Govt Schools: 600 ಹಳ್ಳಿಗಳು, 1000 ಕಿಮೀ

Last Updated:May 20, 2026 9:01 PM IST

ಮಂಡ್ಯ ರೈತರು ಸರ್ಕಾರಿ ಕನ್ನಡ ಶಾಲೆಗಳ ಉಳಿವಿಗಾಗಿ 1000 ಕಿಮೀ ಪಾದಯಾತ್ರೆ, 600ಕ್ಕೂ ಹೆಚ್ಚು ಗ್ರಾಮ ಭೇಟಿ, ಸಿಬಿಎಸ್‍ಇ ದ್ವಿಭಾಷಾ ಪಠ್ಯ, ನವೋದಯ ಮಾದರಿ, ನೌಕರರ ಮಕ್ಕಳಿಗೆ ಸರ್ಕಾರಿ ಶಾಲೆ ಕಡ್ಡಾಯ ಬೇಡಿಕೆ

ಇಲ್ಲಿ ವಿಡಿಯೋ ನೋಡಿ

ಮಂಡ್ಯ: ಸಕ್ಕರೆ ನಾಡು ಮಂಡ್ಯದಲ್ಲಿ (Mandya) ಈಗೊಂದು ಅಭೂತಪೂರ್ವ ಇತಿಹಾಸ ಸೃಷ್ಟಿಯಾಗಿದೆ. ಕನ್ನಡ ಶಾಲೆಗಳನ್ನು (Kannada Schools) ಉಳಿಸಲೇಬೇಕು ಎಂದು ಪಣತೊಟ್ಟಿರುವ ಮಂಡ್ಯದ ರೈತರು (Farmers) ಇಡೀ ರಾಜ್ಯವೇ ತಿರುಗಿ ನೋಡುವಂತಹ ವಿನೂತನ ಹೋರಾಟಕ್ಕೆ ದುಮುಕಿದ್ದಾರೆ. ‘ಸರ್ಕಾರಿ ಶಾಲೆ (Govt School) ನನ್ನವ್ವ’ ಎಂಬ ಮನಕಲಕುವ ಘೋಷವಾಕ್ಯದೊಂದಿಗೆ ಆರಂಭವಾಗಿರುವ ಈ ಕಾಲ್ನಡಿಗೆ ಪಾದಯಾತ್ರೆ, ಬರೋಬ್ಬರಿ 1,000 ಕಿಲೋಮೀಟರ್ ಕ್ರಮಿಸುವ ಮೂಲಕ ಹೋರಾಟದ ಇತಿಹಾಸದಲ್ಲೇ ಹೊಸ ಅಧ್ಯಾಯ ಬರೆದಿದೆ.

ಸರ್ಕಾರಿ ಶಾಲೆ ನನ್ನವ್ವ

ಕಳೆದ 37 ದಿನಗಳಿಂದ ಮಳೆಯನ್ನದೆ, ಬಿಸಿಲನ್ನದೇ ನಿರಂತರವಾಗಿ ಸಾಗುತ್ತಿರುವ ಈ ಪಾದಯಾತ್ರೆ ಈಗಾಗಲೇ 600ಕ್ಕೂ ಹೆಚ್ಚು ಗ್ರಾಮಗಳನ್ನು ತಲುಪಿದೆ. ಮಂಡ್ಯ ಜಿಲ್ಲೆಯ ಒಟ್ಟು 233 ಗ್ರಾಮ ಪಂಚಾಯತಿಗಳ ವ್ಯಾಪ್ತಿಯ ಸುಮಾರು 1,000 ಹಳ್ಳಿಗಳಲ್ಲಿ ಸಂಚರಿಸುವ ದೊಡ್ಡ ಗುರಿ ಇಟ್ಟುಕೊಳ್ಳಲಾಗಿದೆ. ಪ್ರತಿ ಹಳ್ಳಿಗೂ ಭೇಟಿ ನೀಡುತ್ತಿರುವ ರೈತ ಮುಖಂಡರು, ಅಲ್ಲಿನ ಪೋಷಕರಲ್ಲಿ ಸರ್ಕಾರಿ ಶಾಲೆಗಳ ಮಹತ್ವವನ್ನು ಮನವರಿಕೆ ಮಾಡಿಕೊಡುತ್ತಿದ್ದಾರೆ ಹಾಗೂ ತಮ್ಮ ಮಕ್ಕಳನ್ನು ಸರ್ಕಾರಿ ಶಾಲೆಗೇ ಸೇರಿಸುವಂತೆ ಜಾಗೃತಿ ಮೂಡಿಸುತ್ತಿದ್ದಾರೆ.

ಹೋರಾಟಗಾರರ ಪ್ರಮುಖ ಬೇಡಿಕೆಗಳು

ಈ ಹೋರಾಟ ಕೇವಲ ನಡಿಗೆಗೆ ಸೀಮಿತವಾಗಿಲ್ಲ, ಬದಲಿಗೆ ಸರ್ಕಾರದ ಮುಂದೆ ಕೆಲವು ಗಟ್ಟಿ ಬೇಡಿಕೆಗಳನ್ನು ಇಟ್ಟಿದೆ.

ಸಿಬಿಎಸ್‍ಇ ಸಿಲಬಸ್- ರಾಜ್ಯದ ಎಲ್ಲಾ 41,905 ಸರ್ಕಾರಿ ಶಾಲೆಗಳಲ್ಲೂ ಎಲ್‍ಕೆಜಿಯಿಂದ 5ನೇ ತರಗತಿವರೆಗೆ ದ್ವಿಭಾಷಾ ಹಾಗೂ ಸಿಬಿಎಸ್‍ಇ ಪಠ್ಯಕ್ರಮದಲ್ಲಿ ಶಿಕ್ಷಣ ನೀಡಬೇಕು.

ನವೋದಯ ಮಾದರಿ- ಪ್ರತಿ ಸರ್ಕಾರಿ ಶಾಲೆಯಲ್ಲೂ 6 ರಿಂದ 12ನೇ ತರಗತಿವರೆಗೆ ನವೋದಯ ಮಾದರಿಯ ಉಚಿತ ಶಿಕ್ಷಣ ಸಿಗಬೇಕು.

ಕಡ್ಡಾಯ ನಿಯಮ- ಸರ್ಕಾರಿ ನೌಕರರ ಮಕ್ಕಳು ಕಡ್ಡಾಯವಾಗಿ ಸರ್ಕಾರಿ ಶಾಲೆಗಳಲ್ಲೇ ಓದಬೇಕು.

ಜೂನ್ 6ಕ್ಕೆ ಮಹಾ ಸಮಾರೋಪ

ಈಗಾಗಲೇ ಸಾರ್ವಜನಿಕರಲ್ಲಿ ದೊಡ್ಡ ಆಶಾಭಾವನೆ ಮೂಡಿಸಿರುವ ಈ ಪಾದಯಾತ್ರೆ ಜೂನ್ 6 ರಂದು ಅಂತ್ಯಗೊಳ್ಳಲಿದೆ. ಅಂದು ಮಂಡ್ಯದ ಇಂಡುವಾಳು ಗ್ರಾಮದಿಂದ ಮಂಡ್ಯ ನಗರದವರೆಗೆ ಬೃಹತ್ ‘ಪಂಜಿನ ಮೆರವಣಿಗೆ’ ನಡೆಯಲಿದ್ದು, ಹೋರಾಟದ ತೀವ್ರತೆಯನ್ನು ಸರ್ಕಾರಕ್ಕೆ ತಲುಪಿಸಲಿದೆ. ರೈತರ ಈ ಮಹಾ ಯಜ್ಞಕ್ಕೆ ಸರ್ಕಾರ ಹೇಗೆ ಸ್ಪಂದಿಸಲಿದೆ ಎಂಬುದನ್ನು ಇಡೀ ಕರ್ನಾಟಕವೇ ಕಾದು ನೋಡುತ್ತಿದೆ.

Location :

Mandya,Mandya,Karnataka

Source link