿಗೆ ಭವಿಷ್ಯದ ಪರೀಕ್ಷೆಗಳಿಗೆ ಹಾಜರಾಗದಂತೆ ನಿಷೇಧ ವಿಧಿಸಲಾಗುತ್ತದೆ. ಕೆಲವೊಮ್ಮೆ, ಅವರ ವಿರುದ್ಧ ನ್ಯಾಯಾಲಯ ಜೈಲು ಶಿಕ್ಷೆ ವಿಧಿಸುತ್ತವೆ.

2023ರಲ್ಲಿ ಜಾರಿಗೆ ಬಾರದ ಹೊಸ ಭಾರತೀಯ ನ್ಯಾಯ ಸಂಹಿತೆ (BNS) ಯ ಪ್ರಕಾರ, ನಕಲಿ ದಾಖಲೆಗಳು, ಎಲೆಕ್ಟ್ರಾನಿಕ್ ಸಾಧನಗಳ ಬಳಕೆಯಂತಹ ವಂಚನೆಗಳು ಗಂಭೀರ ಅಪರಾಧಗಳಾಗಿದ್ದು, ಬಿಎನ್‌ಎಸ್ ಸೆಕ್ಷನ್ 316 (ವಂಚನೆ), ಸೆಕ್ಷನ್ 317 (ನಕಲಿ ದಾಖಲೆಗಳು), ಮತ್ತು ಸಂಘಟಿತ ಅಪರಾಧವಿದ್ದರೆ ಸೆಕ್ಷನ್ 109 (ಪಿತೂರಿ), ಸೆಕ್ಷನ್ 71 ಅನ್ವಯಿಸಲಾಗುತ್ತದೆ. ಈ ಪ್ರಕರಣಗಳಲ್ಲಿ ಗರಿಷ್ಠ 7 ವರ್ಷಗಳ ಜೈಲು ಶಿಕ್ಷೆ ಹಾಗೂ ದಂಡ ವಿಧಿಸಲಾಗಬಹುದು.

ಇತ್ತೀಚಿನ ಘಟನೆಗಳಲ್ಲಿ, 2024ರ ಯುಪಿಎಸ್‌ಸಿ ಪ್ರಿಲಿಮ್ಸ್ ಪರೀಕ್ಷೆಯಲ್ಲಿ ರಾಜಸ್ಥಾನದಲ್ಲಿ ಒಂದು ಘಟನೆಯು ಗಮನ ಸೆಳೆಯಿತು. ಅಜ್ಮೀರ್‌ನಲ್ಲಿ ಒಂದು ಕೇಂದ್ರದಲ್ಲಿ ಒಬ್ಬ ಅಭ್ಯರ್ಥಿ ಬ್ಲೂಟೂತ್ ಸಾಧನ ಮತ್ತು ಮೈಕ್ರೋ ಇಯರ್‌ಫೋನ್ ಬಳಸಿ ವಂಚನೆ ಮಾಡಲು ಯತ್ನಿಸಿದಾಗ ಪತ್ತೆ ಹಚ್ಚಲಾಯಿತು. ಫ್ಲೈಯಿಂಗ್ ಸ್ಕ್ವಾಡ್ ಅವರ ಕಿವಿಯಲ್ಲಿ ಇಯರ್‌ಫೋನ್ ಮತ್ತು ಸೊಂಟದಲ್ಲಿ ಸಿಮ್ ಕಾರ್ಡ್ ಹೊಂದಿದ್ದ ಸಾಧನವನ್ನು ಪತ್ತೆಹಚ್ಚಿತು. ಅವರನ್ನು ತಕ್ಷಣ ಬಂಧಿಸಲಾಗಿದ್ದು, ಯುಪಿಎಸ್‌ಸಿ ಕೂಡಲೇ ಪರೀಕ್ಷೆಯಿಂದ ಹೊರಹಾಕಿತು.

ಹಲವು ಸಂದರ್ಭಗಳಲ್ಲಿ, ನಕಲು ಮಾಡಿದ ಅಭ್ಯರ್ಥಿಗಳಿಗೆ ನ್ಯಾಯಾಲಯ ಜೈಲು ಶಿಕ್ಷೆ ವಿಧಿಸಿದೆ. ಸಂಘಟಿತ ಗುಂಪುಗಳು ಅಥವಾ ಗ್ಯಾಂಗ್‌ಗಳ ಭಾಗವಹಿಸುವಿಕೆ ಕಂಡುಬಂದಲ್ಲಿ, ಅವರ ವಿರುದ್ಧ ಸಂಘಟಿತ ಅಪರಾಧ ನಿಯಮದಡಿಯಲ್ಲಿ ಕಾನೂನು ಕ್ರಮವನ್ನೂ ಕೈಗೊಳ್ಳಬಹುದು. ಇದಲ್ಲದೆ, ಅವರನ್ನು ಭವಿಷ್ಯದ ಸರ್ಕಾರಿ ಉದ್ಯೋಗಗಳಿಂದ ಶಾಶ್ವತವಾಗಿ ನಿಷೇಧಿಸುವ ಸಾಧ್ಯತೆಯೂ ಇದೆ.