Summer Camp: ಸರ್ಕಾರಿ ಶಾಲೆಯ ಮಕ್ಕಳಿಗೆ

Last Updated:May 07, 2026 7:38 AM IST

ಚಿಕ್ಕಮಗಳೂರು ಸರ್ಕಾರಿ ಶಾಲಾ ಮಕ್ಕಳಿಗೆ ಜಿಲ್ಲಾ ಪಂಚಾಯಿತಿ, ಕೀರ್ತನಾ ಹೆಚ್.ಎಸ್. ಮತ್ತು ಕ್ಯಾನನ್ ಸಹಯೋಗದಲ್ಲಿ ಬೇಸಿಗೆ ಬೆಸುಗೆ ಫೋಟೋಗ್ರಫಿ ಶಿಬಿರ, ಹಳ್ಳಿಯ ಮಕ್ಕಳು ಪ್ರೊಫೆಷನಲ್ ತರಬೇತಿ ಪಡೆಯುತ್ತಿದ್ದಾರೆ.

ಇಲ್ಲಿ ವಿಡಿಯೋ ನೋಡಿ

ಚಿಕ್ಕಮಗಳೂರು: ಬೇಸಿಗೆ (Summer) ರಜೆ ಬಂತೆಂದರೆ ಶ್ರೀಮಂತರ ಮಕ್ಕಳು ಸಾವಿರಾರು ರೂಪಾಯಿ ಫೀಸ್ ಕಟ್ಟಿ ಹೈಟೆಕ್ ಸಮ್ಮರ್ ಕ್ಯಾಂಪ್‍ಗಳಿಗೆ (Camp) ಹೋಗುವುದು ಸಾಮಾನ್ಯ. ಆದರೆ, ಚಿಕ್ಕಮಗಳೂರು (Chikkamagaluru) ಜಿಲ್ಲೆಯ ಸರ್ಕಾರಿ ಶಾಲೆಯ (Govt School) ಮಕ್ಕಳು ಈಗ ವಿಶ್ವದರ್ಜೆಯ ಕ್ಯಾಮೆರಾ ಹಿಡಿದು ಫೋಟೋಗ್ರಫಿ (Photography) ಕಲಿಯುತ್ತಿದ್ದಾರೆ. ಹೌದು, ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಕೀರ್ತನಾ ಹೆಚ್.ಎಸ್. ಅವರ ದೂರದೃಷ್ಟಿಯ ಫಲವಾಗಿ ಬೇಸಿಗೆ ಬೆಸುಗೆ ಎಂಬ ವಿನೂತನ ಶಿಬಿರ ರಾಜ್ಯದಾದ್ಯಂತ ಸದ್ದು ಮಾಡುತ್ತಿದೆ.

ಕ್ಯಾನನ್ ಕಂಪನಿ ಸಹಯೋಗದಲ್ಲಿ ಹೈಟೆಕ್ ತರಬೇತಿ

ಇಡೀ ರಾಜ್ಯದಲ್ಲೇ ಮೊದಲ ಬಾರಿಗೆ ಎಂಬಂತೆ, ಚಿಕ್ಕಮಗಳೂರು ಜಿಲ್ಲಾ ಪಂಚಾಯತ್ ಮತ್ತು ಖ್ಯಾತ ಕ್ಯಾಮೆರಾ ತಯಾರಿಕಾ ಕಂಪನಿ ಕ್ಯಾನನ್ ಸಹಯೋಗದಲ್ಲಿ ಮಕ್ಕಳಿಗೆ ಛಾಯಾಗ್ರಹಣದ ಪ್ರಾಯೋಗಿಕ ತರಬೇತಿ ನೀಡಲಾಗುತ್ತಿದೆ. ತರೀಕೆರೆ ತಾಲ್ಲೂಕಿನ ಲಿಂಗದಹಳ್ಳಿ ಮತ್ತು ಲಕ್ಕವಳ್ಳಿ ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ ಈ ವಿಶೇಷ ಕಾರ್ಯಾಗಾರ ನಡೆದಿದೆ.

ಹಳ್ಳಿಯ ಮಕ್ಕಳೇ ಈಗ ಫೋಟೋಗ್ರಾಫರ್ಸ್

6 ರಿಂದ 14 ವರ್ಷದ ಮಕ್ಕಳಿಗೆ ಲಕ್ಷಾಂತರ ರೂಪಾಯಿ ಬೆಲೆಬಾಳುವ ಕ್ಯಾಮೆರಾಗಳನ್ನು ನೀಡಿ, ಅವುಗಳನ್ನು ಹೇಗೆ ಬಳಸಬೇಕು? ಲೈಟಿಂಗ್ ಅಂದ್ರೆ ಏನು? ಫೋಟೋ ಕ್ಲಿಕ್ಕಿಸುವಾಗ ಗಮನಿಸಬೇಕಾದ ತಾಂತ್ರಿಕ ಅಂಶಗಳೇನು? ಎಂಬ ಬಗ್ಗೆ ಸಮಗ್ರ ಮಾಹಿತಿ ನೀಡಲಾಯಿತು. ಹಳ್ಳಿಯ ಮಕ್ಕಳು ಯಾವುದೇ ಸಂಕೋಚವಿಲ್ಲದೆ ಪ್ರೊಫೆಷನಲ್ ಕ್ಯಾಮರಾಗಳನ್ನು ಹಿಡಿದು ತಮ್ಮ ಸ್ನೇಹಿತರ ಫೋಟೋ ತೆಗೆದು ಖುಷಿ ಪಟ್ಟರು.

ದೂರದೃಷ್ಟಿಯ ಚಿಂತನೆ

ಕೇವಲ ಆಟ-ಪಾಠಕ್ಕಷ್ಟೇ ಸೀಮಿತವಾಗದ ಈ ಶಿಬಿರದಲ್ಲಿ ಗ್ರಾಮೀಣ ಕ್ರೀಡೆಗಳ ಜೊತೆಗೆ ಇಂತಹ ವೃತ್ತಿಪರ ಕೌಶಲಗಳನ್ನು ಪರಿಚಯಿಸುತ್ತಿರುವುದು ಮಕ್ಕಳಲ್ಲಿ ಹೊಸ ಆತ್ಮವಿಶ್ವಾಸ ತುಂಬಿದೆ. ಪ್ರತಿ ಗ್ರಾಮ ಪಂಚಾಯಿತಿಯಲ್ಲೂ ಈ ಶಿಬಿರ ನಡೆಯುತ್ತಿದ್ದು, ಸರ್ಕಾರಿ ಶಾಲೆಯ ಮಕ್ಕಳಿಗೆ ಈ ರಜೆ ನಿಜಕ್ಕೂ ನೆನಪಿನಲ್ಲಿ ಉಳಿಯುವಂತಾಗಿದೆ. ಒಟ್ಟಿನಲ್ಲಿ, ಕಾಫಿನಾಡಿನ ಈ ಹೊಸ ಪ್ರಯತ್ನವು ಶಿಕ್ಷಣ ಕ್ಷೇತ್ರದಲ್ಲಿ ಹೊಸ ಕ್ರಾಂತಿಗೆ ನಾಂದಿ ಹಾಡಿದೆ.

Location :

Chikmagalur,Chikmagalur,Karnataka

Source link