ಐಐಟಿ-ಬಿಎಚ್ಯು ಪದವೀಧರ ಶಿವಾಂಶು ರಂಜನ್ ಇತ್ತೀಚೆಗೆ ಅಮೆಜಾನ್ನಲ್ಲಿ ಸಾಫ್ಟ್ವೇರ್ ಡೆವಲಪ್ಮೆಂಟ್ ಇಂಜಿನಿಯರ್ (SDE-1) ಆಗಿ ಆಯ್ಕೆಯಾಗಿದ್ದಾರೆ. ಈ ಸಾಧನೆ ಅನೇಕ ಯುವಕರ ಕನಸಿನ ಕೆಲಸ. ಆದರೆ, ಈ ಖುಷಿಯ ಸುದ್ದಿಗೆ ಅವರ ತಂದೆಯಿಂದ ಬಂದ ಪ್ರತಿಕ್ರಿಯೆಯು ಎಲ್ಲರನ್ನು ಆಶ್ಚರ್ಯಕ್ಕೀಡುಮಾಡಿದೆ — ಹಾಗಾದರೆ, ಅವರ ಪ್ರತಿಕ್ರಿಯೆ ಏನಿತ್ತು ಗೊತ್ತೆ?!
ರಂಜನ್ ತಮ್ಮ ತಂದೆಗೆ ಅಪ್ಪಾ, ನನಗೆ ಅಮೆಜಾನ್ನಲ್ಲಿ ಕೆಲಸ ಸಿಕ್ಕಿದೆ ಎಂದು ಸಂದೇಶ ಕಳುಹಿಸಿ ಅವರಿಂದ ಉತ್ಸಾಹಭರಿತ ಪ್ರತಿಕ್ರಿಯೆ ಅಥವಾ ಅಭಿನಂದನೆ ನಿರೀಕ್ಷಿಸಿದ್ದರು. ಅವರು ನಿರೀಕ್ಷಿಸಿದ್ದೇನಂದ್ರೆ, ಒಂದು ಉತ್ಸಾಹಭರಿತ “ವಾಹ್!”, “ಅಭಿನಂದನೆಗಳು!” ಅಥವಾ “ನಿನ್ನ ಬಗ್ಗೆ ಹೆಮ್ಮೆಯಾಗುತ್ತಿದೆ!” ಎಂಬ ಮಾತುಗಳು. ಆದರೆ ತಂದೆಯಿಂದ ಬಂದ ಉತ್ತರ ಮಾತ್ರ ಮಗನನ್ನು ಮಾತ್ರವಲ್ಲದೇ ನೆಟ್ಟಿಗರನ್ನು ಸಹ ಆಶ್ಚರ್ಯಕ್ಕೀಡು ಮಾಡಿದೆ.
ಶಿವಾಂಶು ರಂಜನ್ ತಂದೆ, ಮಗನ ಸಂದೇಶಕ್ಕೆ ಜಸ್ಟ್ ಓಕೆ ಅಂತಾ ಸಿಂಪಲ್ಲಾಗಿ ರಿಪ್ಲೈ ಮಾಡಿದ್ದರು. ಈ ಸರಳ ಉತ್ತರವೇ ಇಂಟರ್ನೆಟ್ನಲ್ಲಿ ನಗುವಿಗೂ, ಚರ್ಚೆಗೂ ಕಾರಣವಾಗಿದೆ. ಅನೇಕರು ಈ ಘಟನೆಯನ್ನು ತಮ್ಮ ಜೀವನದೊಂದಿಗೆ ಹೋಲಿಸಿಕೊಂಡಿದ್ದಾರೆ. ಒಬ್ಬ ಬಳಕೆದಾರರು, “ನಿಮ್ಮ ಅಪ್ಪ ಜೀವನದಲ್ಲಿ ತುಂಬಾ ಅನುಭವಿಸಿದ್ದಾರೆಂದೆನಿಸುತ್ತದೆ. ನಿಮಗೆ ಇದು ದೊಡ್ಡ ಸಾಧನೆ ಇರಬಹುದು, ಆದರೆ,ಅವರ ದೃಷ್ಟಿಯಲ್ಲಿ ಇದು ಸಹಜ ಹಂತ. ಹಾಗೆಯೇ ನಾವೂ ಬೆಳೆದಾಗ, ನಮ್ಮ ಮಕ್ಕಳ ಸಾಧನೆಗಳಿಗೆ ಇದೇ ರೀತಿಯ ಸರಳ, ಸಮಾಧಾನಕರ ಪ್ರತಿಕ್ರಿಯೆ ಕೊಡಬಹುದೆನಿಸುತ್ತದೆ” ಎಂದಿದ್ದಾರೆ.
ಮತ್ತೊಬ್ಬ ಬಳಕೆದಾರರು, “ಹೊಸ ಪೀಳಿಗೆಯ ಕಾರ್ಪೊರೇಟ್ ಜಗತ್ತು ಕೆಲವು ಪೋಷಕರಿಗೆ ಅಷ್ಟೇನೂ ಗೊತ್ತಾಗುವುದಿಲ್ಲ. ಅವರ ದೃಷ್ಟಿಯಲ್ಲಿ ಸರ್ಕಾರಿ ಕೆಲಸ ಹೊರತುಪಡಿಸಿ ಎಲ್ಲ ಉದ್ಯೋಗಗಳೂ ‘ಪ್ರೈವೇಟ್ ಜಾಬ್’ ಅಷ್ಟೇ!”
ಮತ್ತೊಬ್ಬರು “ಆ ‘OK’ಯಲ್ಲಿ ವಾಟ್ಸಾಪ್ನಲ್ಲಿ ವ್ಯಕ್ತಪಡಿಸಲಾಗದ ದೊಡ್ಡ ಭಾವನೆ ಇದೆ. ಅದು ಶಬ್ದದ ಮೀರಿದ ಆಶೀರ್ವಾದ.” ಎಂದಿದ್ದಾರೆ.
ಪೋಷಕರ ಪ್ರೀತಿ ಯಾವಾಗಲೂ ಎಂದೂ ನಾಟಕೀಯವಾಗಿರುವುದಿಲ್ಲ. ಈ ಚಿಕ್ಕ ಘಟನೆ ಭಾರತೀಯ ಪೋಷಕರ ಮೌನದಲ್ಲಿರುವ ಪ್ರೀತಿಯ ಶಕ್ತಿಯನ್ನು ನೆನಪಿಸುತ್ತದೆ. ಅವರು ಶಬ್ದಗಳಲ್ಲಿ ಅಭಿನಂದನೆ ತೋರದಿದ್ದರೆ, ಅವರ ಒಂದೇ “ಒಕೆ”ಯಲ್ಲಿ ನೂರಾರು ಆಶೀರ್ವಾದಗಳು, ಹೆಮ್ಮೆ ಮತ್ತು ನಂಬಿಕೆ ಅಡಗಿವೆ. ಕೆಲವೊಮ್ಮೆ ಪ್ರೀತಿಯ ಅತ್ಯಂತ ಸತ್ಯವಾದ ರೂಪ ಅದೆಷ್ಟೋ ಬಾರಿ ಸರಳವಾಗಿ ವ್ಯಕ್ತವಾಗುತ್ತದೆ.
October 27, 2025 11:34 PM IST
