Success Story: ಲಂಡನ್‌ನಲ್ಲಿ ಐಐಟಿ ಪದವೀಧರೆಯ ಪಾನಿ ಪುರಿ ಕರಾಮತ್ತು: ಕಾರ್ಪೊರೇಟ್ ಕೆಲಸ ಬಿಟ್ಟು 'ಸಪ್ಪರ್ ಕ್ಲಬ್' ಶುರು ಮಾಡಿದ ದಂಪತಿಯ ಸ್ಪೂರ್ತಿದಾಯಕ ಕಥೆ

ಅಂಕಿತಾ ಖಾಂತೆ ಮೂಲತಃ ಮಹಾರಾಷ್ಟ್ರದ ನಾಗ್ಪುರದವರು. ಅವರು ವಿಎನ್‌ಐಟಿ ನಾಗ್ಪುರದಲ್ಲಿ ಆರ್ಕಿಟೆಕ್ಚರ್ ಪದವಿ ಪಡೆದು, ನಂತರ ಐಐಟಿ ಗುವಾಹಟಿಯಲ್ಲಿ ಡಿಸೈನ್‌ನಲ್ಲಿ ಸ್ನಾತಕೋತ್ತರ ಶಿಕ್ಷಣ ಪಡೆದರು. ಲಂಡನ್‌ಗೆ ತೆರಳುವ ಮೊದಲು ಬೆಂಗಳೂರಿನ ಸ್ಯಾಮ್‌ಸಂಗ್ ರಿಸರ್ಚ್ ಸೆಂಟರ್‌ನಲ್ಲಿ ಪ್ರಾಡಕ್ಟ್ ಡಿಸೈನರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಅವರ ಪತಿ ಅಮನ್ ಕೃಷ್ಣ ಕೂಡ ಐಐಟಿ ಧನ್‌ಬಾದ್ ಹಾಗೂ ಐಐಟಿ ಹೈದರಾಬಾದ್‌ನಲ್ಲಿ ಕಂಪ್ಯೂಟರ್ ಸೈನ್ಸ್ ಅಧ್ಯಯನ ಮಾಡಿದವರು. ಉನ್ನತ ಶಿಕ್ಷಣ ಮತ್ತು ಉತ್ತಮ ಉದ್ಯೋಗದ ಹಿನ್ನಲೆ ಇದ್ದರೂ, ಇಬ್ಬರೂ ವಿಭಿನ್ನ ಕನಸನ್ನು ಹಿಂಬಾಲಿಸಿದರು.

ಲಂಡನ್‌ಗೆ ಹೋಗಿದ ಹೊಸ ದಿನಗಳಲ್ಲಿ ಅಂಕಿತಾರಿಗೆ ಅಲ್ಲಿನ ಜೀವನಶೈಲಿ ಮತ್ತು ಜನರ ಜೊತೆ ಬೆರೆಯುವುದು ಕಷ್ಟವಾಯಿತು. ಆಗ ಅವರಿಗೆ ಭಾರತೀಯ ಆಹಾರ ಮತ್ತು ಸಂಸ್ಕೃತಿಯ ಮೂಲಕ ಜನರನ್ನು ಒಂದಾಗಿಸುವ ಯೋಚನೆ ಮೂಡಿತು. ಇದೇ ಆಲೋಚನೆಯಿಂದ ಹುಟ್ಟಿದ್ದು ದ ಬೌಜಿ ಕ್ಲಬ್ ಎಂಬ ಸಪ್ಪರ್ ಕ್ಲಬ್. ಇದು ಸಾಮಾನ್ಯ ಹೋಟೆಲ್ ಮಾದರಿ ಅಲ್ಲ, ಬದಲಾಗಿ ಮನೆಯ ವಾತಾವರಣದಲ್ಲಿ ಅಪರಿಚಿತರು ಸೇರಿ ಊಟ ಮಾಡುವ ವಿಶಿಷ್ಟ ಪರಿಕಲ್ಪನೆ.

ಈ ಕ್ಲಬ್‌ನಲ್ಲಿ ಅಂಕಿತಾ 7 ಬಗೆಯ ಭಾರತೀಯ ಶೈಲಿಯ ಊಟವನ್ನು ಸಿದ್ಧಪಡಿಸುತ್ತಾರೆ. ಕಾರ್ಯಕ್ರಮದ ಪ್ರಮುಖ ಆಕರ್ಷಣೆ ಪಾನಿ ಪುರಿ. ಇದನ್ನು ಕೇವಲ ತಿಂಡಿಯಾಗಿ ಅಲ್ಲ, ಜನರ ನಡುವೆ ಮಾತುಕತೆ ಆರಂಭಿಸುವ ಸಾಧನವಾಗಿ ಬಳಸುತ್ತಾರೆ. ಪಾನಿ ಪುರಿ ತಿನ್ನುತ್ತಾ ಅತಿಥಿಗಳು ತಮ್ಮ ಪರಿಚಯ ಮಾಡಿಕೊಂಡು ಸ್ನೇಹ ಬೆಳೆಸಿಕೊಳ್ಳುತ್ತಾರೆ. ಭಾರತೀಯ ರುಚಿ ಮತ್ತು ಆತಿಥ್ಯ ಲಂಡನ್ ಜನರಿಗೆ ಹೊಸ ಅನುಭವ ನೀಡುತ್ತಿದೆ.

ಅಂಕಿತಾ ಮತ್ತು ಅಮನ್ ತಿಂಗಳಿಗೆ ಒಮ್ಮೆ 10ರಿಂದ 12 ಜನರಿಗೆ ಮಾತ್ರ ಈ ಔತಣಕೂಟ ಆಯೋಜಿಸುತ್ತಾರೆ. ಪ್ರತಿ ಟಿಕೆಟ್‌ಗೆ ಸುಮಾರು 50 ಪೌಂಡ್ ಅಂದರೆ ಸುಮಾರು 6 ಸಾವಿರ ರೂಪಾಯಿ ವಸೂಲಿ ಮಾಡುತ್ತಾರೆ. ಆರಂಭದಲ್ಲಿ ಬೆಲೆ ನಿಗದಿ, ಗ್ರಾಹಕರ ರುಚಿ ಅರ್ಥಮಾಡಿಕೊಳ್ಳುವುದು, ಮಾರ್ಕೆಟಿಂಗ್ ಎಲ್ಲವೂ ದೊಡ್ಡ ಸವಾಲಾಗಿತ್ತು. ಅಡುಗೆ ಉದ್ಯಮದ ಅನುಭವ ಇಲ್ಲದ ಕಾರಣ ಪ್ರತಿ ಹೆಜ್ಜೆಯನ್ನೂ ಹೊಸದಾಗಿ ಕಲಿಯಬೇಕಾಯಿತು.

ಅಂಕಿತಾ ಹೇಳುವಂತೆ, ಐಐಟಿ ಶಿಕ್ಷಣ ಅವರಿಗೆ ರಿಸ್ಕ್ ತೆಗೆದುಕೊಳ್ಳುವ ಧೈರ್ಯ ನೀಡಿತು. ನಾವು ಕಾರ್ಪೊರೇಟ್ ಕೆಲಸ ಬಿಟ್ಟು ಕೆಳಗೆ ಬಿದ್ದಿಲ್ಲ, ಬದಲಾಗಿ ಹೊಸದನ್ನು ಕಟ್ಟುತ್ತಿದ್ದೇವೆ ಎಂಬ ಆತ್ಮವಿಶ್ವಾಸ ಅವರಲ್ಲಿದೆ. ಉತ್ತಮ ಸಂಬಳದ ಉದ್ಯೋಗವೇ ಯಶಸ್ಸಿನ ಏಕೈಕ ಮಾನದಂಡವಲ್ಲ ಎಂಬುದನ್ನು ಈ ದಂಪತಿ ತಮ್ಮ ನಡೆ ಮೂಲಕ ತೋರಿಸಿದ್ದಾರೆ.

ಕೆಲಸ ಯಾವುದಾದರೂ ಶ್ರದ್ಧೆ, ಹೊಸತನ ಮತ್ತು ಪ್ರಾಮಾಣಿಕತೆ ಇದ್ದರೆ ಯಶಸ್ಸು ಸಾಧ್ಯ. ಪಾನಿ ಪುರಿಯಂತಹ ಸರಳ ಆಹಾರವೂ ಜಗತ್ತಿನ ಯಾವುದೇ ನಗರದಲ್ಲಿ ದೊಡ್ಡ ಅವಕಾಶ ನೀಡಬಹುದು ಎಂಬುದಕ್ಕೆ ಅಂಕಿತಾ ಮತ್ತು ಅಮನ್ ಕಥೆ ಪ್ರೇರಣೆ.