ಇದಕ್ಕೆ ಕಾರಣಗಳು ಬೇಕಾದಷ್ಟಿವೆ. ವಿದ್ಯಾರ್ಥಿಗಳಿಗೆ ವಿದೇಶಕ್ಕೆ ಹೋಗಿ ಓದುವುದು ಕಷ್ಟದ ವಿಷಯವಲ್ಲ. ಆದರೆ ಕೆಲ ದೇಶಗಳ ವಲಸೆ ನೀತಿಗಳು, ಹೆಚ್ಚುತ್ತಿರುವ ಶಿಕ್ಷಣ ವೆಚ್ಚಗಳು ಮತ್ತು ಅಧ್ಯಯನದ ನಂತರದ ಕೆಲಸದ ವೀಸಾಗಳ ಸುತ್ತ ಹೆಚ್ಚುತ್ತಿರುವ ಅನಿಶ್ಚಿತತೆಯಿಂದಾಗಿ ವಿದ್ಯಾರ್ಥಿಗಳು ಬೇರೆ ದೇಶಕ್ಕೆ ಹೋಗಿ ಓದುವ ಆಸೆಯನ್ನೇ ಮರೆಯುತ್ತಿದ್ದಾರೆ.
ಭಾರತೀಯ ವಿದೇಶಾಂಗ ಸಚಿವಾಲಯದ ಪ್ರಕಾರ, ವಿದೇಶಗಳಿಗೆ ಹೋಗುವ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆ 2023ರಲ್ಲಿ 893,000 ಇದ್ದಿದ್ದು, 2024ರ ಆರಂಭದಲ್ಲಿ 759,000ಕ್ಕೆ ಇಳಿಕೆಯಾಗಿದೆ. ಜಾಗತಿಕ ವಿಶ್ವವಿದ್ಯಾಲಯಗಳು ಭಾರತದಿಂದ ಸಕ್ರಿಯವಾಗಿ ನೇಮಕಾತಿ ಮಾಡಿಕೊಂಡಿದ್ದರೂ ಸಹ, ಕೆನಡಾ 41% ಕುಸಿತ ಕಂಡರೆ, ಯುಕೆ ಮತ್ತು ಆಸ್ಟ್ರೇಲಿಯಾ ಕ್ರಮವಾಗಿ 28% ಮತ್ತು 12% ರಷ್ಟು ಕುಸಿದಿವೆ. ಬಹಳ ಹಿಂದಿನಿಂದಲೂ ಅತ್ಯಂತ ಸುರಕ್ಷಿತ ಮತ್ತು ಮಹತ್ವಾಕಾಂಕ್ಷೆಯ ಆಯ್ಕೆಯಾಗಿ ಪರಿಗಣಿಸಲಾಗುತ್ತಿದ್ದ ಯುಎಸ್ ಸಹ ಹೊಸ ವಿದ್ಯಾರ್ಥಿ ವೀಸಾಗಳಲ್ಲಿ 13% ಕುಸಿತವನ್ನು ದಾಖಲಿಸಿದೆ. ಈ ಪ್ರವೃತ್ತಿಯು ವಿದ್ಯಾರ್ಥಿಗಳಿಗೆ ವಿದೇಶಿ ಶಿಕ್ಷಣದ ಮೇಲಿನ ಆಸಕ್ತಿಯನ್ನು ಕಡಿಮೆ ಮಾಡಿಲ್ಲ, ಬದಲಾಗಿ ಹೆಚ್ಚುತ್ತಿರುವ ವೆಚ್ಚ, ಕಠಿಣ ನೀತಿಗಳನ್ನು ಎತ್ತಿ ತೋರಿಸುತ್ತಿದೆ.
2024ರಲ್ಲಿ, ಸಾಂಪ್ರದಾಯಿಕ ಅಧ್ಯಯನ-ವಿದೇಶ ತಾಣಗಳು ನಿಯಮಗಳನ್ನು ತೀವ್ರವಾಗಿ ಬಿಗಿಗೊಳಿಸಿವೆ. ಕೆನಡಾ ಅಂತಾರಾಷ್ಟ್ರೀಯ ವಿದ್ಯಾರ್ಥಿ ಮಿತಿಯನ್ನು ಪರಿಚಯಿಸಿತು, ಹಣಕಾಸಿನ ಅವಶ್ಯಕತೆಗಳನ್ನು CAD 20,635ಕ್ಕೆ ಹೆಚ್ಚಿಸಿತು ಮತ್ತು ಕಠಿಣ ಇಂಗ್ಲಿಷ್ ಪ್ರಾವೀಣ್ಯತೆಯ ಪರೀಕ್ಷೆಯನ್ನು ಜಾರಿಗೆ ತಂದಿತು. ಇನ್ನು ಆಸ್ಟ್ರೇಲಿಯಾ ತನ್ನ ವೀಸಾ ಶುಲ್ಕವನ್ನು ದ್ವಿಗುಣಗೊಳಿಸಿತು ಮತ್ತು ಹೆಚ್ಚಿನ ಹಣಕಾಸು ಪುರಾವೆ ಅವಶ್ಯಕತೆಗಳನ್ನು ಪರಿಚಯಿಸಿತು. ಯುಕೆ ಕೂಡ ಕೌಶಲ್ಯಪೂರ್ಣ ಕೆಲಸಗಾರರ ವೇತನ ಮಿತಿಯನ್ನು 38,700 ಕ್ಕೆ ಹೆಚ್ಚಿಸಿತು ಮತ್ತು ಹೆಚ್ಚಿನ ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳು ಅವಲಂಬಿತರನ್ನು ಕರೆತರುವುದನ್ನು ನಿಷೇಧಿಸಿತು. ಈ ಪ್ರತಿಯೊಂದು ಬದಲಾವಣೆಗಳು ವಿದ್ಯಾರ್ಥಿಗಳಿಗೆ ವಿದೇಶಿ ಶಿಕ್ಷಣವನ್ನು ಕಷ್ಟಕರವಾಗಿಸುತ್ತಿದೆ ಮತ್ತು ಅದರಿಂದ ದೂರವಿರಲು ಪ್ರೇರೇಪಿಸುತ್ತಿದೆ.
ವಿದೇಶಗಳಲ್ಲಿ, ವಿಶೇಷವಾಗಿ ಯುಕೆ ಮತ್ತು ಕೆನಡಾದಂತಹ ದೇಶಗಳಲ್ಲಿ ಅಧ್ಯಯನ ಮಾಡಿರುವ ವಿದ್ಯಾರ್ಥಿಗಳು ಹಣಕಾಸಿನ ಸಮಸ್ಯೆಯಿಂದಾಗಿ ಸಾಯೋ ಪರಿಸ್ಥಿತಿ ಉಂಟಾಗಿದೆ ಎಂದು ಸೋಶಿಯಲ್ ಮೀಡಿಯಾದಲ್ಲಿ ವಿದ್ಯಾರ್ಥಿಗಳು ಹೇಳಿಕೊಂಡಿರುವುದನ್ನು ನೋಡಬಹುದು. ಅನೇಕ ಭಾರತೀಯ ವಿದ್ಯಾರ್ಥಿಗಳು ತೀವ್ರ ಆರ್ಥಿಕ ಒತ್ತಡದ ಕಥೆಗಳನ್ನು ಹಂಚಿಕೊಂಡಿದ್ದಾರೆ, ಬಾಡಿಗೆ ಮತ್ತು ಆಹಾರವನ್ನು ಪೂರೈಸುವ ಕಡಿಮೆ ಸಂಬಳದ ಅರೆಕಾಲಿಕ ಉದ್ಯೋಗಗಳೊಂದಿಗೆ ಜೀವನ ಸಾಗಿಸಲು ಹೆಣಗಾಡುತ್ತಿದ್ದಾರೆ. ಕೆಲವರು ತಮ್ಮ ಅಧ್ಯಯನದ ನಂತರದ ಭವಿಷ್ಯದ ಅನಿಶ್ಚಿತತೆಯಿಂದ ಬರ್ನ್ಔಟ್, ತೂಕ ನಷ್ಟ ಅಥವಾ ದೀರ್ಘಕಾಲದ ಒತ್ತಡವನ್ನು ಅನುಭವಿಸುತ್ತಿದ್ದಾಗಿ ಹೇಳಿಕೊಂಡಿದ್ದಾರೆ. ವೀಸಾ-ಪ್ರಾಯೋಜಿತ ಉದ್ಯೋಗಗಳ ಸೀಮಿತ ಲಭ್ಯತೆಯು ಮತ್ತೊಂದು ಕಳವಳವಾಗಿದೆ.
ಜರ್ಮನಿ ಮಾತ್ರ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆಯಲ್ಲಿ 68% ಹೆಚ್ಚಳ ಕಂಡಿದೆ. ಯುಎಇ ಕೂಡ ಆದ್ಯತೆಯ ಆಯ್ಕೆಯಾಗಿ ಏರುತ್ತಿದೆ, ಕಠಿಣ ಪಾಶ್ಚಿಮಾತ್ಯ ವೀಸಾ ಅಡೆತಡೆಗಳಿಲ್ಲದೆ ಸಾಮೀಪ್ಯ, ಉದ್ಯೋಗಾವಕಾಶಗಳು ಮತ್ತು ಬಹುಸಂಸ್ಕೃತಿಯ ಸೆಟಪ್ ಅನ್ನು ಇವು ಭಾರತೀಯ ವಿದ್ಯಾರ್ಥಿಗಳಿಗೆ ನೀಡುತ್ತಿವೆ.
ಬ್ರ್ಯಾಂಡ್ಗಳಿಗಿಂತ ವಲಸೆ ಸ್ನೇಹಿ ತಾಣಗಳು, ಕೈಗೆಟುಕುವ ಪದವಿಗಳು ಮತ್ತು ಬಲವಾದ ಸ್ಥಳೀಯ ಉದ್ಯೋಗ ಮಾರುಕಟ್ಟೆಗಳಿಗೆ ಆದ್ಯತೆ ನೀಡಲು ಇಂದಿನ ವಿದ್ಯಾರ್ಥಿಗಳಿಗೆ ಶಿಕ್ಷಣ ಸಲಹೆಗಾರರು ಹೇಳುತ್ತಾರೆ. ನಿಮ್ಮನ್ನು ದಿವಾಳಿ ಮತ್ತು ನಿರುದ್ಯೋಗಿಯನ್ನಾಗಿ ಮಾಡುವ ದೇಶ, ಕೋರ್ಸ್ಗಳನ್ನು ಬೆನ್ನಟ್ಟಬೇಡಿ ಎಂಬುವುದು ಶಿಕ್ಷಣ ಸಲಹೆಗಾರರ ಅಭಿಪ್ರಾಯ.
ವೆಚ್ಚ vs ಸರಾಸರಿ ಅಧ್ಯಯನದ ನಂತರದ ಸಂಬಳ, ವೀಸಾ ಮತ್ತು ಪಿಆರ್ ಆಯ್ಕೆಗಳು, ಇಂಟರ್ನ್ಶಿಪ್ ಬೆಂಬಲ, ಅಧ್ಯಯನದ ಸಮಯದಲ್ಲಿ ಕೆಲಸದ ಸಮಯದ ನಮ್ಯತೆ ಇವುಗಳನ್ನು ಪರಿಗಣಿಸಲು ವಿದ್ಯಾರ್ಥಿಗಳಿಗೆ ಹೇಳುತ್ತಾರೆ. ವಿದೇಶಿ ಪದವಿ ಅವುಗಳ ಮನ್ನಣೆಯನ್ನು ಕಳೆದುಕೊಂಡಿಲ್ಲ, ಆದರೆ ಕಣ್ತುಚ್ಚಿಕೊಂಡು ತಾಣಗಳನ್ನು ಆಯ್ಕೆ ಮಾಡುವ ಬದಲು ಬುದ್ಧಿವಂತಿಕೆಯಿಂದ ಆರಿಸಿಕೊಳ್ಳಿ. ನಿಮ್ಮನ್ನು ಹಣದ ಒತ್ತಡಕ್ಕೆ ಸಿಲುಕಿಸುವ ಪದವಿಗಳಿಂದ ದೂರವಿರಿ ಎಂದಿದ್ದಾರೆ.
June 25, 2025 5:54 PM IST
