Education: ಗಡಿನಾಡ ವಿದ್ಯಾರ್ಥಿಗಳಿಗೆ ಶುಭ ಸುದ್ದಿ, ಸುಮಾರು 76 ಕೋಟಿ ವೆಚ್ಚದಲ್ಲಿ ನಡೆಯುತ್ತಿದೆ ಬೃಹತ್‌ ಕಾಮಗಾರಿ!

ಚಿಂತಾಮಣಿಯ ಸರ್ಕಾರಿ ಪಾಲಿಟೆಕ್ನಿಕ್ ಸಂಸ್ಥೆ ಡಿ.ಎಂ.ಸಿ. ಆಂಜನೇಯರೆಡ್ಡಿ ಅವರ ಕನಸಿನ ಕೂಸು. 75 ವಸಂತಗಳನ್ನು ಪೂರೈಸುತ್ತಿರುವ ಈ ಸಂಸ್ಥೆಯು ನಿರಂತರವಾಗಿ ನಿರ್ಲಕ್ಷ್ಯಕ್ಕೆ ಒಳಪಟ್ಟು ಸಂಪೂರ್ಣ ಅವಸಾನದ ಅಂಚಿಗೆ ತಲುಪಿದೆ. ಸಚಿವ ಡಾ. ಎಂ.ಸಿ. ಸುಧಾಕರ್ ಅವರು ಚಿಂತಾಮಣಿಗೆ ಇಂಜಿನಿಯರಿಂಗ್ ಕಾಲೇಜನ್ನು ಮಂಜೂರು ಮಾಡಿಸಿದ್ದು, ಅವರ ತಾತ ಅಂದು ಶಾಸಕರಾಗಿದ್ದ ಎಂ.ಸಿ. ಅಂಜನೇಯರೆಡ್ಡಿ ಸರ್ಕಾರಿ ಪಾಲಿಟೆಕ್ನಿಕ್ ಮಂಜೂರು ಮಾಡಿಸಿದ್ದರು ಎಂಬುದು ಸ್ಮರಣೀಯವಾಗಿದೆ.

ಸುಮಾರು 1951ರಲ್ಲಿ ಜಿಲ್ಲೆಯ ಯಾವ ಪುರಸಭೆ 50 ಸಾವಿರ ರೂ. ಠೇವಣಿ ಮಾಡುತ್ತದೋ ಅಂತಹ ಪಟ್ಟಣಕ್ಕೆ ಪಾಲಿಟೆಕ್ನಿಕ್ ನೀಡುವುದಾಗಿ ಅಂದಿನ ಸರ್ಕಾರದ ಆದೇಶವಾಗಿತ್ತು. ಕೊನೆಯ ದಿನಾಂಕದಂದು ರಾತ್ರಿಯವರೆಗೂ ಖಜಾನೆಯ ಲೆಕ್ಕಾಚಾರವನ್ನು ಮುಕ್ತಾಯಗೊಳಿಸಬಾರದು ಎಂದು ಅಧಿಕಾರಿಗಳಿಗೆ ಸೂಚಿಸಿ ಸಂಜೆಗೆ 50 ಸಾವಿರ ರೂ. ಜಮೆ ಮಾಡಿ ಚಿಂತಾಮಣಿಗೆ ಪಾಲಿಟೆಕ್ನಿಕ್ ಕಾಲೇಜು ಮಂಜೂರು ಮಾಡಿಸಿ, ಆ ಭಾಗದ ವಿದ್ಯಾರ್ಥಿಗಳ ಕಲಿಕೆಗೆ ಅನುಕೂಲ ಮಾಡಿಕೊಟ್ಟ ಕೀರ್ತಿ ಎಂ.ಸಿ. ಆಂಜನೇಯರೆಡ್ಡಿ ಅವರಿಗೆ ಸಲ್ಲುತ್ತದೆ.

ಮೈಸೂರಿನ ಅಂದಿನ ಮಹಾರಾಜರಾದ ಜಯಚಾಮರಾಜೇಂದ್ರ ಒಡೆಯರ್ ಬಹದ್ದೂರ್‌ರವರು 1951 ಆಗಸ್ಟ್ 13ರಂದು ಅಕ್ಯೂಪೇಷನಲ್ ಇನ್‌ಸ್ಟಿಟ್ಯೂಟ್ ಕಟ್ಟಡದ ಶಿಲಾನ್ಯಾಸ ನೆರವೇರಿಸಿದ್ದರು. ಅಂದು ಪ್ರಾರಂಭಗೊಂಡ ಪಾಲಿಟೆಕ್ನಿಕ್ ಕಟ್ಟಡವನ್ನು ಸುಣ್ಣದ ಗಾರೆಯಿಂದ ನಿರ್ಮಾಣ ಮಾಡಲಾಗಿತ್ತು. ದಿನಗಳು ಕಳೆದಂತೆ ನಿರ್ವಹಣೆ ಕೊರತೆಯಿಂದ ಸಂಪೂರ್ಣವಾಗಿ ಕಟ್ಟಡವು ಸೊರಗುತ್ತಾ ಬಂದಿದೆ.