ಆದ್ರೆ ಇತ್ತೀಚೆಗೆ ವೈರಲ್ ಆದ ಒಂದು ವೀಡಿಯೊ ವಿದೇಶಿ ಕೆಲಸದ ಇನ್ನೊಂದು ಮುಖವನ್ನು ಪರಿಚಯಿಸಿದೆ.
ಕಂಟೆಂಟ್ ಕ್ರಿಯೇಟರ್ ದೋಲೇಶ್ ಅಗರ್ವಾಲ್ ಸೋಶಿಯಲ್ ಮೀಡಿಯಾದಲ್ಲಿ ವೀಡಿಯೊ ಹಂಚಿಕೊಂಡಿದ್ದು, ಜಪಾನ್ನಲ್ಲಿ ಕೆಲಸ ಮಾಡುತ್ತಿರುವ ಭಾರತೀಯ ಸಾಫ್ಟ್ವೇರ್ ಎಂಜಿನಿಯರ್ಗಳ ನಿಜವಾದ ಗಳಿಕೆಯ ಬಗ್ಗೆ ಈ ವೀಡಿಯೊ ಚರ್ಚೆಯನ್ನು ಹುಟ್ಟುಹಾಕಿದೆ.
ಈ ವೀಡಿಯೊ ಸಾಮಾಜಿಕ ಮಾಧ್ಯಮಗಳಲ್ಲಿ ದೊಡ್ಡ ಮಟ್ಟದಲ್ಲಿ ವೈರಲ್ ಕೂಡ ಆಗಿದೆ. ಇದರ ಬೆನ್ನಲ್ಲೇ “ವಿದೇಶದಲ್ಲಿ ಕೆಲಸ ಮಾಡುವುದು ನಿಜವಾಗಿಯೂ ಎಷ್ಟು ಲಾಭಕರ?” ಎಂಬ ಪ್ರಶ್ನೆ ಕೂಡ ಚರ್ಚೆಯಲ್ಲಿದೆ.
ವೀಡಿಯೊದಲ್ಲಿ ದೋಲೇಶ್ ಜಪಾನ್ನ ಒಂದು ಭಾರತೀಯ ರೆಸ್ಟೋರೆಂಟ್ನಲ್ಲಿ ಬೆಂಗಳೂರು ಮೂಲದ ಇಬ್ಬರು ಸಾಫ್ಟ್ವೇರ್ ಎಂಜಿನಿಯರ್ಗಳನ್ನು ಭೇಟಿ ಮಾಡುತ್ತಾರೆ. ಅವರ ಜೊತೆ ಮಾತನಾಡಿದಾಗ, ಜಪಾನ್ನ ಟೆಕ್ ಕ್ಷೇತ್ರದ ಆರಂಭಿಕ ಸಂಬಳದ ಬಗ್ಗೆ ಕೆಲವು ಗಮನಾರ್ಹ ವಿವರಗಳು ಹೊರಬಂದಿವೆ.
ಒಬ್ಬ ಫ್ರೆಶರ್ ಅಥವಾ ಆರಂಭಿಕ ಅನುಭವ ಹೊಂದಿರುವ ಎಂಜಿನಿಯರ್ಗೆ ವರ್ಷಕ್ಕೆ ಸುಮಾರು 3 ಮಿಲಿಯನ್ ಯೆನ್ ಸಂಬಳ ಸಿಗುತ್ತದೆ ಎಂದು ಅವರಿಬ್ಬರು ಹೇಳಿದರು. ಇದನ್ನು ಭಾರತೀಯ ಕರೆನ್ಸಿಗೆ ಪರಿವರ್ತಿಸಿದರೆ, ಸರಿಸುಮಾರು 17 ಲಕ್ಷ ರೂಪಾಯಿಗಳಿಗೆ ಸಮಾನವಾಗುತ್ತದೆ.
ಅನುಭವ ಹೆಚ್ಚಾದಂತೆ ಸಂಬಳದಲ್ಲೂ ಏರಿಕೆಯಾಗುತ್ತದೆ. ಸಾಮಾನ್ಯವಾಗಿ ಎರಡು ಅಥವಾ ಮೂರು ವರ್ಷಗಳ ಕೆಲಸದ ಅನುಭವ ಪಡೆದ ನಂತರ, ವಾರ್ಷಿಕ ಸಂಬಳವು 4.5 ರಿಂದ 5 ಮಿಲಿಯನ್ (ಭಾರತೀಯ ರೂಪಾಯಿಯಲ್ಲಿ ಸುಮಾರು 30 ಲಕ್ಷ) ಯೆನ್ಗೆ ಏರಿಕೆ ಕಾಣುತ್ತದೆ ಎಂದು ಅವರು ವಿವರಿಸಿದ್ದಾರೆ.
ಸ್ಯಾಲರಿ, ಪ್ಯಾಕೇಜ್ ಇದೆಲ್ಲಾ ಕೇಳೋಕೆ ಮಾತ್ರ ಚೆಂದ, ಆದ್ರೆ ನಿಜವಾದ ಆರ್ಥಿಕ ಸ್ಥಿತಿ ಇದಕ್ಕಿಂತ ಹೆಚ್ಚು ಸಂಕೀರ್ಣವಾಗಿದೆ ಎಂದು ಅವರಿಬ್ಬರು ಹೇಳಿದ್ದಾರೆ.
ಎಂಜಿನಿಯರ್ಗಳು ತಮ್ಮ ಆದಾಯದ ಮೇಲೆ ಭಾರೀ ಪ್ರಮಾಣದ ತೆರಿಗೆ ಪಾವತಿಸಬೇಕಾಗುತ್ತದೆ. ಇವರಿಬ್ಬರು ಪ್ರತಿ ವರ್ಷ ಸುಮಾರು 3 ಲಕ್ಷ ರೂಪಾಯಿ ತೆರಿಗೆ ಪಾವತಿಸುತ್ತಿರುವುದಾಗಿ ಹೇಳಿದ್ದಾರೆ.
ಸ್ಯಾಲರಿ ಜಾಸ್ತಿ ಇದ್ದರೂ ತೆರಿಗೆ ಭಾರ ಹೆಚ್ಚಿರೋದರಿಂದ, ಒಟ್ಟಾರೆ ಕೈಗೆ ಸಿಗುವ ಮೊತ್ತ ಗಣನೀಯವಾಗಿ ಕಡಿಮೆಯಾಗುತ್ತದೆ ಎಂಬ ವಾಸ್ತವವನ್ನು ಅವರು ಬಿಚ್ಚಿಟ್ಟಿದ್ದಾರೆ.
ಈ ಮಾಹಿತಿ ಸಾಮಾಜಿಕ ಮಾಧ್ಯಮದಲ್ಲಿ ಚರ್ಚೆಗೆ ಕಾರಣವಾಗಿದೆ. ಅನೇಕರು ಈ ಸಂಬಳದ ಅಂಕಿಅಂಶಗಳನ್ನು ಕೇಳಿ ಅಚ್ಚರಿಗೊಂಡರೆ, ಕೆಲವರು ಇದನ್ನು ಉತ್ತಮ ಸಂಬಳವೆಂದು ಹೇಳಿದ್ದಾರೆ. ಇತರರು ಜಪಾನ್ನಲ್ಲಿ ಜೀವನ ವೆಚ್ಚ ತುಂಬಾ ಹೆಚ್ಚು ಇರುವುದರಿಂದ, ಸೇವಿಂಗ್ಸ್ ಮಾಡೋದು ಕಷ್ಟ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಜಪಾನ್ನಲ್ಲಿ ಕೆಲಸ ಮಾಡುವ ಭಾರತೀಯ ಸಾಫ್ಟ್ವೇರ್ ಎಂಜಿನಿಯರ್ಗಳ ಸಂಬಳದ ಜೊತೆಗೆ ಅಲ್ಲಿನ ಕೆಲಸದ ಸಂಸ್ಕೃತಿಯೂ ಚರ್ಚೆಗೆ ಕಾರಣವಾಗಿದೆ.
ಸಾಮಾಜಿಕ ಮಾಧ್ಯಮದಲ್ಲಿ ಹಲವರು ಹೇಳುವಂತೆ, ಜಪಾನ್ನಲ್ಲಿ ಕೆಲಸದ ಗಂಟೆಗಳು ಸಾಮಾನ್ಯವಾಗಿ ದೀರ್ಘವಾಗಿದ್ದು, ಒವರ್ಟೈಮ್ ಸಂಸ್ಕೃತಿ ಹೆಚ್ಚು ಕಂಡುಬರುತ್ತದೆ ಎಂದಿದ್ದಾರೆ.
ಹೆಚ್ಚುವರಿ ಸಮಯ ಕೆಲಸ ಮಾಡುವುದು ಅನೇಕ ಕಂಪನಿಗಳಲ್ಲಿ ಸಾಮಾನ್ಯವಾಗಿದ್ದು, ಇದರಿಂದ ಕೆಲಸ-ಜೀವನ ಸಮತೋಲನ ಸಾಧಿಸುವುದು ವೃತ್ತಿಪರರಿಗೆ ಸವಾಲಾಗಿದೆ ಎಂದಿದ್ದಾರೆ.
