ಸರಿಯಾಗಿ, ಶ್ರದ್ಧೆಯಿಂದ ಅಭ್ಯಾಸ ಮಾಡಿದವರು ಮಾತ್ರ ಪರೀಕ್ಷೆಯನ್ನು ಗೆಲ್ಲಬಹುದು. ಇಂತಹ ಒಬ್ಬರಲ್ಲಿ ಪೂರ್ವಾ ಚೌಧರಿ ಒಬ್ಬರು. ಬ್ಯೂಟಿ ವಿಥ್ ಬ್ರೈನ್ ಅಂತಾರಲ್ಲ ಅದಕ್ಕೆ ಪೂರ್ವಾ ಉತ್ತಮ ನಿದರ್ಶನ.
ಪೂರ್ವಾ ಚೌಧರಿ 2024ರಲ್ಲಿ AIR 533 ರ್ಯಾಂಕ್ ನೊಂದಿಗೆ ಯುಪಿಎಸ್ಸಿ ಪರೀಕ್ಷೆಯಲ್ಲಿ ಉತ್ತೀರ್ಣರಾದರು. ಪೂರ್ವಾ ಅವರು ಭಾರತದ ಅತ್ಯಂತ ಕಠಿಣ ಪರೀಕ್ಷೆಯನ್ನು ಪಾಸ್ ಮಾಡಿದ ಬುದ್ಧಿವಂತೆ ಮಾತ್ರವಲ್ಲ, ಯಾವ ನಟಿಮಣಿಯರಿಗೂ ಕಡಿಮೆ ಇಲ್ಲ ಅನ್ನೋ ಬ್ಯೂಟಿ ಹೊಂದಿದ್ದಾರೆ.
ಪೂರ್ವಾ ರಾಜಸ್ಥಾನದವರು, ಅವರ ತಂದೆ ಓಂಪ್ರಕಾಶ್ ರಾಜಸ್ಥಾನ ಆಡಳಿತ ಸೇವೆಯಲ್ಲಿ (RAS) ಅಧಿಕಾರಿಯಾಗಿದ್ದು, ಕೋಟ್ಪುಟ್ಲಿಯಲ್ಲಿ ಹೆಚ್ಚುವರಿ ಜಿಲ್ಲಾಧಿಕಾರಿ ಹುದ್ದೆಯನ್ನು ಹೊಂದಿದ್ದಾರೆ. ಪೂರ್ವಾ ಚೌಧರಿ ಅವರು ಮೊದಲಿನಿಂದಲೂ ಪ್ರತಿಭಾನ್ವಿತ ವಿದ್ಯಾರ್ಥಿನಿಯಾಗಿದ್ದರು. ಅವರು ಸೇಂಟ್ ಕ್ಸೇವಿಯರ್ಸ್ನಿಂದ ಶಾಲಾ ಶಿಕ್ಷಣವನ್ನು ಪೂರ್ಣಗೊಳಿಸಿದರು ಮತ್ತು ನಂತರ ದೆಹಲಿ ವಿಶ್ವವಿದ್ಯಾಲಯದ ಲೇಡಿ ಶ್ರೀ ರಾಮ್ ಮಹಿಳಾ ಕಾಲೇಜಿನಿಂದ ಪದವಿಯನ್ನು ಪಡೆದರು.
ಕಾಲೇಜು ಅಧ್ಯಯನದ ಸಮಯದಲ್ಲಿ, ಅವರು ತಮ್ಮ ಶೈಕ್ಷಣಿಕ ಸಾಧನೆಗಾಗಿ ಮಾತ್ರವಲ್ಲದೆ ಅವರ ಗಮನಾರ್ಹ ವ್ಯಕ್ತಿತ್ವ, ಸೌಂದರ್ಯಕ್ಕೂ ಕಾಲೇಜು ಪೂರ್ತಿ ಜನಪ್ರಿಯತೆ ಪಡೆದಿದ್ದರು. ಬಾಲ್ಯದಿಂದಲೂ, ಪೂರ್ವಾ ಅವರ ಶಿಸ್ತಿನ ಜೀವನಶೈಲಿ ಮತ್ತು ಸಮರ್ಪಣೆಗೆ ಹೆಸರುವಾಸಿಯಾಗಿದ್ದರು.
ಪೂರ್ವಾ ಅವರಿಗೆ ಮೊದಲಿನಿಂದಲೂ ಯುಪಿಎಸ್ಸಿ ಪರೀಕ್ಷೆ ಬರೆದು ಅಧಿಕಾರಿಯಾಗಬೇಕು ಅನ್ನೋ ಆಸೆ ಇತ್ತು. ಕನಸಿನಂತೆ ಪರೀಕ್ಷೆ ಬರೆದು ಪಾಸ್ ಮಾಡಿದರು. ಪರೀಕ್ಷೆಯಲ್ಲಿ ಉತ್ತೀರ್ಣರಾದ ನಂತರ ಅವರಿಗೆ IPS ಕೇಡರ್ ನೀಡಲಾಯಿತು, ಈಗ ಐಪಿಎಸ್ ಅಧಿಕಾರಿಯಾಗಿ ಇವರು ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಯುಪಿಎಸ್ಸಿ ಫಲಿತಾಂಶವನ್ನು ಘೋಷಿಸಿದ ನಂತರ ಈಕೆಯ ವಿರುದ್ಧ ಆರೋಪಗಳು ಕೇಳಿ ಬಂದಿದ್ದವು. ಒಬಿಸಿ ಕ್ರೀಮಿ ಲೇಯರ್ ಕೋಟಾವನ್ನು ಪೂರ್ವಾ ಚೌಧರಿಯವರು ದುರುಪಯೋಗ ಪಡಿಸಿಕೊಂಡಿದ್ದಾರೆ ಎನ್ನಲಾಗಿ ಮಾಧ್ಯಮಗಳಲ್ಲಿ ಚರ್ಚೆ ಜೋರಾಗಿತ್ತು.
ಅವರು ತಮ್ಮ ಫಲಿತಾಂಶವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡ ನಂತರ ಈ ವಿಷಯ ವೈರಲ್ ಆಗಿದ್ದು, ಪರೀಕ್ಷೆಯಲ್ಲಿ ಉತ್ತೀರ್ಣರಾಗಲು ಒಬಿಸಿ-ಎನ್ಸಿಎಲ್ ಕೋಟಾವನ್ನು ದುರುಪಯೋಗಪಡಿಸಿಕೊಂಡ ಆರೋಪ ಅವರ ಮೇಲೆ ಬಂತು.
“40 ವರ್ಷಕ್ಕಿಂತ ಮೊದಲು ನೇರ RAS ನೇಮಕಾತಿಯ ಸಂದರ್ಭದಲ್ಲಿ OBC-NCL ಪ್ರಯೋಜನ ಅನ್ವಯಿಸುವುದಿಲ್ಲ, ನಾನು 44ನೇ ವಯಸ್ಸಿನಲ್ಲಿ ಆರ್ಎಎಸ್ ಅಧಿಕಾರಿಯಾಗಿದ್ದೇನೆ, ಆದ್ದರಿಂದ ನನ್ನ ಮಗಳು ಪ್ರಮಾಣಪತ್ರವನ್ನು ದುರುಪಯೋಗಪಡಿಸಿಕೊಂಡಿದ್ದಾರೆ ಎನ್ನುವುದು ಸುಳ್ಳು ಎಂದು” ಅವರ ತಂದೆ ಓಂಪ್ರಕಾಶ್ ಅವರು ಸಮರ್ಥಿಸಿಕೊಂಡಿದ್ದರು.
ನಿಯಮಗಳು ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬುದನ್ನು ಜನರು ಅರ್ಥಮಾಡಿಕೊಳ್ಳದೇ, ಇಲ್ಲದ ವಿಷಯಗಳನ್ನು ವೈರಲ್ ಮಾಡುತ್ತಾರೆ ಎಂದು ಹೇಳುವ ಮೂಲಕ ಓಂಪ್ರಕಾಶ್ ಅವರು ಮಗಳ ಮೇಲಿನ ಆರೋಪವನ್ನು ತಳ್ಳಿ ಹಾಕಿದರು.
August 26, 2025 11:08 PM IST
