Last Updated:
ಹತ್ತಾರು ಗಂಟೆಗಳ ಕಾಲ ಕಂಪ್ಯೂಟರ್ ಮುಂದೆ ಕೂರುವುದಕ್ಕಿಂತ, ಕೆಲಸದ ನಡುವೆ ಸಿಗುವ ನೆಮ್ಮದಿ ಮತ್ತು ಸ್ವಾತಂತ್ರ್ಯಕ್ಕೆ ಜನರು ಮೊದಲ ಆದ್ಯತೆ ನೀಡುತ್ತಿದ್ದಾರೆ. ಈ ಬದಲಾಗುತ್ತಿರುವ ಕೆಲಸದ ಸಂಸ್ಕೃತಿಯ ಬಗ್ಗೆ ಪೂರ್ತಿ ವಿವರ ಇಲ್ಲಿದೆ.
ಕಚೇರಿಗೆ (Offce) ಹೋಗಿ ಕೆಲಸ (Work) ಮಾಡಬೇಕೋ ಅಥವಾ ಮನೆಯಿಂದಲೇ ಕೆಲಸ ಮಾಡಬೇಕೋ ಎಂಬ ಚರ್ಚೆ ಕಳೆದ ಕೆಲವು ವರ್ಷಗಳಿಂದ ನಡೆಯುತ್ತಲೇ ಇದೆ. ಆದರೆ, 2026ರ ಹೊತ್ತಿಗೆ ಈ ಚರ್ಚೆ ಒಂದು ಹೊಸ ಮಜಲು ತಲುಪಿದೆ. ಈಗ ಉದ್ಯೋಗಿಗಳು (Employees) ಕಚೇರಿಯ ಕಟ್ಟಡದ ಬಗ್ಗೆ ತಲೆಕೆಡಿಸಿಕೊಳ್ಳುತ್ತಿಲ್ಲ, ಬದಲಿಗೆ ತಮ್ಮ ಕೆಲಸದ ಸಮಯದ ಮೇಲೆ ತಮಗೆ ನಿಯಂತ್ರಣ ಬೇಕು ಎಂದು ಪಟ್ಟು ಹಿಡಿಯುತ್ತಿದ್ದಾರೆ. ದೀರ್ಘ ಸಮಯದ ಕೆಲಸದಿಂದ ಉಂಟಾಗುವ ದೈಹಿಕ ಮತ್ತು ಮಾನಸಿಕ ದಣಿವು (Physical and Mental Stress) ಈಗ ಉದ್ಯೋಗಿಗಳು ಕೆಲಸ ಬಿಡಲು ಪ್ರಮುಖ ಕಾರಣವಾಗುತ್ತಿದೆ.
ಹತ್ತಾರು ಗಂಟೆಗಳ ಕಾಲ ಕಂಪ್ಯೂಟರ್ ಮುಂದೆ ಕೂರುವುದಕ್ಕಿಂತ, ಕೆಲಸದ ನಡುವೆ ಸಿಗುವ ನೆಮ್ಮದಿ ಮತ್ತು ಸ್ವಾತಂತ್ರ್ಯಕ್ಕೆ ಜನರು ಮೊದಲ ಆದ್ಯತೆ ನೀಡುತ್ತಿದ್ದಾರೆ. ಈ ಬದಲಾಗುತ್ತಿರುವ ಕೆಲಸದ ಸಂಸ್ಕೃತಿಯ ಬಗ್ಗೆ ಪೂರ್ತಿ ವಿವರ ಇಲ್ಲಿದೆ.
ಪ್ರಾತಿನಿಧಿಕ ಚಿತ್ರ
ಜೆಎಲ್ಎಲ್ ಸಂಸ್ಥೆಯ ಇತ್ತೀಚಿನ ವರದಿಯ ಪ್ರಕಾರ, ಜಾಗತಿಕವಾಗಿ ಶೇ. 65 ರಷ್ಟು ಉದ್ಯೋಗಿಗಳು ಹೆಚ್ಚಿನ ಸಂಬಳಕ್ಕಿಂತ “ಕೆಲಸದ ಸಮಯದ ನಮ್ಯತೆ” ಅಥವಾ ಫ್ಲೆಕ್ಸಿಬಿಲಿಟಿಯನ್ನು ಇಷ್ಟಪಡುತ್ತಿದ್ದಾರೆ. 2022ರಲ್ಲಿ ಈ ಸಂಖ್ಯೆ ಶೇ. 59 ಇತ್ತು. ಅಂದರೆ ಜನರು ಈಗ ಹಣಕ್ಕಿಂತ ಹೆಚ್ಚಾಗಿ ತಮ್ಮ ವೈಯಕ್ತಿಕ ಜೀವನಕ್ಕೆ ಸಿಗುವ ಸಮಯಕ್ಕೆ ಬೆಲೆ ನೀಡುತ್ತಿದ್ದಾರೆ. ಸಮಯದ ಮೇಲೆ ನಮಗೆ ಅಧಿಕಾರವಿದ್ದರೆ ಜೀವನದ ತೃಪ್ತಿ ಹೆಚ್ಚಾಗುತ್ತದೆ ಎಂದು ಈ ಅಧ್ಯಯನ ತಿಳಿಸಿದೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಮತ್ತು ಅಂತರಾಷ್ಟ್ರೀಯ ಕಾರ್ಮಿಕ ಸಂಸ್ಥೆ (ILO) ಜಂಟಿಯಾಗಿ ನಡೆಸಿದ ಸಂಶೋಧನೆಯು ಒಂದು ಆಘಾತಕಾರಿ ಸತ್ಯವನ್ನು ಹೊರಹಾಕಿದೆ. ವಾರಕ್ಕೆ 55 ಗಂಟೆ ಅಥವಾ ಅದಕ್ಕಿಂತ ಹೆಚ್ಚು ಕಾಲ ಕೆಲಸ ಮಾಡುವವರಿಗೆ ಹೃದಯ ಸಂಬಂಧಿ ಕಾಯಿಲೆಗಳು ಮತ್ತು ಪಾರ್ಶ್ವವಾಯು ಬರುವ ಅಪಾಯ ಬಹಳ ಹೆಚ್ಚಿರುತ್ತದೆ. ಇದೇ ಕಾರಣಕ್ಕೆ ಈಗಿನ ಯುವ ಪೀಳಿಗೆ “ಬರ್ನ್ಔಟ್” ಅಥವಾ ವಿಪರೀತ ದಣಿವಿನಿಂದ ತಪ್ಪಿಸಿಕೊಳ್ಳಲು ದೀರ್ಘ ಸಮಯದ ಕೆಲಸಕ್ಕೆ ವಿದಾಯ ಹೇಳುತ್ತಿದ್ದಾರೆ.
ಭಾರತದ ಮಾರುಕಟ್ಟೆಯೂ ಈ ಬದಲಾವಣೆಗೆ ಹೊರತಾಗಿಲ್ಲ. ಡೆಲಾಯ್ಟ್ ಇಂಡಿಯಾ ನಡೆಸಿದ 2024ರ ಸಮೀಕ್ಷೆಯ ಪ್ರಕಾರ, 40 ವರ್ಷದೊಳಗಿನ ಉದ್ಯೋಗಿಗಳು ಕೆಲಸ ಬಿಡಲು ಅಥವಾ ಅದೇ ಕೆಲಸದಲ್ಲಿ ಉಳಿಯಲು “ಮಾನಸಿಕ ಆರೋಗ್ಯ” ಮತ್ತು “ಕೆಲಸದ ಒತ್ತಡ” ಪ್ರಮುಖ ಕಾರಣ ಎಂದು ತಿಳಿಸಿದ್ದಾರೆ.
ಭಾರತವು ಅತಿ ಹೆಚ್ಚು ಸಮಯ ಕೆಲಸ ಮಾಡುವ ದೇಶಗಳ ಪಟ್ಟಿಯಲ್ಲಿದೆ, ಇದು ಈಗಿನ ಯುವ ಜನತೆಯಲ್ಲಿ ಹೆಚ್ಚಿನ ಒತ್ತಡಕ್ಕೆ ಕಾರಣವಾಗುತ್ತಿದೆ. ಅವರು ಕೇವಲ ಕಚೇರಿಗೆ ಬರುವುದನ್ನು ವಿರೋಧಿಸುತ್ತಿಲ್ಲ, ಬದಲಿಗೆ ಕಚೇರಿಯಲ್ಲಿ ಕಳೆಯುವ ಅತಿಯಾದ ಸಮಯವನ್ನು ವಿರೋಧಿಸುತ್ತಿದ್ದಾರೆ.
ಈಗಿನ ಕಾಲದಲ್ಲಿ ಕಂಪನಿಗಳು ಉದ್ಯೋಗಿ ಎಷ್ಟು ಗಂಟೆ ಕುಳಿತು ಕೆಲಸ ಮಾಡಿದ ಎನ್ನುವುದಕ್ಕಿಂತ, ಎಷ್ಟು ಕೆಲಸವನ್ನು ಯಶಸ್ವಿಯಾಗಿ ಮುಗಿಸಿದ ಎನ್ನುವುದಕ್ಕೆ ಆದ್ಯತೆ ನೀಡುತ್ತಿವೆ. ವರ್ಲ್ಡ್ ಎಕನಾಮಿಕ್ ಫೋರಂ ಕೂಡ “ಫಲಿತಾಂಶ ಆಧಾರಿತ” ಕೆಲಸದ ಮಾದರಿಗೆ ಹೆಚ್ಚಿನ ಬೆಂಬಲ ನೀಡುತ್ತಿದೆ. ಅಂದರೆ ನೀವು ಎಷ್ಟು ಗಂಟೆ ಲಾಗಿನ್ ಆಗಿದ್ದೀರಿ ಎನ್ನುವುದು ಮುಖ್ಯವಲ್ಲ, ನಿಮಗೆ ಕೊಟ್ಟ ಜವಾಬ್ದಾರಿಯನ್ನು ಎಷ್ಟು ಚೆನ್ನಾಗಿ ನಿಭಾಯಿಸಿದ್ದೀರಿ ಎನ್ನುವುದು ಮುಖ್ಯ.
