Last Updated:
LIC HFL Vacancies: 2026ನೇ ಸಾಲಿನ ನೇಮಕಾತಿಗಾಗಿ ಎಲ್ಐಸಿ ಸಂಸ್ಥೆ ಒಟ್ಟು 180 ‘ಜೂನಿಯರ್ ಅಸಿಸ್ಟೆಂಟ್’ ಹುದ್ದೆಗಳಿಗೆ ಅರ್ಹ ಅಭ್ಯರ್ಥಿಗಳಿಂದ ಅರ್ಜಿ ಆಹ್ವಾನಿಸಿದೆ. ಆಕರ್ಷಕ ವೇತನ ಶ್ರೇಣಿ ಹಾಗೂ ಕೇಂದ್ರ ಸರ್ಕಾರದ ಸ್ವಾಮ್ಯದ ಸಂಸ್ಥೆಯಲ್ಲಿ ಕೆಲಸ ಮಾಡುವ ಭರವಸೆಯೊಂದಿಗೆ ಈ ಅಧಿಸೂಚನೆ ಹೊರಬಿದ್ದಿದೆ. ಈ ಕುರಿತು ಸಂಪೂರ್ಣ ವಿವರ ಇಲ್ಲಿದೆ.
ಬೆಂಗಳೂರು: ಬ್ಯಾಂಕಿಂಗ್ ಮತ್ತು ಹಣಕಾಸು ಕ್ಷೇತ್ರದಲ್ಲಿ (Banking Sector) ವೃತ್ತಿಜೀವನ ರೂಪಿಸಿಕೊಳ್ಳಲು ಬಯಸುವ ಪದವೀಧರರಿಗೆ ಎಲ್ಐಸಿ ಹೌಸಿಂಗ್ ಫೈನಾನ್ಸ್ ಲಿಮಿಟೆಡ್ (LIC HFL) ಸಿಹಿಸುದ್ದಿ ನೀಡಿದೆ. 2026ನೇ ಸಾಲಿನ ನೇಮಕಾತಿಗಾಗಿ (Requirements) ಸಂಸ್ಥೆಯು ಒಟ್ಟು 180 ‘ಜೂನಿಯರ್ ಅಸಿಸ್ಟೆಂಟ್’ ಹುದ್ದೆಗಳಿಗೆ ಅರ್ಹ ಅಭ್ಯರ್ಥಿಗಳಿಂದ ಅರ್ಜಿ (Application) ಆಹ್ವಾನಿಸಿದೆ. ಆಕರ್ಷಕ ವೇತನ ಶ್ರೇಣಿ ಹಾಗೂ ಕೇಂದ್ರ ಸರ್ಕಾರದ ಸ್ವಾಮ್ಯದ ಸಂಸ್ಥೆಯಲ್ಲಿ ಕೆಲಸ ಮಾಡುವ ಭರವಸೆಯೊಂದಿಗೆ ಈ ಅಧಿಸೂಚನೆ ಹೊರಬಿದ್ದಿದೆ.
ಆಯ್ಕೆಯಾದ ಅಭ್ಯರ್ಥಿಗಳಿಗೆ ಜೂನಿಯರ್ ಅಸಿಸ್ಟೆಂಟ್ ಹುದ್ದೆಗೆ ವಾರ್ಷಿಕ ಸುಮಾರು 4.64 ಲಕ್ಷದಿಂದ 4.98 ಲಕ್ಷ ರೂಪಾಯಿಗಳವರೆಗೆ ಸಿಟಿಸಿ (CTC) ಪ್ಯಾಕೇಜ್ ದೊರೆಯಲಿದೆ. ಈ ವ್ಯತ್ಯಾಸವು ಅಭ್ಯರ್ಥಿಯು ಕೆಲಸ ಮಾಡುವ ನಗರದ ಶ್ರೇಣಿಯನ್ನು (Category I, II, III) ಅವಲಂಬಿಸಿರುತ್ತದೆ.
ಮೂಲ ವೇತನ; ಮಾಸಿಕ 20,000 ರೂ.ಗಳ ಮೂಲ ವೇತನದೊಂದಿಗೆ ಇತರೆ ಭತ್ಯೆಗಳು ಸೇರಿ ಒಟ್ಟು ವೇತನ ಸುಮಾರು 32,000 ರೂ. ದಾಟಲಿದೆ. ಊಟದ ಭತ್ಯೆ (Meal Coupons): ಈ ನೇಮಕಾತಿಯ ವಿಶೇಷವೆಂದರೆ, ನೌಕರರಿಗೆ ಪ್ರತಿ ಕೆಲಸದ ದಿನಕ್ಕೆ 210 ರೂಪಾಯಿಗಳ ಊಟದ ಕೂಪನ್ ನೀಡಲಾಗುತ್ತದೆ. ಇದು ವೇತನಕ್ಕಿಂತ ಹೊರತಾದ ಹೆಚ್ಚುವರಿ ಸೌಲಭ್ಯವಾಗಿದೆ. ಇತರೆ ಸೌಲಭ್ಯಗಳು: ಮನೆ ಬಾಡಿಗೆ ಭತ್ಯೆ (HRA), ಭವಿಷ್ಯ ನಿಧಿ (PF), ಮೆಡಿಕ್ಲೈಮ್ ಇನ್ಶೂರೆನ್ಸ್ ಮತ್ತು ಗ್ರೂಪ್ ಇನ್ಶೂರೆನ್ಸ್ ಸೌಲಭ್ಯಗಳು ನಿಯಮಾನುಸಾರ ದೊರೆಯಲಿವೆ.
ಈ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಲು ಅಭ್ಯರ್ಥಿಗಳು ಈ ಕೆಳಗಿನ ಶೈಕ್ಷಣಿಕ ಹಾಗೂ ವಯೋಮಿತಿಯನ್ನು ಹೊಂದಿರಬೇಕು:
ಶೈಕ್ಷಣಿಕ ಅರ್ಹತೆ: ಮಾನ್ಯತೆ ಪಡೆದ ವಿಶ್ವವಿದ್ಯಾಲಯದಿಂದ ಕನಿಷ್ಠ ಶೇ. 55 ರಷ್ಟು ಅಂಕಗಳೊಂದಿಗೆ ಯಾವುದೇ ಪದವಿ (ಗ್ರಾಜುಯೇಷನ್) ಪೂರ್ಣಗೊಳಿಸಿರಬೇಕು. ಕೇವಲ ರೆಗ್ಯುಲರ್ ಪದವಿ ಪಡೆದವರಿಗೆ ಮಾತ್ರ ಅವಕಾಶವಿದ್ದು, ದೂರಶಿಕ್ಷಣ ಅಥವಾ ಪತ್ರವ್ಯವಹಾರದ ಮೂಲಕ ಪದವಿ ಪಡೆದವರು ಅರ್ಹರಲ್ಲ. ವಯೋಮಿತಿ: 1 ಏಪ್ರಿಲ್ 2026ಕ್ಕೆ ಅನ್ವಯವಾಗುವಂತೆ ಅಭ್ಯರ್ಥಿಯ ಕನಿಷ್ಠ ವಯಸ್ಸು 21 ವರ್ಷ ಮತ್ತು ಗರಿಷ್ಠ 30 ವರ್ಷ ಮೀರಿರಬಾರದು. ತಾಂತ್ರಿಕ ಜ್ಞಾನ: ಕಂಪ್ಯೂಟರ್ ಕಾರ್ಯಾಚರಣೆಯ ಬಗ್ಗೆ ಮೂಲಭೂತ ಜ್ಞಾನ ಹೊಂದಿರುವುದು ಕಡ್ಡಾಯ.
ಆಯ್ಕೆ ಪ್ರಕ್ರಿಯೆ ಹೇಗೆ?
ನೇಮಕಾತಿಯು ಕಠಿಣ ಮತ್ತು ಪಾರದರ್ಶಕವಾಗಿದ್ದು, ಎರಡು ಹಂತಗಳಲ್ಲಿ ನಡೆಯಲಿದೆ.
ಹಂತ 1 (ಆನ್ಲೈನ್ ಪರೀಕ್ಷೆ): ಅರ್ಹ ಅಭ್ಯರ್ಥಿಗಳಿಗೆ ಮೊದಲ ಹಂತದಲ್ಲಿ ಆನ್ಲೈನ್ ಲಿಖಿತ ಪರೀಕ್ಷೆ ನಡೆಸಲಾಗುತ್ತದೆ. ಇದರಲ್ಲಿ ರೀಸನಿಂಗ್, ಇಂಗ್ಲಿಷ್ ಭಾಷೆ, ಸಾಮಾನ್ಯ ಜ್ಞಾನ ಮತ್ತು ಸಂಖ್ಯಾತ್ಮಕ ಸಾಮರ್ಥ್ಯದ ಪ್ರಶ್ನೆಗಳಿರಲಿವೆ. ಹಂತ 2 (ಸಂದರ್ಶನ): ಲಿಖಿತ ಪರೀಕ್ಷೆಯಲ್ಲಿ ಮೆರಿಟ್ ಆಧಾರದ ಮೇಲೆ ತೇರ್ಗಡೆಯಾದವರನ್ನು ಮಾತ್ರ ಅಂತಿಮ ಸಂದರ್ಶನಕ್ಕೆ ಕರೆಯಲಾಗುವುದು.
ಆಸಕ್ತರು ಅಧಿಕೃತ ವೆಬ್ಸೈಟ್ lichousing.com ಮೂಲಕ ಆನ್ಲೈನ್ನಲ್ಲಿ ಮಾತ್ರ ಅರ್ಜಿ ಸಲ್ಲಿಸಬಹುದಾಗಿದೆ.
ಅರ್ಜಿ ಸಲ್ಲಿಕೆ ಆರಂಭ; 16 ಏಪ್ರಿಲ್ 2026 ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ: 30 ಏಪ್ರಿಲ್ 2026 ಪರೀಕ್ಷೆಯ ಸಂಭವನೀಯ ಸಮಯ: ಜೂನ್ 2026ರ ಮೊದಲ ವಾರ. ಅಭ್ಯರ್ಥಿಗಳು ಅರ್ಜಿ ಸಲ್ಲಿಸುವ ಮೊದಲು ಅಧಿಕೃತ ಅಧಿಸೂಚನೆಯನ್ನು ಸಂಪೂರ್ಣವಾಗಿ ಓದಿಕೊಳ್ಳಲು ಸೂಚಿಸಲಾಗಿದೆ. ಸ್ಥಳೀಯ ಭಾಷೆಯ ಜ್ಞಾನವು (ಕನ್ನಡ) ಕರ್ನಾಟಕದ ಅಭ್ಯರ್ಥಿಗಳಿಗೆ ಹೆಚ್ಚಿನ ಅನುಕೂಲ ನೀಡಲಿದೆ.
Bangalore,Karnataka
Job: ಎಲ್ಐಸಿ ಹೆಚ್ಎಫ್ಎಲ್ನಲ್ಲಿ ಭರ್ಜರಿ ನೇಮಕಾತಿ; ಜೂನಿಯರ್ ಅಸಿಸ್ಟೆಂಟ್ ಹುದ್ದೆಗಳಿಗೆ ಅರ್ಜಿ ಆಹ್ವಾನ!
