Last Updated:
Indian Institutes of Technology: ಸೋಮವಾರ ಜೆಇಇ ಅಡ್ವಾನ್ಸ್ಡ್ 2026 ರ ಫಲಿತಾಂಶ ಪ್ರಕಟವಾಗಿದ್ದು, ಪರೀಕ್ಷೆಗೆ ಹಾಜರಾದ 40,562 ಮಹಿಳಾ ಅಭ್ಯರ್ಥಿಗಳಲ್ಲಿ ಶೇ. 24.9 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಒಟ್ಟಾರೆಯಾಗಿ, ಸುಮಾರು 56,000 ಅಭ್ಯರ್ಥಿಗಳು ಅರ್ಹತೆ ಪಡೆದು ಸಾಮಾನ್ಯ ರ್ಯಾಂಕ್ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.
ನವದೆಹಲಿ: ಇದೇ ಮೊದಲ ಬಾರಿಗೆ, 10,000ಕ್ಕೂ ಹೆಚ್ಚು ಹುಡುಗಿಯರು ಭಾರತೀಯ ತಂತ್ರಜ್ಞಾನ ಸಂಸ್ಥೆಗಳಿಗೆ (IIT) ಪ್ರವೇಶ ಪಡೆಯಲು ಅರ್ಹತೆ ಪಡೆದಿದ್ದಾರೆ, ಸುಮಾರು ನಾಲ್ಕು ಮಹಿಳಾ ಅಭ್ಯರ್ಥಿಗಳಲ್ಲಿ ಒಬ್ಬರು JEE-ಅಡ್ವಾನ್ಸ್ಡ್ 2026 ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದಾರೆ. ಇದು ದಾಖಲೆಯ ಅತ್ಯಧಿಕ ಉತ್ತೀರ್ಣ ದರ (JEE Advanced 2026) ಎಂದು ವರದಿಯಾಗಿದೆ.
2019ರಿಂದೀಚೆಗೆ ಐಐಟಿಗೆ ಅರ್ಹತೆ ಮಹಿಳೆಯರ ಸಂಖ್ಯೆ ಬಹಳ ಹೆಚ್ಚಾಗಿದೆ. ಮಹಿಳೆಯರಿಗೆ ಹೆಚ್ಚುವರಿ ಸೀಟುಗಳನ್ನು ಕೊಡುವ ಯೋಜನೆ ಪ್ರಾರಂಭವಾದ ನಂತರ, ಐಐಟಿಗೆ ಅರ್ಹತೆ ಪಡೆದ ಮಹಿಳೆಯರ ಸಂಖ್ಯೆ 5,356ರಿಂದ 10,107ಕ್ಕೆ ಏರಿದೆ. ಇದು ಸುಮಾರು 89% ಹೆಚ್ಚಳವಾಗಿದೆ. ಇನ್ನು ಪರೀಕ್ಷೆಗೆ ಹಾಜರಾದ ಮಹಿಳೆಯರ ಸಂಖ್ಯೆ ಮಾತ್ರ 33,249ರಿಂದ 40,562ಕ್ಕೆ ಬೆಳೆದಿದ್ದು, ಸುಮಾರು 22% ಹೆಚ್ಚಳವಾಗಿದೆ ಎಂದು ದಿ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಾಡಿದೆ.
ಸೋಮವಾರ ಜೆಇಇ ಅಡ್ವಾನ್ಸ್ಡ್ 2026 ರ ಫಲಿತಾಂಶ ಪ್ರಕಟವಾಗಿದ್ದು, ಪರೀಕ್ಷೆಗೆ ಹಾಜರಾದ 40,562 ಮಹಿಳಾ ಅಭ್ಯರ್ಥಿಗಳಲ್ಲಿ ಶೇ. 24.9 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಒಟ್ಟಾರೆಯಾಗಿ, ಸುಮಾರು 56,000 ಅಭ್ಯರ್ಥಿಗಳು ಅರ್ಹತೆ ಪಡೆದು ಸಾಮಾನ್ಯ ರ್ಯಾಂಕ್ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.
ಜೆಇಇ ಅಡ್ವಾನ್ಸ್ಡ್ ರ್ಯಾಂಕ್ ಪಟ್ಟಿಯಲ್ಲಿ ಸ್ಥಾನ ಪಡೆದ ಮಾತ್ರಕ್ಕೆ ಐಐಟಿಯಲ್ಲಿ ಸೀಟು ಖಚಿತವಾಗುವುದಿಲ್ಲ. ಏಕೆಂದರೆ 23 ಸಂಸ್ಥೆಗಳು ಒಟ್ಟಾಗಿ ಕೇವಲ 20,000 ಸೀಟುಗಳನ್ನು ನೀಡುತ್ತವೆ. ಆದರೆ ಐಐಟಿಗೆ ಪ್ರವೇಶ ಪಡೆಯದವರು ಇತರ ಪ್ರಮುಖ ಸಂಸ್ಥೆಗಳಲ್ಲಿ ಪ್ರವೇಶ ಪಡೆಯಲು ಅರ್ಹರಾಗಿರುತ್ತಾರೆ ಮತ್ತು ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎನ್ಐಟಿ) ಅಥವಾ ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆ (ಐಐಐಟಿ)ಯಲ್ಲಿ ಸೀಟು ಪಡೆಯುವ ಸಾಧ್ಯತೆಯಿದೆ.
ಈ ಸಂಬಂಧ ಇಂಡಿಯನ್ ಎಕ್ಸ್ಪ್ರೆಸ್ ಜೊತೆ ಮಾತನಾಡಿರುವ ತಜ್ಞರು, ‘10,000 ಮಹಿಳೆಯರು ಐಐಟಿಗೆ ಅರ್ಹತೆ ಪಡೆದುದನ್ನು STEM ಶಿಕ್ಷಣದಲ್ಲಿ ಲಿಂಗ ಸಮಾನತೆಯ ಮೈಲಿಗಲ್ಲು ಎಂದು ಕರೆದಿದ್ದಾರೆ. 2018ರಲ್ಲಿ ಪ್ರಾರಂಭವಾದ ಹೆಚ್ಚುವರಿ ಸೀಟುಗಳ ಯೋಜನೆಯ ನಂತರ ಪ್ರಮುಖ ಇಂಜಿನಿಯರಿಂಗ್ ಸಂಸ್ಥೆಗಳಲ್ಲಿ ಮಹಿಳೆಯರ ಭಾಗವಹಿಸುವಿಕೆ ಗಣನೀಯವಾಗಿ ಹೆಚ್ಚಾಗುತ್ತಿದೆ ಎಂದು ಇದು ತೋರಿಸುತ್ತದೆ. ಈ ಯೋಜನೆಯಲ್ಲಿ ಮಹಿಳೆಯರಿಗೆ ಮಾತ್ರ ಹೆಚ್ಚುವರಿ ಸೀಟುಗಳನ್ನು ಸೃಷ್ಟಿಸಲಾಗಿದ್ದು, ಐದು ವರ್ಷಗಳಲ್ಲಿ ಮಹಿಳೆಯರ ಪ್ರವೇಶವನ್ನು 20%ಕ್ಕೆ ಏರಿಸುವ ಗುರಿ ಹೊಂದಲಾಗಿದೆ.
ಅಂದಿನಿಂದ ಜೆಇಇ ಅಡ್ವಾನ್ಸ್ಡ್ ಪರೀಕ್ಷೆಯಲ್ಲಿ ಹುಡುಗಿಯರ ಯಶಸ್ಸು ದರ ನಿಧಾನವಾಗಿ ಹೆಚ್ಚಾಗುತ್ತಿದೆ. 2018ರಲ್ಲಿ ಪರೀಕ್ಷೆಗೆ ಹಾಜರಾದ ಹುಡುಗಿಯರಲ್ಲಿ ಕೇವಲ 13.47 ಪ್ರತಿಶತ ಮಾತ್ರ ಐಐಟಿ ಪ್ರವೇಶಕ್ಕೆ ಅರ್ಹತೆ ಪಡೆದಿದ್ದರು. ಈಗ ಈ ಸಂಖ್ಯೆ ಸುಮಾರು 25%ಗೆ ಏರಿದೆ.
ಜೆಇಇ-ಅಡ್ವಾನ್ಸ್ಡ್ 2018 ರ ಸಂಘಟನಾ ಅಧ್ಯಕ್ಷರಾಗಿದ್ದ ಐಐಟಿ ಕಾನ್ಪುರದ ಪ್ರೊಫೆಸರ್ ಶಲಭ್ ಅವರು ಮಾತನಾಡಿ, ‘ಸರ್ಕಾರ ನಿಗದಿಪಡಿಸಿದ 20% ಗುರಿಯನ್ನು ಮೀರಿ ಹುಡುಗಿಯರು ಐಐಟಿ ಶಿಕ್ಷಣದಲ್ಲಿ ಯಶಸ್ಸು ಸಾಧಿಸುವಲ್ಲಿ ಸಾಕಷ್ಟು ಸಾಮರ್ಥ್ಯವನ್ನು ಹೊಂದಿದ್ದಾರೆ ಎಂದು ತೋರಿಸಿದ್ದಾರೆ. ಎಷ್ಟು ಮಂದಿ ಅಂತಿಮವಾಗಿ ಐಐಟಿ ಸೀಟುಗಳನ್ನು ಪಡೆಯುತ್ತಾರೆ ಎನ್ನುವುದು ಇನ್ನೂ ತಿಳಿಯಬೇಕಿದ್ದರೂ, ಜೆಇಇ ಅಡ್ವಾನ್ಸ್ಡ್ನಲ್ಲಿ ಹೆಚ್ಚುತ್ತಿರುವ ಹುಡುಗಿಯರ ಸಂಖ್ಯೆ ಎಸ್ಟಿಇಎಂ ಕೋರ್ಸ್ಗಳಲ್ಲಿ ಮಹಿಳೆಯರ ಭಾಗವಹಿಸುವಿಕೆ ಹೆಚ್ಚಾಗುತ್ತಿರುವುದನ್ನು ತೋರಿಸುತ್ತದೆ’ ಎಂದು ಹೇಳಿದ್ದಾರೆ.
ಐಐಟಿ ಪ್ರವೇಶ ಪಡೆಯದವರೂ ಸಹ ತಮ್ಮ ಜೆಇಇ ಅಂಕಗಳನ್ನು ಬಳಸಿಕೊಂಡು ಎನ್ಐಟಿ ಅಥವಾ ಇತರ ಪ್ರಮುಖ ಸಂಸ್ಥೆಗಳಿಗೆ ಸೇರುವ ಸಾಧ್ಯತೆಯಿದೆ. ಇದು ವಿಶಾಲವಾದ ಸಾಮಾಜಿಕ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ, ಕುಟುಂಬಗಳು ಹುಡುಗಿಯರು ಯಾವುದೇ ಅಡೆತಡೆಗಳಿಲ್ಲದೆ ತಮ್ಮ ಆಯ್ಕೆಯ ವೃತ್ತಿಜೀವನವನ್ನು ಮುಂದುವರಿಸಲು ಪ್ರೋತ್ಸಾಹಿಸುತ್ತಿವೆ ಎಂದು ಅವರು ಹೇಳಿದರು.
New Delhi,Delhi
Jun 02, 2026 10:36 AM IST
