ಪದವಿ ವಿದ್ಯಾರ್ಥಿಗಳಿಗೆ ಕೇಂದ್ರದ ಗುಡ್ ನ್ಯೂಸ್; 5 ಸಾವಿರ ಸಹಾಯಧನಕ್ಕಾಗಿ ಈಗಲೇ ಅರ್ಜಿ ಹಾಕಿ

ಈ ಕಾರ್ಯಕ್ರಮದ ಮುಖ್ಯ ಉದ್ದೇಶವೆಂದರೆ ವಾಯುಯಾನ ಕ್ಷೇತ್ರದ ಸವಾಲುಗಳು ಮತ್ತು ಆವಿಷ್ಕಾರಗಳ ಬಗ್ಗೆ ವಿದ್ಯಾರ್ಥಿಗಳಿಗೆ ಸಮಗ್ರ ತಿಳುವಳಿಕೆಯನ್ನು ನೀಡುವುದಾಗಿದೆ. ಇದರಲ್ಲಿ ವಿಮಾನ ದರಗಳ ಮೇಲ್ವಿಚಾರಣೆ, ನಿಯಂತ್ರಕ ಪ್ರಭಾವದ ಮೌಲ್ಯಮಾಪನ, ವಿಮಾನ ನಿಲ್ದಾಣ ಮೂಲಸೌಕರ್ಯ, ವಾಯು ಸುರಕ್ಷತೆ, ಪರಿಸರ ನಿಯಂತ್ರಣ, ವಾಯು ಸಂಚಾರ ನಿರ್ವಹಣೆ ಮತ್ತು ಕಾನೂನು ಸಂಶೋಧನೆಯಂತಹ ವಿವಿಧ ಕ್ಷೇತ್ರಗಳು ಸೇರಿವೆ. ಇಂಟರ್ನ್‌ಗಳು ಈ ಕ್ಷೇತ್ರಗಳಲ್ಲಿ ತೊಡಗಿಸಿಕೊಳ್ಳುವ ಮೂಲಕ ತಮ್ಮ ಕೌಶಲ್ಯ ಮತ್ತು ಜ್ಞಾನವನ್ನು ಹೆಚ್ಚಿಸಿಕೊಳ್ಳಬಹುದು.

ಈ ಇಂಟರ್ನ್‌ಶಿಪ್‌ಗೆ ಅರ್ಜಿ ಸಲ್ಲಿಸಲು ವಿದ್ಯಾರ್ಥಿಗಳು ತಮ್ಮ ಕೋರ್ಸ್‌ನ ಅಂತಿಮ ಅಥವಾ ಅಂತಿಮ ವರ್ಷದ ಹಿಂದಿನ ವರ್ಷದಲ್ಲಿ ಓದುತ್ತಿರಬೇಕು. ಅರ್ಹತಾ ಮಾನದಂಡಗಳು ಈ ಕೆಳಗಿನಂತಿವೆ:

• ಇಂಜಿನಿಯರಿಂಗ್ ವಿದ್ಯಾರ್ಥಿಗಳು: ಏರೋಸ್ಪೇಸ್, ಸಿವಿಲ್, ಕಂಪ್ಯೂಟರ್ ಸೈನ್ಸ್ ಅಥವಾ ಎಲೆಕ್ಟ್ರಾನಿಕ್ಸ್ ಇಂಜಿನಿಯರಿಂಗ್‌ನಲ್ಲಿ ಬಿ.ಟೆಕ್/ಬಿ.ಇ ಪದವಿ ಓದುತ್ತಿರುವವರು.
• ವಿಜ್ಞಾನ ಮತ್ತು ತಂತ್ರಜ್ಞಾನ ವಿದ್ಯಾರ್ಥಿಗಳು: ಎಂಸಿಎ ಅಥವಾ ಎಂ.ಎಸ್ಸಿ (ಡೇಟಾ ಸೈನ್ಸ್, ಸಾಫ್ಟ್‌ವೇರ್ ಡೆವಲಪ್‌ಮೆಂಟ್) ಪದವಿ ಓದುತ್ತಿರುವವರು.
• ಆರ್ಥಿಕ ಮತ್ತು ನೀತಿ ವಿದ್ಯಾರ್ಥಿಗಳು: ಅರ್ಥಶಾಸ್ತ್ರ ಅಥವಾ ಸಾರ್ವಜನಿಕ ನೀತಿಯಲ್ಲಿ ಬಿ.ಎ/ಎಂ.ಎ ಪದವಿ ಓದುತ್ತಿರುವವರು.
• ನಿರ್ವಹಣಾ ವಿದ್ಯಾರ್ಥಿಗಳು: ವಾಯುಯಾನ ಅಥವಾ ಸಾರಿಗೆಯಲ್ಲಿ ವಿಶೇಷತೆ ಹೊಂದಿರುವ ಬಿಬಿಎ/ಎಂಬಿಎ ವಿದ್ಯಾರ್ಥಿಗಳು.
• ವಾಣಿಜ್ಯ ಮತ್ತು ಹಣಕಾಸು ವಿದ್ಯಾರ್ಥಿಗಳು: ಬಿ.ಕಾಂ, ಎಂ.ಕಾಂ, ಸಿಎ ಅಥವಾ ಐಸಿಡಬ್ಲ್ಯೂಎ ಓದುತ್ತಿರುವವರು.
• ಕಾನೂನು ವಿದ್ಯಾರ್ಥಿಗಳು: ಎಲ್‌ಎಲ್‌ಬಿ ಅಥವಾ ಎಲ್‌ಎಲ್‌ಎಂ ಪದವಿ ಓದುತ್ತಿರುವವರು.

ಇಂಟರ್ನ್‌ಶಿಪ್ ಪ್ರತಿ ವರ್ಷ ಜನವರಿಯಿಂದ ಜೂನ್ ಮತ್ತು ಜುಲೈನಿಂದ ಡಿಸೆಂಬರ್‌ವರೆಗೆ ಎರಡು ಅವಧಿಗಳಲ್ಲಿ ನಡೆಯಲಿದೆ. ಪ್ರತಿ ಅವಧಿಗೆ ಗರಿಷ್ಠ 25 ಇಂಟರ್ನ್‌ಗಳನ್ನು ಆಯ್ಕೆ ಮಾಡಲಾಗುತ್ತದೆ. ಇಂಟರ್ನ್‌ಶಿಪ್ ಅವಧಿ ಮೂರು ತಿಂಗಳುಗಳಾಗಿರುತ್ತದೆ. ಆಯ್ಕೆಯಾದ ಇಂಟರ್ನ್‌ಗಳಿಗೆ ಮಾಸಿಕ 5,000 ರೂಪಾಯಿಗಳ ಸ್ಟೈಫಂಡ್ ನೀಡಲಾಗುತ್ತದೆ. ಇನ್ನು ರಜೆ ನೀತಿ ನೋಡುವುದಾದರೆ… ವೈದ್ಯಕೀಯ ಅಥವಾ ಅನಿವಾರ್ಯ ಕಾರಣಕ್ಕೆ ಪ್ರತಿ ತಿಂಗಳು 1 ದಿನ ಪಾವತಿಯಾದ ರಜೆ. ಆದರೆ ಯಾವುದೇ ಬೇರೆ ರಜೆಗಾಗಿ no-pay leave ಇರುವುದಿಲ್ಲ.

ಆಸಕ್ತ ಅಭ್ಯರ್ಥಿಗಳು ಡಿಜಿಸಿಎ ಅಧಿಕೃತ ವೆಬ್‌ಸೈಟ್ (https://www.dgca.gov.in) ಮೂಲಕ ಆನ್‌ಲೈನ್‌ನಲ್ಲಿ ಮಾತ್ರ ಅರ್ಜಿ ಸಲ್ಲಿಸಬೇಕು. ಜನವರಿ ಮತ್ತು ಜುಲೈ ತಿಂಗಳಲ್ಲಿ ಇಂಟರ್ನ್‌ಶಿಪ್ ಪ್ರಾರಂಭವಾಗುವ ಸಾಧ್ಯತೆಯಿದೆ. ಅಭ್ಯರ್ಥಿಗಳು ಇಂಟರ್ನ್‌ಶಿಪ್ ಪ್ರಾರಂಭವಾಗುವ ಮೂರು ತಿಂಗಳ ಮುಂಚಿತವಾಗಿ ಅರ್ಜಿ ಸಲ್ಲಿಸಬೇಕು. ಉದಾಹರಣೆಗೆ, ಜುಲೈನಲ್ಲಿ ಸೇರಲು ಬಯಸುವವರು ಜನವರಿಯಿಂದ ಮಾರ್ಚ್‌ವರೆಗೆ ಅರ್ಜಿ ಸಲ್ಲಿಸಬಹುದು.

ಅರ್ಜಿಗಳನ್ನು ಡಿಜಿಸಿಎ ತರಬೇತಿ ವಿಭಾಗವು ಪರಿಶೀಲಿಸುತ್ತದೆ ಮತ್ತು ಅರ್ಹತೆಯ ಆಧಾರದ ಮೇಲೆ ಸಂಬಂಧಪಟ್ಟ ನಿರ್ದೇಶನಾಲಯದ ಮುಖ್ಯಸ್ಥರಿಗೆ ರವಾನಿಸುತ್ತದೆ. ಮುಖ್ಯಸ್ಥರು ಅಭ್ಯರ್ಥಿಗಳೊಂದಿಗೆ ಸಂವಹನ ಅಥವಾ ಸಂದರ್ಶನ ನಡೆಸಿ ಆಯ್ಕೆ ಮಾಡುತ್ತಾರೆ. ಅಂತಿಮ ಆಯ್ಕೆಯಾದ ನಂತರ, ಅಭ್ಯರ್ಥಿಗಳಿಗೆ ಇಂಟರ್ನ್‌ಶಿಪ್ ಆಫರ್ ಲೆಟರ್ ಕಳುಹಿಸಲಾಗುತ್ತದೆ.

ಇಂಟರ್ನ್‌ಗಳು ತಮಗೆ ವಹಿಸಲಾದ ಕೆಲಸವನ್ನು ನಿಗದಿತ ಸಮಯದಲ್ಲಿ ಪೂರ್ಣಗೊಳಿಸಬೇಕು ಮತ್ತು ವರದಿಯನ್ನು ಸಲ್ಲಿಸಬೇಕು. ಇಂಟರ್ನ್‌ಶಿಪ್ ಪೂರ್ಣಗೊಂಡ ನಂತರ, ಅವರಿಗೆ ಅನುಭವ ಪ್ರಮಾಣಪತ್ರವನ್ನು ನೀಡಲಾಗುತ್ತದೆ. ಇಂಟರ್ನ್‌ಗಳು ಕಚೇರಿ ಸಮಯವನ್ನು ಪಾಲಿಸಬೇಕು ಮತ್ತು ಗೌಪ್ಯತೆಯನ್ನು ಕಾಪಾಡಿಕೊಳ್ಳಬೇಕು.