ಭಾರತದಲ್ಲಿ, ನಾಲ್ಕು ವರ್ಷದ ಇಂಜಿನಿಯರಿಂಗ್ ಅಥವಾ ಎರಡು ವರ್ಷದ MBA ಪದವಿಗಳಿಗೆ 10-30 ಲಕ್ಷ ರೂಪಾಯಿಗಳಷ್ಟು ವೆಚ್ಚವಾಗುತ್ತದೆ. ಇದಕ್ಕೆ ವ್ಯತಿರಿಕ್ತವಾಗಿ, ಕೋಡಿಂಗ್ ಬೂಟ್ಕ್ಯಾಂಪ್ಗಳು ಅಥವಾ ಡಿಜಿಟಲ್ ಕೌಶಲ್ಯ ತರಬೇತಿಗಳು 50,000 ದಿಂದ 2 ಲಕ್ಷ ರೂಪಾಯಿಗಳಲ್ಲಿ ಲಭ್ಯ. ಆದರೆ, ಹೂಡಿಕೆಯ ಮೇಲಿನ ಆದಾಯ ಯಾವಾಗಲೂ ಸಮಾನವಾಗಿರುವುದಿಲ್ಲ.
ಅನೇಕ ಭಾರತೀಯ ಕುಟುಂಬಗಳಿಗೆ, ಪದವಿ ಕೇವಲ ವಿದ್ಯಾಭ್ಯಾಸವಲ್ಲ, ಅದು ಪ್ರತಿಷ್ಠೆ ಮತ್ತು ಭವಿಷ್ಯದ ಭದ್ರತೆ. ಪೋಷಕರು ಇನ್ನೂ ಪದವಿಗಳನ್ನು ಸ್ಥಿರ ಜೀವನಕ್ಕೆ ದಾರಿ ಎಂದು ನೋಡುತ್ತಾರೆ, ವಿಶೇಷವಾಗಿ ವೈದ್ಯಕೀಯ, ಕಾನೂನು ಕ್ಷೇತ್ರಗಳಲ್ಲಿ. ಆದರೆ, ವಿದ್ಯಾರ್ಥಿಗಳು ಈ ಕಲ್ಪನೆಯನ್ನು ಪ್ರಶ್ನಿಸುತ್ತಿದ್ದಾರೆ.
“ಪದವಿ ಸಂದರ್ಶನಕ್ಕೆ ಟಿಕೆಟ್ ಇದ್ದಂತೆ, ಆದರೆ ಕೌಶಲ್ಯಗಳಿಂದ ಮಾತ್ರ ಅದನ್ನು ಯಶಸ್ವಿ ಮಾಡಬಹುದು” ಎಂದು ಒಬ್ಬ ರೆಡ್ಡಿಟ್ ಬಳಕೆದಾರರು ಹೇಳಿದ್ದಾರೆ. ಇದು ಪೋಷಕರ “ಸುರಕ್ಷಿತ” ಪದವಿಗಳ ನಿರೀಕ್ಷೆ ಮತ್ತು ವಿದ್ಯಾರ್ಥಿಗಳ ಮಾರುಕಟ್ಟೆ-ಸಿದ್ಧ ಕೌಶಲ್ಯಗಳ ಆಸಕ್ತಿಯ ನಡುವಿನ ಸಂಘರ್ಷವನ್ನು ತೋರಿಸುತ್ತದೆ.
ಈ ಚರ್ಚೆ ಇಂಜಿನಿಯರ್ಗಳಿಗೆ ಮಾತ್ರ ಸೀಮಿತವಾಗಿಲ್ಲ. 2025ರ ಮಾರ್ಚ್ನಲ್ಲಿ, ಒಬ್ಬ IIM ಪದವೀಧರರು ರೆಡ್ಡಿಟ್ನಲ್ಲಿ, ಪ್ರತಿಷ್ಠಿತ 25-30 ಲಕ್ಷ ರೂಪಾಯಿಗಳ MBA ಪದವಿ ಕೂಡ ಹೆಚ್ಚಿನ ಸಂಬಳವನ್ನು ಖಾತರಿಪಡಿಸುವುದಿಲ್ಲ ಎಂದು ಪೋಸ್ಟ್ ಮಾಡಿದ್ದರು.
“ಉನ್ನತ ಮಟ್ಟದ ಕೆಲಸ ಸಿಗದಿದ್ದರೆ, ಬ್ಯಾಂಕ್ ಸಾಲದಲ್ಲಿ ಮುಳುಗುತ್ತೀರಿ” ಎಂದು ಅವರು ಬರೆದಿದ್ದು, ಕೌಶಲ್ಯ ಆಧಾರಿತ ನೇಮಕಾತಿಯು ಪದವಿ ಆಧಾರಿತ ನೇಮಕಾತಿಯನ್ನು ಮೀರಿಸುತ್ತಿದೆಯೇ ಎಂಬ ಚರ್ಚೆಗೆ ಕಾರಣವಾಯಿತು.
ಪದವಿ ಮತ್ತು ಕೌಶಲ್ಯಗಳೆರಡನ್ನೂ ಸಮನ್ವಯಗೊಳಿಸುವುದು ಉತ್ತಮ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ. ಪದವಿಗಳು ವಿಶ್ವಾಸಾರ್ಹತೆ, ನೆಟ್ವರ್ಕ್ಗಳು ಮತ್ತು ಅರ್ಹತೆಗಾಗಿ ಮುಖ್ಯವಾಗಿವೆ. ಆದರೆ, ಇಂಟರ್ನ್ಶಿಪ್ಗಳು, ಆನ್ಲೈನ್ ಸರ್ಟೀಫಿಕೆಟ್ಗಳು ಅಥವಾ ಯೋಜನೆಗಳ ಮೂಲಕ ಗಳಿಸಿದ ಕೌಶಲ್ಯಗಳು ಅಭ್ಯರ್ಥಿಗಳನ್ನು ಉದ್ಯೋಗಕ್ಕೆ ಹೆಚ್ಚು ಯೋಗ್ಯರನ್ನಾಗಿ ಮಾಡುತ್ತವೆ. ಯುವ ಕೋಡರ್ ಒಬ್ಬರು ರೆಡ್ಡಿಟ್ನಲ್ಲಿ ಹೇಳಿದಂತೆ “ಪದವಿ ಬಾಗಿಲು ತೆರೆಯುತ್ತದೆ, ಆದರೆ ನೀವು ಒಳಗೆ ಕುಳಿತುಕೊಳ್ಳಬೇಕೇ ಎಂದು ಕೌಶಲ್ಯಗಳು ನಿರ್ಧರಿಸುತ್ತವೆ,” ಎಂದಿದ್ದಾರೆ.
ಹಾಗಾಗಿ, ಪದವಿಗಳನ್ನು ಪಡೆಯುವಾಗ ಇಂಟರ್ನ್ಶಿಪ್ಗಳು, ಸರ್ಟೀಫಿಕೆಟ್ಗಳು, ಯೋಜನೆಗಳು ಅಥವಾ ಬೂಟ್ಕ್ಯಾಂಪ್ಗಳ ಮೂಲಕ ಕೌಶಲ್ಯಗಳನ್ನು ಸಕ್ರಿಯವಾಗಿ ನಿರ್ಮಿಸುವುದು ಉತ್ತಮ ಫಲಿತಾಂಶಗಳನ್ನು ನೀಡುತ್ತದೆ ಎಂಬುದು ಸ್ಪಷ್ಟ. ಪದವಿ ಬಾಗಿಲು ತೆರೆಯಬಹುದು, ಆದರೆ ಮೇಜಿನ ಬಳಿ ಆಹ್ವಾನಿಸಲು ಕೌಶಲ್ಯಗಳು ಮುಖ್ಯ, ಏನ್ ಅಂತೀರಾ?
September 18, 2025 3:33 PM IST
