Last Updated:
ಉದ್ಯೋಗ ಕಡಿತಗಳ ನಡುವೆಯೂ ಅಮೆಜಾನ್ ತನ್ನ ಲಾಜಿಸ್ಟಿಕ್ಸ್ ಮತ್ತು ರೊಬೊಟಿಕ್ಸ್ ತಂತ್ರಜ್ಞಾನವನ್ನು ಮುಂದುವರಿಸಲು ಬದ್ಧವಾಗಿದೆ. ಕಂಪನಿ ಈಗ ಹೆಚ್ಚು ಪರಿಣಾಮಕಾರಿ ಮತ್ತು ಮಾಡ್ಯುಲರ್ ಗೋದಾಮು ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸುವತ್ತ ಗಮನ ಹರಿಸುತ್ತಿದೆ. ವೆಚ್ಚ ನಿಯಂತ್ರಣ, ತಂತ್ರಜ್ಞಾನ ಪರಿವರ್ತನೆ ಮತ್ತು ವೇಗವಾದ ವಿತರಣಾ ವ್ಯವಸ್ಥೆ ನಿರ್ಮಾಣದ ಮೂಲಕ ತನ್ನ ಗ್ಲೋಬಲ್ ಲಾಜಿಸ್ಟಿಕ್ಸ್ ಜಾಲವನ್ನು ಮತ್ತಷ್ಟು ಬಲಪಡಿಸುವುದು ಕಂಪನಿಯ ಮುಂದಿನ ಗುರಿಯಾಗಿದೆ.
ಜಾಗತಿಕ ಇ-ಕಾಮರ್ಸ್ ದಿಗ್ಗಜ ಅಮೆಜಾನ್ (Amazon) ಕಳೆದ ಕೆಲವು ವರ್ಷಗಳಿಂದ ದೊಡ್ಡ ಮಟ್ಟದಲ್ಲಿ ಉದ್ಯೋಗಗಳಿಗೆ 9Jobs) ಗೇಟ್ಪಾಸ್ ನೀಡುತ್ತಲೇ ಬಂದಿದೆ. ಕೋವಿಡ್ ಸಮಯದಲ್ಲಿ(Covid Time) ಭಾರೀ ಪ್ರಮಾಣದಲ್ಲಿ ಸಿಬ್ಬಂದಿಯನ್ನು ನೇಮಕ (Requirement) ಮಾಡಿಕೊಂಡಿದ್ದ ಕಂಪನಿ ಈಗ ಅದೇ ಉದ್ಯೋಗಿಗಳನ್ನು ಮುಲಾಜಿಲ್ಲದೇ ಮನೆಗೆ ಕಳುಹಿಸುತ್ತಿದೆ. ಬನ್ನಿ ಅಲ್ಲಿನ ಉದ್ಯೋಗದ ಕುರಿತು ತಿಳಿದುಕೊಳ್ಳೋಣ.
ಮತ್ತೆ 100ಕ್ಕೂ ಹೆಚ್ಚು ಸಿಬ್ಬಂದಿಗೆ ಗೇಟ್ಪಾಸ್!
ಅಮೆಜಾನ್ನಲ್ಲಿ ಮತ್ತೊಂದು ದೊಡ್ಡ ಉದ್ಯೋಗ ಕಡಿತವಾಗಿದ್ದು, ರೊಬೊಟಿಕ್ಸ್ ವಿಭಾಗದಲ್ಲಿ ಉದ್ಯೋಗಿಗಳ ವಜಾ ನಡೆದಿದೆ.ಕಳೆದ ಮೂರು ವರ್ಷಗಳಲ್ಲಿ 57,000ಕ್ಕೂ ಹೆಚ್ಚು ಕಾರ್ಪೊರೇಟ್ ಉದ್ಯೋಗಗಳನ್ನು ಕಡಿತಗೊಳಿಸಿರುವ ಕಂಪನಿ, ಇದೀಗ ಗೋದಾಮು ಯಾಂತ್ರೀಕರಣ ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸುವ ಘಟಕದಲ್ಲಿಯೂ ಸುಮಾರು 100ಕ್ಕೂ ಹೆಚ್ಚು ವೈಟ್-ಕಾಲರ್ ಉದ್ಯೋಗಿಗಳನ್ನು ವಜಾಗೊಳಿಸಿದೆ.
ವೆಚ್ಚ ಕಡಿತ ಮತ್ತು ಸಂಸ್ಥೆಯ ಪುನರ್ರಚನೆಯ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದ್ದು, ಕಂಪನಿ ತನ್ನ ಕಾರ್ಯಾಚರಣೆಯನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ರೂಪಿಸಲು ಪ್ರಯತ್ನಿಸುತ್ತಿದೆ ಎಂದು ರೊಬೊಟಿಕ್ಸ್ ಉಪಾಧ್ಯಕ್ಷ ಸ್ಕಾಟ್ ಡ್ರೆಸೆರ್ ಹೇಳಿದ್ದಾರೆ. ವಜಾಗೊಂಡ ಉದ್ಯೋಗಿಗಳಿಗೆ ಸವರೆನ್ಸ್ ಪೇ, ಆರೋಗ್ಯ ವಿಮೆ ಹಾಗೂ ಹೊಸ ಉದ್ಯೋಗಕ್ಕಾಗಿ ಸಹಾಯ ಒದಗಿಸಲಾಗುತ್ತದೆ ಎಂದು ಅಮೆಜಾನ್ ಕಂಪನಿ ತಿಳಿಸಿದೆ.
ಅಮೆಜಾನ್ನಲ್ಲಿ ನಡೆಯುತ್ತಲೇ ಇದೆ ಉದ್ಯೋಗ ಕಡಿತ!
ಈ ಹೊಸ ಉದ್ಯೋಗ ಕಡಿತವು ಕಳೆದ ಕೆಲವು ತಿಂಗಳಿನಿಂದ ಅಮೆಜಾನ್ನಲ್ಲಿ ನಡೆಯುತ್ತಿರುವ ವೆಚ್ಚ ಕಡಿತ ಅಭಿಯಾನದ ಭಾಗವಾಗಿದೆ. ಕಂಪನಿಯ ಸಿಇಒ ಆಂಡಿ ಜೆಸ್ಸಿ ನೇತೃತ್ವದಲ್ಲಿ ಸಂಸ್ಥೆಯನ್ನು ಹೆಚ್ಚು ಪರಿಣಾಮಕಾರಿ ಮಾಡಲು ನಿರ್ವಹಣಾ ಪದರಗಳನ್ನು ಕಡಿಮೆ ಮಾಡುವ ಮತ್ತು ಅಧಿಕಾರಶಾಹಿಯನ್ನು ಇಳಿಸುವ ಪ್ರಯತ್ನ ನಡೆಯುತ್ತಿದೆ.
2025ರ ಅಕ್ಟೋಬರ್ನಲ್ಲಿ ಸುಮಾರು 14,000 ಉದ್ಯೋಗ ಕಡಿತ!
2026ರ ಜನವರಿಯಲ್ಲಿ 16,000 ಕಾರ್ಪೊರೇಟ್ ಉದ್ಯೋಗಗಳು ಕಡಿತ ಮಾಡಲಾಗಿದೆ. ಇದೀಗ ರೊಬೊಟಿಕ್ಸ್ ವಿಭಾಗದಲ್ಲಿ 100ಕ್ಕೂ ಹೆಚ್ಚು ಉದ್ಯೋಗಗಳನ್ನು ತೆಗೆದುಹಾಕಲಾಗಿದೆ. 2022ರ ಅಂತ್ಯದಿಂದಲೂ ಒಟ್ಟಾರೆ 57,000ಕ್ಕೂ ಹೆಚ್ಚು ಕಾರ್ಪೊರೇಟ್ ಉದ್ಯೋಗಗಳನ್ನು ಅಮೆಜಾನ್ ಕಡಿತಗೊಳಿಸಿದೆ. ಕೋವಿಡ್ ಸಾಂಕ್ರಾಮಿಕದ ಸಮಯದಲ್ಲಿ ಭಾರೀ ಪ್ರಮಾಣದಲ್ಲಿ ನೇಮಕಾತಿ ನಡೆದ ನಂತರ ಕಂಪನಿ ತನ್ನ ಸಿಬ್ಬಂದಿ ಸಂಖ್ಯೆಯನ್ನು ಸಮತೋಲನಗೊಳಿಸಲು ಈ ಕ್ರಮಗಳನ್ನು ಕೈಗೊಳ್ಳುತ್ತಿದೆ.
ರೊಬೊಟಿಕ್ಸ್ ವಿಭಾಗದ ಮಹತ್ವ!
ಅಮೆಜಾನ್ನ ಲಾಜಿಸ್ಟಿಕ್ಸ್ ಕಾರ್ಯಾಚರಣೆಯಲ್ಲಿ ರೊಬೊಟಿಕ್ಸ್ ವಿಭಾಗವು ಪ್ರಮುಖ ಪಾತ್ರ ವಹಿಸುತ್ತದೆ. 2012ರಲ್ಲಿ ಕಂಪನಿ ಗೋದಾಮು ಯಾಂತ್ರೀಕರಣ ತಂತ್ರಜ್ಞಾನ ಅಭಿವೃದ್ಧಿಪಡಿಸಿದ ಕಿವಾ ಸಿಸ್ಟಮ್ ಅನ್ನು ಸ್ವಾಧೀನಪಡಿಸಿಕೊಂಡ ನಂತರ ಈ ವಿಭಾಗ ವೇಗವಾಗಿ ಬೆಳೆಯಿತು. ಇಂದಿಗೆ ಅಮೆಜಾನ್ನ ಗೋದಾಮುಗಳಲ್ಲಿ ರೋಬೋಟ್ಗಳು ಪ್ಯಾಕೇಜ್ಗಳನ್ನು ಸಾಗಿಸುವುದು, ವಿಂಗಡಿಸುವುದು ಹಾಗೂ ಪಿಕಿಂಗ್ ಪ್ರಕ್ರಿಯೆಗಳನ್ನು ವೇಗಗೊಳಿಸುವಲ್ಲಿ ಪ್ರಮುಖವಾಗಿ ಬಳಸಲ್ಪಡುತ್ತಿವೆ. 2025ರ ಮಧ್ಯಭಾಗದ ವೇಳೆಗೆ ಕಂಪನಿಯು ತನ್ನ ಗೋದಾಮು ಜಾಲದಲ್ಲಿ ಒಂದು ಮಿಲಿಯನ್ಗಿಂತ ಹೆಚ್ಚು ರೋಬೋಟ್ಗಳನ್ನು ಬಳಸುತ್ತಿದೆ ಎಂದು ತಿಳಿಸಿತ್ತು.
‘ಬ್ಲೂ ಜೇ’ ಯೋಜನೆ ಸ್ಥಗಿತ!
ಇತ್ತೀಚಿನ ಉದ್ಯೋಗ ಕಡಿತಕ್ಕೆ ಮತ್ತೊಂದು ಕಾರಣ ಕಂಪನಿಯ ತಂತ್ರಜ್ಞಾನ ದಿಕ್ಕಿನ ಬದಲಾವಣೆ. ಅಮೆಜಾನ್ ಕಳೆದ ವರ್ಷ ಪರಿಚಯಿಸಿದ್ದ “ಬ್ಲೂ ಜೇ” ಎಂಬ ಸೀಲಿಂಗ್ಗೆ ಅಳವಡಿಸಲಾದ ಬಹು-ಬಾಹು ರೋಬೋಟ್ ಯೋಜನೆಯನ್ನು ಈಗ ಸ್ಥಗಿತಗೊಳಿಸಿದೆ. ಹೆಚ್ಚಿನ ವೆಚ್ಚ, ಉತ್ಪಾದನಾ ಸಂಕೀರ್ಣತೆ ಹಾಗೂ ನೈಜ ಗೋದಾಮುಗಳಲ್ಲಿ ಅನುಷ್ಠಾನಗೊಳಿಸುವಲ್ಲಿ ಎದುರಾದ ಸಮಸ್ಯೆಗಳ ಕಾರಣ ಈ ಯೋಜನೆಗೆ ಫುಲ್ಸ್ಟಾಪ್ ಇಡಲಾಗಿದೆ. ಇದರ ಪರಿಣಾಮವಾಗಿ, ಈ ಯೋಜನೆಯಲ್ಲಿ ಕೆಲಸ ಮಾಡುತ್ತಿದ್ದ ಸಿಬ್ಬಂದಿಯನ್ನು ಕಂಪನಿಯ ಇತರ ರೊಬೊಟಿಕ್ಸ್ ಯೋಜನೆಗಳಿಗೆ ವರ್ಗಾಯಿಸಲಾಗಿದೆ.
ಮುಂದಿನ ಆಯ್ಕೆ ಏನು?
ಉದ್ಯೋಗ ಕಡಿತಗಳ ನಡುವೆಯೂ ಅಮೆಜಾನ್ ತನ್ನ ಲಾಜಿಸ್ಟಿಕ್ಸ್ ಮತ್ತು ರೊಬೊಟಿಕ್ಸ್ ತಂತ್ರಜ್ಞಾನವನ್ನು ಮುಂದುವರಿಸಲು ಬದ್ಧವಾಗಿದೆ. ಕಂಪನಿ ಈಗ ಹೆಚ್ಚು ಪರಿಣಾಮಕಾರಿ ಮತ್ತು ಮಾಡ್ಯುಲರ್ ಗೋದಾಮು ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸುವತ್ತ ಗಮನ ಹರಿಸುತ್ತಿದೆ. ವೆಚ್ಚ ನಿಯಂತ್ರಣ, ತಂತ್ರಜ್ಞಾನ ಪರಿವರ್ತನೆ ಮತ್ತು ವೇಗವಾದ ವಿತರಣಾ ವ್ಯವಸ್ಥೆ ನಿರ್ಮಾಣದ ಮೂಲಕ ತನ್ನ ಗ್ಲೋಬಲ್ ಲಾಜಿಸ್ಟಿಕ್ಸ್ ಜಾಲವನ್ನು ಮತ್ತಷ್ಟು ಬಲಪಡಿಸುವುದು ಕಂಪನಿಯ ಮುಂದಿನ ಗುರಿಯಾಗಿದೆ.
Bangalore [Bangalore],Bangalore,Karnataka
Amazon Lays Off Over 100 Employees: ಅಮೆಜಾನ್ನಲ್ಲಿ ಮತ್ತೆ ಉದ್ಯೋಗ ಕಡಿತ ಶಾಕ್: 3 ವರ್ಷದಲ್ಲಿ 57 ಸಾವಿರ ಸಿಬ್ಬಂದಿಗೆ ಗೇಟ್ಪಾಸ್!
