Last Updated:
NTA ಯುಜಿಸಿ ನೆಟ್ ಡಿಸೆಂಬರ್ 2025 ಪರೀಕ್ಷಾ ವೇಳಾಪಟ್ಟಿ ಪ್ರಕಟ, 85 ವಿಷಯಗಳಿಗೆ ದಿನಾಂಕ ಹಾಗೂ ಶಿಫ್ಟ್ ವಿವರಗಳು, ಅಧಿಕೃತ ಮಾಹಿತಿ ಮತ್ತು ಪಠ್ಯಕ್ರಮ ಇಲ್ಲಿದೆ.
ದೆಹಲಿ: ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ಯುಜಿಸಿ ನೆಟ್ ಡಿಸೆಂಬರ್ 2025 ಪರೀಕ್ಷೆಯ ವಿಷಯವಾರು ಪರೀಕ್ಷಾ ವೇಳಾಪಟ್ಟಿಯನ್ನು (Exam Time Tabale) ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ಈ ಪರೀಕ್ಷೆಗಳು ಡಿಸೆಂಬರ್ 31, 2025 ರಿಂದ ಪ್ರಾರಂಭವಾಗಿ ಜನವರಿ 7, 2026 ರವರೆಗೆ ನಡೆಯಲಿವೆ. ಕಂಪ್ಯೂಟರ್ ಆಧಾರಿತ ಪರೀಕ್ಷೆ (CBT) ಮೋಡ್ನಲ್ಲಿ ನಡೆಯುವ ಈ ಯುಜಿಸಿ ನೆಟ್ ಪರೀಕ್ಷೆ 85 ವಿಷಯಗಳನ್ನು ಒಳಗೊಂಡಿದ್ದು, ದೇಶದ ಲಕ್ಷಾಂತರ ಅಭ್ಯರ್ಥಿಗಳಿಗೆ ಜೂನಿಯರ್ ರಿಸರ್ಚ್ ಫೆಲೋಶಿಪ್ (JRF), ಸಹಾಯಕ ಪ್ರಾಧ್ಯಾಪಕರ ಅರ್ಹತೆ ಮತ್ತು ಪಿಎಚ್ಡಿ ಪ್ರವೇಶಕ್ಕೆ ಪ್ರಮುಖ ಹಂತವಾಗಿದೆ. ಈ ಕುರಿತು ಸಂಪೂರ್ಣ ಮಾಹಿತಿ ಇಲ್ಲಿದೆ.
ಎರಡೂ ಶಫ್ಟ್ನಲ್ಲಿ ಪರೀಕ್ಷೆ!
UGC NET 2025 ಪರೀಕ್ಷೆಯನ್ನು ಪ್ರತಿದಿನ ಎರಡು ಶಿಫ್ಟ್ಗಳಲ್ಲಿ ನಡೆಸಲಾಗುತ್ತದೆ. ಮೊದಲ ಶಿಫ್ಟ್ ಬೆಳಿಗ್ಗೆ 9:00 ರಿಂದ ಮಧ್ಯಾಹ್ನ 12:00 ರವರೆಗೆ ನಡೆಯಲಿದ್ದು, ಎರಡನೇ ಶಿಫ್ಟ್ ಮಧ್ಯಾಹ್ನ 3:00 ರಿಂದ ಸಂಜೆ 6:00 ರವರೆಗೆ ನಡೆಯಲಿದೆ. ಪೇಪರ್–1 ಮತ್ತು ಪೇಪರ್–2 ಎರಡೂ ಒಂದೇ ಶಿಫ್ಟ್ನಲ್ಲಿ ನಡೆಯುತ್ತವೆ. ಅಭ್ಯರ್ಥಿಗಳು ತಮ್ಮ ವಿಷಯಕ್ಕೆ ಸಂಬಂಧಿಸಿದ ದಿನಾಂಕ ಮತ್ತು ಶಿಫ್ಟ್ ಮಾಹಿತಿಯನ್ನು ಅಧಿಕೃತ ವೆಬ್ಸೈಟ್ ugcnet.nta.nic.in ನಲ್ಲಿ ಪರಿಶೀಲಿಸಬಹುದು.
ಡಿಸೆಂಬರ್ 31ರಂದು ಕಾನೂನು, ಸಮಾಜ ಸೇವೆ, ತೆಲುಗು, ಪ್ರವಾಸೋದ್ಯಮ ನಿರ್ವಹಣೆ ಸೇರಿದಂತೆ ಹಲವು ಭಾಷಾ ವಿಷಯಗಳ ಪರೀಕ್ಷೆಗಳು ನಡೆಯಲಿವೆ. ಜನವರಿ 2ರಿಂದ ಕಂಪ್ಯೂಟರ್ ವಿಜ್ಞಾನ, ಗ್ರಂಥಾಲಯ ವಿಜ್ಞಾನ, ಸಮಾಜಶಾಸ್ತ್ರ, ಮನೋವಿಜ್ಞಾನ, ಯೋಗ ಮುಂತಾದ ಪ್ರಮುಖ ವಿಷಯಗಳು ಪರೀಕ್ಷೆಗೆ ಒಳಗಾಗಲಿವೆ. ಜನವರಿ 3, 5, 6 ಮತ್ತು 7ರಂದು ವಾಣಿಜ್ಯ, ಭೂಗೋಳ, ಇಂಗ್ಲಿಷ್, ಇತಿಹಾಸ, ರಾಜಕೀಯ ವಿಜ್ಞಾನ, ಹಿಂದಿ, ಕನ್ನಡ, ಅರ್ಥಶಾಸ್ತ್ರ, ನಿರ್ವಹಣೆ, ಪರಿಸರ ವಿಜ್ಞಾನ ಸೇರಿದಂತೆ ಬಹುತೇಕ ಪ್ರಮುಖ ವಿಷಯಗಳ ಪರೀಕ್ಷೆಗಳು ನಡೆಯಲಿವೆ.
ಈ ನಡುವೆ, ಯುಜಿಸಿ ನೆಟ್ ಡಿಸೆಂಬರ್ 2025 ನಗರ ಮಾಹಿತಿ ಚೀಟಿಯನ್ನು ಪರೀಕ್ಷೆಗೆ ಸುಮಾರು 10 ದಿನಗಳ ಮುಂಚಿತವಾಗಿ ಬಿಡುಗಡೆ ಮಾಡಲಾಗುತ್ತದೆ ಎಂದು NTA ಸ್ಪಷ್ಟಪಡಿಸಿದೆ. ಡಿಸೆಂಬರ್ 17, 2025 ರಂದು ಹೊರಡಿಸಲಾದ ಅಧಿಸೂಚನೆಯಂತೆ, ಈ ನಗರ ಮಾಹಿತಿ ಚೀಟಿಯಿಂದ ಅಭ್ಯರ್ಥಿಗಳು ತಮ್ಮ ಪರೀಕ್ಷಾ ನಗರವನ್ನು ಮುಂಚಿತವಾಗಿ ತಿಳಿದುಕೊಂಡು ಪ್ರಯಾಣ ಮತ್ತು ವಸತಿ ವ್ಯವಸ್ಥೆಯನ್ನು ಯೋಜಿಸಿಕೊಳ್ಳಬಹುದು.
UGC NET ಪಠ್ಯಕ್ರಮವನ್ನು ಪ್ರತಿಯೊಂದು ವಿಷಯಕ್ಕೂ ಪ್ರತ್ಯೇಕವಾಗಿ ಪ್ರಕಟಿಸಲಾಗಿದ್ದು, ಅಭ್ಯರ್ಥಿಗಳು ಸಂಪೂರ್ಣ ಸಿದ್ಧತಿಗಾಗಿ ಅಧಿಕೃತ ಪಠ್ಯಕ್ರಮದ ಪಿಡಿಎಫ್ ಅನ್ನು ಡೌನ್ಲೋಡ್ ಮಾಡಿಕೊಳ್ಳಬಹುದು. ಯುಜಿಸಿ ನೆಟ್ ಪರೀಕ್ಷೆಯನ್ನು ವರ್ಷಕ್ಕೆ ಎರಡು ಬಾರಿ ಜೂನ್ ಮತ್ತು ಡಿಸೆಂಬರ್ ಅವಧಿಯಲ್ಲಿ ನಡೆಸಲಾಗುತ್ತದೆ. ದೇಶದ ವಿಶ್ವವಿದ್ಯಾಲಯಗಳು ಮತ್ತು ಉನ್ನತ ಶಿಕ್ಷಣ ಸಂಸ್ಥೆಗಳಲ್ಲಿ ಅಕಾಡೆಮಿಕ್ ವೃತ್ತಿ ಗುರಿಯಾಗಿಟ್ಟುಕೊಂಡಿರುವ ಅಭ್ಯರ್ಥಿಗಳಿಗೆ ಈ ಪರೀಕ್ಷೆ ಅತ್ಯಂತ ಮಹತ್ವದ್ದಾಗಿದೆ.
Bangalore [Bangalore],Bangalore,Karnataka
