ಕೊರೋನಾ ನಂತರ ವಿಶ್ವದಾದ್ಯಂತ “ವರ್ಕ್ ಫ್ರಮ್ ಹೋಮ್” (Work From Home) ಎಂಬುದು ಸಾಮಾನ್ಯ ಪರಿಕಲ್ಪನೆಯಾಗಿಬಿಟ್ಟಿದೆ. ಅದೆಷ್ಟೋ ಉದ್ಯೋಗಿಗಳು (Employees), ಉದ್ಯೋಗ ಸಂಸ್ಥೆಗಳು ಇದೇ ವರ್ಕ್ ಕಲ್ಚರ್ಗೆ (Work Culture) ಒಗ್ಗಿ ಹೋಗಿ ಬಿಟ್ಟಿವೆ. ಆದರೆ ಮತ್ತೆ ಈಗ ಟ್ರೆಂಡ್ (Trend) ಬದಲಾಗುತ್ತಿದೆ. ವರ್ಕ್ ಫ್ರಮ್ ಹೋಮ್ (Work from home) ಆಯ್ಕೆ ಕೊಟ್ಟ ಕಂಪನಿಗಳೇ ಮತ್ತೆ ತಮ್ಮ ಉದ್ಯೋಗಿಗಳನ್ನು ಆಫೀಸ್ಗೆ ಬರಲು ಆದೇಶ ನೀಡುತ್ತಿವೆ. ಆದರೆ ಇದಕ್ಕೆ ಉದ್ಯೋಗಿಗಳಿಂದ ವಿರೋಧ ಕೂಡ ಇದೆ. ಹೀಗಾಗಿ ಕೆಲವು ಕಂಪನಿಗಳು ಉದ್ಯೋಗಿಗಳನ್ನು ಮತ್ತೆ ಆಫೀಸ್ಗೆ ಕರೆಸಲು ಹೊಸ ರೀತಿಯ ಪ್ರಯೋಗಗಳನ್ನು ಆರಂಭಿಸಿವೆ.
ಆಫೀಸ್ಗೆ ಬರುವಂತೆ ಉದ್ಯೋಗಿಗಳಿಗೆ ಬೋನಸ್ ಆಫರ್!
ಇತ್ತೀಚೆಗೆ ಅಮೆರಿಕಾದ AI ಸ್ಟಾರ್ಟ್ಅಪ್ ಈ ವಿಷಯದಲ್ಲಿ ಅಚ್ಚರಿ ಮೂಡಿಸುವ ನಿರ್ಧಾರ ತೆಗೆದುಕೊಂಡಿದೆ. ಮನೆ ಬಿಟ್ಟು ಆಫೀಸ್ಗೆ ಬರುವ ಉದ್ಯೋಗಿಗಳಿಗೆ ಹಣ ನೀಡುವ ಆಫರ್ ಅನ್ನು ಘೋಷಿಸಿದೆ. ಈ ಕಂಪನಿ “Ways of Working” ಎಂಬ ಹೊಸ ಪ್ರೋಗ್ರಾಂ ಘೋಷಿಸಿದ್ದು, ಉದ್ಯೋಗಿಗಳು ವಾರದಲ್ಲಿ ಎಷ್ಟು ದಿನ ಆಫೀಸ್ಗೆ ಬರುತ್ತಾರೋ ಅದರ ಆಧಾರದ ಮೇಲೆ ಅವರಿಗೆ ವಿವಿಧ ಸೌಲಭ್ಯಗಳು ಮತ್ತು ಹಣಕಾಸು ಪ್ರೋತ್ಸಾಹ ನೀಡಲಾಗುತ್ತದೆ.
ಅಮೆರಿಕದಲ್ಲಿ ಕೆಲಸ ಮಾಡುವ ಉದ್ಯೋಗಿಗಳಿಗೆ ವಾರಕ್ಕೆ ಎರಡು ದಿನ ಬಂದರೆ 500 ಡಾಲರ್ ವೆಲ್ನೆಸ್ ಕುರಿತಾದ ಪ್ರಯೋಜನಗಳನ್ನು ನೀಡಲು ಮತ್ತು ವಾರಕ್ಕೆ ಐದು ದಿನ ಕಚೇರಿಯಿಂದ ಕೆಲಸ ಮಾಡುವವರಿಗೆ ತ್ರೈಮಾಸಿಕಕ್ಕೆ ಸುಮಾರು 1,85,000 ರೂಪಾಯಿ ಪಾವತಿಸಲು ನಿರ್ಧರಿಸಿದೆ.
ಉದ್ಯೋಗಿಗಳ ಮನ ಗೆದ್ದ AI ಕಂಪನಿ: ಆಫೀಸ್ ಹಾಜರಾತಿ ಏರಿಕೆ!
ಹಿಂದೆ ಕಂಪನಿಯು ಕಡ್ಡಾಯವಾಗಿ ಆಫೀಸ್ಗೆ ಬರುವ ನಿಯಮ ಹೇರಿದಾಗ, ಹೆಚ್ಚಿನ ಉದ್ಯೋಗಿಗಳು ಅದನ್ನು ಪಾಲಿಸಲು ಆಸಕ್ತಿ ತೋರಿರಲಿಲ್ಲ. ಆದರೆ ಈಗ ಸ್ವಯಂ ಆಯ್ಕೆ ಮಾದರಿಯಲ್ಲಿ ಪ್ರೋತ್ಸಾಹ ನೀಡಿದ ಬಳಿಕ ಪರಿಸ್ಥಿತಿ ಬದಲಾಗಿದ್ದು, ಸ್ವತಃ ಉದ್ಯೋಗಿಗಳೇ ಆಫೀಸ್ ಕಡೆ ಮುಖ ಮಾಡುತ್ತಿದ್ದಾರೆ.
ಈ ಹೊಸ ನೀತಿಯ ನಂತರ, ಆಫೀಸ್ಗೆ ಬರುತ್ತಿರುವ ಉದ್ಯೋಗಿಗಳ ಸಂಖ್ಯೆಯಲ್ಲಿ ಗಮನಾರ್ಹ ಏರಿಕೆ ಕಂಡುಬಂದಿದೆ. ವರದಿಗಳ ಪ್ರಕಾರ, ಸುಮಾರು 75% ಉದ್ಯೋಗಿಗಳು ಈ ಯೋಜನೆಯಲ್ಲಿ ಭಾಗವಹಿಸಿದ್ದಾರೆ ಮತ್ತು ದಿನನಿತ್ಯ ಹಾಜರಾತಿಯಲ್ಲೂ ದೊಡ್ಡ ಮಟ್ಟದ ಏರಿಕೆ ಕಂಡುಬಂದಿದೆ. ಬಲವಂತಕ್ಕಿಂತ ಪ್ರೋತ್ಸಾಹ ನೀಡಿದರೆ ಉದ್ಯೋಗಿಗಳ ಪ್ರತಿಕ್ರಿಯೆ ಹೆಚ್ಚು ಉತ್ತಮವಾಗುತ್ತದೆ ಎಂಬುದು ಈ ಯೋಜನೆಯ ಮೂಲಕ ಅರಿವಿಗೆ ಬಂದಿದೆ.
ಕಂಪನಿಗಳು ಈಗ ಸಂಪೂರ್ಣ ವರ್ಕ್ ಫ್ರಮ್ ಹೋಮ್ ಅಥವಾ ಸಂಪೂರ್ಣ ಆಫೀಸ್ ಮಾದರಿಗಿಂತ, ಎರಡನ್ನೂ ಸಮತೋಲನಗೊಳಿಸುವ “ಹೈಬ್ರಿಡ್” ಮಾದರಿಯನ್ನು ಅನುಸರಿಸಲು ಪ್ರಯತ್ನಿಸುತ್ತಿವೆ. AI ಕ್ಷೇತ್ರದಲ್ಲಿ ಕೆಲಸ ಮಾಡುವ ಸಂಸ್ಥೆಗಳು ವಿಶೇಷವಾಗಿ ತಂಡದ ಸಹಕಾರ, ತ್ವರಿತ ನಿರ್ಧಾರ ಮತ್ತು ಉತ್ಪಾದಕತೆಗಾಗಿ ಆಫೀಸ್ ವಾತಾವರಣವೇ ಮುಖ್ಯ ಎಂದು ಹೇಳುತ್ತಿವೆ. ಇದೇ ಕಾರಣದಿಂದಾಗಿ, ಅವರು ಉದ್ಯೋಗಿಗಳನ್ನು ಆಫೀಸ್ಗೆ ಸೆಳೆಯಲು ಹೊಸ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ.
AI ಯುಗದಲ್ಲಿ ಉದ್ಯೋಗ ಸಂಸ್ಕೃತಿ ಬದಲಾವಣೆ!
ಇಂದಿನ AI ಯುಗದಲ್ಲಿ ಕಂಪನಿಗಳು ಕಡಿಮೆ ಉದ್ಯೋಗಿಗಳೊಂದಿಗೆ ಹೆಚ್ಚು ಕೆಲಸ ಮಾಡುವತ್ತ ಗಮನ ಹರಿಸುತ್ತಿವೆ. ಇದು ಕೆಲಸದ ಸಂಸ್ಕೃತಿಯನ್ನೇ ಬದಲಾಯಿಸುತ್ತಿದೆ. ಕೆಲವು ಸಂಸ್ಥೆಗಳು ಉದ್ಯೋಗಿಗಳನ್ನು ಕಡಿಮೆ ಮಾಡುವತ್ತ ಹೆಜ್ಜೆ ಇಡುತ್ತಿದ್ದರೆ, ಇನ್ನು ಕೆಲವು ಸಂಸ್ಥೆಗಳು ಉಳಿದ ಉದ್ಯೋಗಿಗಳಿಂದ ಹೆಚ್ಚಿನ ಉತ್ಪಾದಕತೆ ಪಡೆಯಲು ಹೊಸ ತಂತ್ರಗಳನ್ನು ಪ್ರಯೋಗಿಸುತ್ತಿವೆ. ಈ ಹಿನ್ನೆಲೆಯಲ್ಲಿ, ಆಫೀಸ್ಗೆ ಬರಲು ಹಣ ನೀಡುವಂತಹ ಹೊಸ ನೀತಿಗಳು, ಕಂಪನಿಗಳಲ್ಲಿ ನಡೆಯುತ್ತಿರುವ ಬೃಹತ್ ಬದಲಾವಣೆಯ ಒಂದು ಭಾಗವಾಗಿ ಕಾಣಿಸುತ್ತಿವೆ.
ವರ್ಕ್ ಫ್ರಮ್ ಹೋಮ್ ಕಾಲಘಟ್ಟದ ನಂತರ, ಕಂಪನಿಗಳು ಈಗ ಹೊಸ ಸಮತೋಲನವನ್ನು ಹುಡುಕುತ್ತಿದ್ದು, ಅದರ ಭಾಗವಾಗಿ ಪ್ರೋತ್ಸಾಹದ ಮೂಲಕ ಉದ್ಯೋಗಿಗಳನ್ನು ಆಫೀಸ್ಗೆ ಸೆಳೆಯುವ ಹೊಸ ಟ್ರೆಂಡ್ ಬೆಳೆಯುತ್ತಿದೆ.
