ಹೌದು, ನೀವು ಬೇರೆ ಕೆಲಸ ಮಾಡುತ್ತಿರಲಿ, ರಾಜಕಾರಣಿಯಾಗಿರಲಿ, ಕ್ರೀಡಾಪಟುವಾಗಿರಲಿ, ಯಾರೇ ಆಗಿದ್ದರೂ ನಿಮ್ಮ ಕೆಲಸ ಮಾಡ್ತಾನೆ ಸೇನೆ ಸೇರುವ ಅದ್ಭುತ ಅವಕಾಶ ನೀಡುತ್ತದೆ ಪ್ರಾದೇಶಿಕ ಸೈನ್ಯ (TA) ವ್ಯವಸ್ಥೆ.
“ನಾಗರಿಕರ ಸೈನ್ಯ” ಎಂದು ಕರೆಯಲ್ಪಡುವ ಇದು ವೃತ್ತಿಪರರು, ರಾಜಕಾರಣಿಗಳು, ಕ್ರೀಡಾಪಟುಗಳು ಮತ್ತು ನಾಗರಿಕರು ತಮ್ಮ ನಿಯಮಿತ ವೃತ್ತಿಜೀವನವನ್ನ ಮುಂದುವರಿಸುತ್ತಾ ಮಿಲಿಟರಿಯಲ್ಲಿ ಸೇವೆ ಸಲ್ಲಿಸಲು ಅನುವು ಮಾಡಿಕೊಡುತ್ತದೆ.
ಎಂಎಸ್ ಧೋನಿಗೆ 2011ರಲ್ಲಿ ಪ್ಯಾರಾಚೂಟ್ ರೆಜಿಮೆಂಟ್ನ 106 TA ಬೆಟಾಲಿಯನ್ (ಪ್ಯಾರಾ) ನೊಂದಿಗೆ ಲೆಫ್ಟಿನೆಂಟ್ ಕರ್ನಲ್ (ಗೌರವ) ಹುದ್ದೆಯನ್ನು ನೀಡಲಾಯಿತು.
ಕಪಿಲ್ ದೇವ್ 2008ರಲ್ಲಿ ಪಂಜಾಬ್ ರೆಜಿಮೆಂಟ್ನ 150 TA (ಪದಾತಿ ದಳ) ಬೆಟಾಲಿಯನ್ನ ಭಾಗವಾಗಿದ್ದರು.
ಸಂಸದ ಸಚಿನ್ ಪೈಲಟ್, ಲೆಫ್ಟಿನೆಂಟ್ ಹುದ್ದೆಯೊಂದಿಗೆ TA ಯಲ್ಲಿ ನಿಯಮಿತ ಅಧಿಕಾರಿಯಾಗಿ ನೇಮಕಗೊಂಡ ಮೊದಲ ಹಾಲಿ ಸಂಸದ ಎಂಬ ಹೆಗ್ಗಳಿಕೆ ಪಡೆದಿದ್ದಾರೆ.
ಅನುರಾಗ್ ಠಾಕೂರ್ 2016ರಲ್ಲಿ ಲೆಫ್ಟಿನೆಂಟ್ ಆಗಿ ಸೇರಿದರು ಮತ್ತು ನಂತರ ಕ್ಯಾಪ್ಟನ್ ಆಗಿ ಬಡ್ತಿ ಪಡೆದರು.
ಶೂಟಿಂಗ್ ಕ್ರೀಡಾಪಟು ಅಭಿನವ್ ಬಿಂದ್ರಾ ಅವರನ್ನು 2011ರಲ್ಲಿ ಸಿಖ್ ರೆಜಿಮೆಂಟ್ನ ಟಿಎ ಬೆಟಾಲಿಯನ್ನಲ್ಲಿ ಲೆಫ್ಟಿನೆಂಟ್ ಕರ್ನಲ್ ಆಗಿ ನೇಮಕ ಮಾಡಲಾಯಿತು.
ಪ್ರಾದೇಶಿಕ ಸೈನ್ಯ ನಿಯಮಿತ ಭಾರತೀಯ ಸೈನ್ಯದ ಭಾಗವಾಗಿದೆ. ತಮ್ಮ ಉದ್ಯೋಗಗಳನ್ನು ಮುಂದುವರಿಸುತ್ತಾ ರಾಷ್ಟ್ರಕ್ಕೆ ಸೇವೆ ಸಲ್ಲಿಸಲು ಬಯಸುವ ನಾಗರಿಕರು ಇಲ್ಲಿ ಭಾಗಿಯಾಗಬಹುದು.
ಟಿಎ ಸಿಬ್ಬಂದಿ ನೈಸರ್ಗಿಕ ವಿಕೋಪಗಳು, ರಾಷ್ಟ್ರೀಯ ತುರ್ತು ಪರಿಸ್ಥಿತಿಗಳು ಮತ್ತು ಅಗತ್ಯ ಸೇವೆಗಳಲ್ಲಿ ಮಿಲಿಟರಿಯನ್ನು ಬೆಂಬಲಿಸುತ್ತಾರೆ. ಸ್ವಯಂಸೇವಕರು ಪ್ರತಿ ವರ್ಷವೂ ಕೆಲವು ದಿನಗಳ ಅವಧಿಗೆ ಸಮವಸ್ತ್ರ ಧರಿಸಿ ಸೇವೆ ಸಲ್ಲಿಸುತ್ತಾರೆ.
ಸುಮಾರು 50,000 ಸಿಬ್ಬಂದಿಯನ್ನು ಹೊಂದಿರುವ TA, ಇಲಾಖಾ ಘಟಕಗಳು (ರೈಲ್ವೆ, ONGC, IOC ನಂತಹವು) ಮತ್ತು ಇಲಾಖೇತರ ಘಟಕಗಳು (ಪದಾತಿ ದಳ ಮತ್ತು ಪರಿಸರ ಬೆಟಾಲಿಯನ್ಗಳು, ಎಂಜಿನಿಯರ್ ರೆಜಿಮೆಂಟ್ಗಳಂತೆ) ಎರಡನ್ನೂ ಒಳಗೊಂಡಿದೆ.
TA ಘಟಕಗಳು 1962, 1965 ಮತ್ತು 1971ರ ಯುದ್ಧಗಳು, ಹಾಗೆಯೇ ಆಪರೇಷನ್ ಪವನ್ ಮತ್ತು ಆಪರೇಷನ್ ರಕ್ಷಕ್ ಸೇರಿದಂತೆ ಪ್ರಮುಖ ಮಿಲಿಟರಿ ಕಾರ್ಯಾಚರಣೆಗಳಲ್ಲಿ ಭಾಗವಹಿಸಿವೆ. ಲಾತೂರ್ ಭೂಕಂಪ, ಉತ್ತರಕಾಶಿ ಪ್ರವಾಹ ಮತ್ತು ಒಡಿಶಾ ಸೂಪರ್ ಸೈಕ್ಲೋನ್ನಂತಹ ನೈಸರ್ಗಿಕ ವಿಕೋಪಗಳ ಸಮಯದಲ್ಲಿಯೂ ಅವರು ಕರ್ತವ್ಯ ನಿರ್ವಹಿಸಿದ್ದಾರೆ.
ಪ್ರಾದೇಶಿಕ ಸೈನ್ಯಕ್ಕೆ ಹೇಗೆ ಸೇರುವುದು?
ಅರ್ಹತೆ
• ವಯಸ್ಸು: 18 ರಿಂದ 42 ವರ್ಷಗಳು
• ಶಿಕ್ಷಣ: ಕನಿಷ್ಠ 10 ನೇ ತರಗತಿ (ಮೆಟ್ರಿಕ್ಯುಲೇಷನ್); ವಿನಾಯಿತಿಗಳು ಕೆಲವು ಸಂದರ್ಭಗಳಲ್ಲಿ ಅನ್ವಯಿಸಬಹುದು
ಅಭ್ಯರ್ಥಿಗಳು ನಿಗದಿತ ದಿನಾಂಕಗಳಲ್ಲಿ TA ಘಟಕ ಅಥವಾ ನೇಮಕಾತಿ ಕಚೇರಿಗೆ ವರದಿ ಮಾಡಬೇಕು. ಪ್ರಕ್ರಿಯೆಯು ದೈಹಿಕ ಪರೀಕ್ಷೆ, ವೈದ್ಯಕೀಯ ಮಂಡಳಿ ಮತ್ತು ಪೊಲೀಸ್ ಪರಿಶೀಲನೆಯನ್ನು ಒಳಗೊಂಡಿರುತ್ತದೆ. ಅಧಿಸೂಚನೆಗಳನ್ನು ಸಾಮಾನ್ಯವಾಗಿ ಪತ್ರಿಕೆಗಳಲ್ಲಿ ಮತ್ತು ಅಧಿಕೃತ ಭಾರತೀಯ ಸೇನೆಯ ವೆಬ್ಸೈಟ್ನಲ್ಲಿ ಪ್ರಕಟಿಸಲಾಗುತ್ತದೆ.
ನಾಗರಿಕರಿಗೆ ನಿಯೋಜಿತ ಅಧಿಕಾರಿಯಾಗಿ ಸೇರಲು
ರಾಷ್ಟ್ರೀಯತೆ: ಭಾರತೀಯ (ಪುರುಷ ಅಥವಾ ಮಹಿಳೆ)
ವಯಸ್ಸು: 18 ರಿಂದ 42 ವರ್ಷಗಳು (ಜೂನ್ 10, 2025 ರಂತೆ)
ಶಿಕ್ಷಣ: ಮಾನ್ಯತೆ ಪಡೆದ ವಿಶ್ವವಿದ್ಯಾಲಯದಿಂದ ಪದವಿ
ದೈಹಿಕ ಮಾನದಂಡಗಳು: ವೈದ್ಯಕೀಯವಾಗಿ ಮತ್ತು ದೈಹಿಕವಾಗಿ ಸದೃಢರಾಗಿರಬೇಕು
ಉದ್ಯೋಗ: ಸರ್ಕಾರಿ, ಸಾರ್ವಜನಿಕ, ಖಾಸಗಿ ವಲಯ ಅಥವಾ ಸ್ವಯಂ ಉದ್ಯೋಗಿಗಳಲ್ಲಿ ಲಾಭದಾಯಕ ಉದ್ಯೋಗದಲ್ಲಿರಬೇಕು
ಈ ಪ್ರವೇಶವನ್ನು ಲಿಖಿತ ಪರೀಕ್ಷೆಯ ಮೂಲಕ ನಡೆಸಲಾಗುತ್ತದೆ, ನಂತರ ಸೇವಾ ಆಯ್ಕೆ ಮಂಡಳಿ (SSB) ಸಂದರ್ಶನ, ವೈದ್ಯಕೀಯ ಪರೀಕ್ಷೆ ಮತ್ತು ದಾಖಲೆ ಪರಿಶೀಲನೆ ಮಾಡಲಾಗುತ್ತದೆ. ಪ್ರವೇಶ ಪತ್ರಗಳನ್ನು ತಾತ್ಕಾಲಿಕವಾಗಿ ನೀಡಲಾಗುತ್ತದೆ ಮತ್ತು ಪರೀಕ್ಷೆಯಲ್ಲಿ ಉತ್ತೀರ್ಣರಾದ ನಂತರವೇ ಅಂತಿಮ ಅರ್ಹತೆಯನ್ನು ಪರಿಶೀಲಿಸಲಾಗುತ್ತದೆ.
ನೇಮಕಾತಿ ಅಧಿಸೂಚನೆಗಳಿಗಾಗಿ ಭಾರತೀಯ ಸೇನೆಯ ವೆಬ್ಸೈಟ್ ಅನ್ನು ನಿಯಮಿತವಾಗಿ ಪರಿಶೀಲಿಸಿ. ಲಿಖಿತ ಮತ್ತು ದೈಹಿಕ ಪರೀಕ್ಷೆಗಳಿಗೆ ಚೆನ್ನಾಗಿ ತಯಾರಿ ಮಾಡಿ. ಅಗತ್ಯವಿರುವ ಎಲ್ಲಾ ದಾಖಲೆಗಳನ್ನು (ಶೈಕ್ಷಣಿಕ, ವೈದ್ಯಕೀಯ, ಉದ್ಯೋಗ) ಕ್ರಮವಾಗಿ ಇರಿಸಿ.
ಕ್ಷೇತ್ರ ತರಬೇತಿ ಮತ್ತು ಮಿಲಿಟರಿ ಶಿಸ್ತು ಪಾತ್ರದ ಭಾಗವಾಗಿದೆ ಎಂಬುದನ್ನು ಅರ್ಥಮಾಡಿಕೊಳ್ಳಿ. ಅಗತ್ಯವಿದ್ದಾಗ ತಾತ್ಕಾಲಿಕ ನಿಯೋಜನೆಗಳಿಗೆ ಮಾನಸಿಕವಾಗಿ ಸಿದ್ಧರಾಗಿರಿ.
July 23, 2025 5:36 PM IST
Indian Army: ಧೋನಿ, ಸಚಿನ್ ಪೈಲಟ್ರಂತೆ ನೀವು ಭಾರತೀಯ ಸೇನೆ ಸೇರಿ ದೇಶ ಸೇವೆ ಮಾಡ್ಬೇಕಾ? ಈ ರೀತಿ ಅರ್ಜಿ ಸಲ್ಲಿಸಿ
