Last Updated:
ಪರೀಕ್ಷೆ ಮುಂದೂಡಿಕೆಯು ಕೆಲವರಿಗೆ ಬೇಸರ ತಂದರೂ, ಇದರಿಂದ ತಯಾರಿಗೆ ಹೆಚ್ಚುವರಿ ಸಮಯ ಸಿಕ್ಕಿದೆ. ಈಗ ಅಭ್ಯರ್ಥಿಗಳು ಇನ್ನಷ್ಟು ಅಭ್ಯಾಸ ಮಾಡಿ, ದುರ್ಬಲ ವಿಷಯಗಳನ್ನು ಸುಧಾರಿಸಬಹುದು. ಹಾದಗಾದರೇ ಏಕೆ ರದ್ದಾಯಿತು? ಮುಂದಿನ ಸರದಿ ಯಾವಾಗ ಎನ್ನುವ ಕುರಿತು ಸಂಪೂರ್ಣ ಮಾಹಿತಿ ಇಲ್ಲಿದೆ.
ಸಿಬ್ಬಂದಿ ಆಯ್ಕೆ ಆಯೋಗ (Staff Selection Commission) (SSC) ಫೆಬ್ರವರಿ 23, 2026 ರಂದು ನಡೆಯಬೇಕಿದ್ದ SSC ಕಾನ್ಸ್ಟೇಬಲ್ GD ನೇಮಕಾತಿ ಪರೀಕ್ಷೆಯನ್ನು ಮುಂದೂಡಿದೆ. ಫೆಬ್ರವರಿ 17, 2026 ರಂದು ಪ್ರಕಟಿಸಿದ ಅಧಿಕೃತ ಸೂಚನೆಯಲ್ಲಿ, ಆ ದಿನ ಆರಂಭವಾಗಬೇಕಿದ್ದ ಕಂಪ್ಯೂಟರ್ ಆಧಾರಿತ ಪರೀಕ್ಷೆ (Computer Based Examination) ಅನ್ನು ಮುಂದಿನ ಸೂಚನೆ ಬರುವವರೆಗೆ ಮುಂದೂಡಲಾಗಿದೆ ಎಂದು ತಿಳಿಸಿದೆ. ಹೊಸ ಪರೀಕ್ಷಾ ದಿನಾಂಕಗಳನ್ನು ನಂತರ ಪ್ರಕಟಿಸಲಾಗುವುದು ಎಂದು ಆಯೋಗ ಹೇಳಿದೆ. ಈ ಕುರಿತು ಸಂಪೂರ್ಣ ವಿವರ ಇಲ್ಲಿದೆ.
ಬಹಳಷ್ಟು ಯುವಕರಿಂದ ಅರ್ಜಿ ಸಲ್ಲಿಕೆ!
ಹಲವರು ಈಗಾಗಲೇ ಪರೀಕ್ಷೆಗೆ ತಯಾರಿ ಮಾಡಿಕೊಂಡಿದ್ದರು. ಕೆಲವರು ಪರೀಕ್ಷಾ ಕೇಂದ್ರಗಳಿಗೆ ಪ್ರಯಾಣದ ಯೋಜನೆ ಕೂಡ ಮಾಡಿಕೊಂಡಿದ್ದರು. ಆದರೆ ಈಗ ಎಲ್ಲರೂ ಹೊಸ ದಿನಾಂಕದ ನಿರೀಕ್ಷೆಯಲ್ಲಿ ಕಾಯುತ್ತಿದ್ದಾರೆ. ಈ ಪರೀಕ್ಷೆ ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆ (CAPFs), ವಿಶೇಷ ಭದ್ರತಾ ಪಡೆ (SSF) ಮತ್ತು Assam Riflesಗಳಲ್ಲಿ ರೈಫಲ್ಮನ್ (GD) ಹುದ್ದೆಗಳಿಗೆ ನಡೆಸಲಾಗುತ್ತಿದೆ. ಈ ಹುದ್ದೆಗಳು ದೇಶದ ಭದ್ರತೆಗೆ ಬಹಳ ಮುಖ್ಯವಾದವು. ಆದ್ದರಿಂದ ಈ ಪರೀಕ್ಷೆಗೆ ಬಹಳಷ್ಟು ಯುವಕರು ಅರ್ಜಿ ಸಲ್ಲಿಸಿದ್ದರು.
ಸ್ಲಾಟ್ ಆಯ್ಕೆ ಸೌಲಭ್ಯ ಇಲ್ಲ!
ಆಯೋಗದ ಸೂಚನೆಯ ಪ್ರಕಾರ, ಈ ಪರೀಕ್ಷೆಗೆ ಸ್ಲಾಟ್ ಆಯ್ಕೆ ಸೌಲಭ್ಯ ಲಭ್ಯವಿರುವುದಿಲ್ಲ. ಸಾಮಾನ್ಯವಾಗಿ ಪರೀಕ್ಷೆಗೆ 8ರಿಂದ 10ದಿನಗಳ ಮೊದಲು ಅಭ್ಯರ್ಥಿಗಳಿಗೆ ಪರೀಕ್ಷಾ ನಗರದ ಮಾಹಿತಿ ನೀಡಲಾಗುತ್ತದೆ. ಪ್ರವೇಶ ಪತ್ರ (Admit Card) ಅನ್ನು ಪರೀಕ್ಷಾ ದಿನಾಂಕಕ್ಕೆ 2 ರಿಂದ 3 ದಿನಗಳ ಮೊದಲು ಬಿಡುಗಡೆ ಮಾಡಲಾಗುತ್ತದೆ. ಆದ್ದರಿಂದ ಅಭ್ಯರ್ಥಿಗಳು ಅಧಿಕೃತ ವೆಬ್ಸೈಟ್ನ್ನು ಮಾತ್ರ ಪರಿಶೀಲಿಸಬೇಕು ಎಂದು ಆಯೋಗ ಸಲಹೆ ನೀಡಿದೆ.
ಪರೀಕ್ಷೆ ಏಕೆ ಮುಂದೂಡಲಾಯಿತು?
ಆಯೋಗವು ಸ್ಪಷ್ಟ ಕಾರಣವನ್ನು ಹೇಳಿಲ್ಲ. ಆದರೆ ಕೆಲವು ಕಾರಣಗಳ ಬಗ್ಗೆ ಚರ್ಚೆ ನಡೆಯುತ್ತಿದೆ. ಈಗಾಗಲೇ ಸಿಬ್ಬಂದಿ ಆಯ್ಕೆ ಆಯೋಗವು ನಡೆಸುತ್ತಿರುವ SSC MTS ಪರೀಕ್ಷೆ ಫೆಬ್ರವರಿ 4 ರಿಂದ ಫೆಬ್ರವರಿ 19ರವರೆಗೆ ದೇಶದಾದ್ಯಂತ ನಡೆಯುತ್ತಿದೆ. ಕೆಲವು ಪರೀಕ್ಷಾ ಕೇಂದ್ರಗಳಲ್ಲಿ ತೊಂದರೆ ಉಂಟಾದ ಕಾರಣ, ಕೆಲವು ಪರೀಕ್ಷೆಗಳನ್ನು ಫೆಬ್ರವರಿ 23ಕ್ಕೆ ಮರುನಿಗದಿಪಡಿಸಲಾಗಿದೆ ಎಂದು ತಿಳಿದುಬಂದಿದೆ. ಇದರಿಂದ ಪರೀಕ್ಷಾ ಕೇಂದ್ರಗಳ ಲಭ್ಯತೆ ಸಮಸ್ಯೆಯಾಗಿರಬಹುದು ಎಂಬ ಅನುಮಾನ ಇದೆ. ಇನ್ನೊಂದು ಪ್ರಮುಖ ವಿಷಯವೆಂದರೆ, GD ಪರೀಕ್ಷೆಗೆ ಸಂಬಂಧಿಸಿದ ಸ್ಲಾಟ್ ಬುಕ್ಕಿಂಗ್ ಇನ್ನೂ ಪ್ರಾರಂಭವಾಗಿರಲಿಲ್ಲ. ಪರೀಕ್ಷಾ ನಗರ ಮಾಹಿತಿ ಸ್ಲಿಪ್ಗಳೂ ಬಿಡುಗಡೆ ಆಗಿರಲಿಲ್ಲ. ಸಾಮಾನ್ಯವಾಗಿ ಇವು ಪರೀಕ್ಷೆಗೆ 10 ದಿನಗಳ ಮೊದಲು ಬರುತ್ತವೆ. ಈ ಕಾರಣಗಳಿಂದಲೇ ಪರೀಕ್ಷೆ ಮುಂದೂಡಲಾಗಿದೆ ಎಂದು ಅನೇಕ ಅಭ್ಯರ್ಥಿಗಳು ಊಹಿಸಿದ್ದಾರೆ.
ಅಭ್ಯರ್ಥಿಗಳಿಗೆ ಲಾಭವೇ?
ಪರೀಕ್ಷೆ ಮುಂದೂಡಿಕೆಯು ಕೆಲವರಿಗೆ ಬೇಸರ ತಂದರೂ, ಇದರಿಂದ ತಯಾರಿಗೆ ಹೆಚ್ಚುವರಿ ಸಮಯ ಸಿಕ್ಕಿದೆ. ಈಗ ಅಭ್ಯರ್ಥಿಗಳು ಇನ್ನಷ್ಟು ಅಭ್ಯಾಸ ಮಾಡಿ, ದುರ್ಬಲ ವಿಷಯಗಳನ್ನು ಸುಧಾರಿಸಬಹುದು. ಆತಂಕ ಬೇಡ. ಹೊಸ ದಿನಾಂಕ ಪ್ರಕಟವಾದ ನಂತರವೇ ಮುಂದಿನ ಪ್ರಕ್ರಿಯೆ ಆರಂಭವಾಗುತ್ತದೆ. ಒಟ್ಟಾರೆ, ಅಭ್ಯರ್ಥಿಗಳು ವದಂತಿಗಳಿಗೆ ಕಿವಿಗೊಡದೆ, ಅಧಿಕೃತ ಮಾಹಿತಿಯನ್ನೇ ನಂಬಬೇಕು. ಶಾಂತವಾಗಿರಿ, ಓದನ್ನು ಮುಂದುವರಿಸಿ. ಈ ಹೆಚ್ಚುವರಿ ಸಮಯ ನಿಮ್ಮ ಯಶಸ್ಸಿಗೆ ಸಹಾಯ ಮಾಡಬಹುದು.
Bangalore [Bangalore],Bangalore,Karnataka
