ಬೆಂಗಳೂರಿನಲ್ಲಿ ಹಸಿರಿನ ಓಯಸಿಸ್! ಕಾಂಕ್ರಿಟ್ ಕಾಡಿನ ನಗರದ ಮಧ್ಯೆ 6°C ತಂಪಿರುವ ಮಿನಿ ಕಾಡು ಬೆಳೆಸಿದ್ದಾರೆ

ಈ ದಂಪತಿ ಬೆಂಗಳೂರಿನ 1,500 ಚದರ ಅಡಿಯ ಮನೆಯನ್ನು 2,000 ಕ್ಕೂ ಹೆಚ್ಚು ಸಸ್ಯಗಳು, ಸೌರಶಕ್ತಿ ವ್ಯವಸ್ಥೆ ಮತ್ತು 49 ಕ್ಕೂ ಹೆಚ್ಚು ಪಕ್ಷಿ ಜಾತಿಗಳನ್ನು ಹೊಂದಿರುವ ಶೂನ್ಯ ರಾಸಾಯನಿಕ ಮಿನಿ ಕಾಡಾಗಿಸಿದ್ದಾರೆ. ಇದು ಸ್ವಾವಲಂಬಿ ಓಯಾಸಿಸ್ ಆಗಿದ್ದು, ತಾವೇ ಬೆಳೆಸಿದ ಆಹಾರ, ಶಕ್ತಿಯ ಉತ್ಪಾದನೆ, ಹಾಗು ಪ್ರಕೃತಿಯ ಜೊತೆ ಸಹಜ ನಂಟು ಈ ಮನೆಯ ಶ್ರೇಷ್ಠತೆಯಾಗಿದೆ.

ನಾಯಕ್ ದಂಪತಿಯ ಮನೆಯಲ್ಲಿ ಕಾಲಿಟ್ಟ ತಕ್ಷಣ, ನೀವು ನಗರದ ಮಧ್ಯದಲ್ಲಿದ್ದೀರಿ ಎಂಬ ಭಾವನೆಯೇ ಹೊರಟುಹೋಗುತ್ತದೆ. ನೀವು ಯಾವುದೋ ದಟ್ಟ ಕಾಡಿನಲ್ಲಿದ್ದೀರಿ ಎನಿಸುತ್ತದೆ. ಎಲ್ಲಿಂದಲೋ ಪಕ್ಷಿಗಳ ಕೂಗು, ಹೂಬಿಡುವ ಕೊಂಬೆಗಳಲ್ಲಿ ಚಿಟ್ಟೆಗಳು ಹಾರಾಡುವುದನ್ನು ನೋಡುವುದೇ ಕಣ್ಣಿಗೆ ಹಬ್ಬ. ಜೊತೆಗೆ ಪ್ರತಿ ಮೂಲೆಯಲ್ಲೂ ಹಸಿರು ಹರಡಿಕೊಂಡಿದೆ. ಇವೆಲ್ಲವೂ 11 ವರ್ಷಗಳ ಶ್ರದ್ಧೆ ಮತ್ತು ಪರಿಸರ ನಿಷ್ಠೆಯಿಂದ ಬೆಳೆದ ಪ್ರೀತಿಯ ಕಾಡು.

ಆರಂಭದಲ್ಲಿ ಇದು ಕೇವಲ ವಾರಾಂತ್ಯದ ತೋಟಗಾರಿಕೆಯಾಗಿತ್ತು. ಆದರೆ ಈ ಹವ್ಯಾಸವೇ ಶೀಘ್ರದಲ್ಲೇ ಪ್ರಕೃತಿಯ ಆಶ್ರಯ ತಾಣವಾಗಿ ಪರಿವರ್ತನೆಗೊಂಡಿತು. ಇಂದಿಗೆ ಅವರ ಮನೆಯ ತೋಟದಲ್ಲಿ 2,000 ಕ್ಕೂ ಹೆಚ್ಚು ಸಸ್ಯಗಳು, ಮರಗಳು, ಹೂಗಿಡಗಳು ಹಾಗೂ ಬಳ್ಳಿಗಳಿವೆ. ಎಲ್ಲವೂ ಅಡುಗೆ ತ್ಯಾಜ್ಯ ಮತ್ತು ಒಣ ಎಲೆಗಳಿಂದ ತಯಾರಾದ ಸಾವಯವ ಗೊಬ್ಬರದಿಂದ ಬೆಳೆಯುತ್ತವೆ. ಯಾವುದೇ ರಾಸಾಯನಿಕ ಗೊಬ್ಬರ ಅಥವಾ ಕೀಟನಾಶಕಗಳ ಬಳಕೆ ಇಲ್ಲ.

ಈ ಮಿನಿ ಕಾಡು ಈಗ 49 ಬಗೆಯ ಪಕ್ಷಿಗಳು ಮತ್ತು 30 ಕ್ಕೂ ಹೆಚ್ಚು ಬಗೆಯ ಚಿಟ್ಟೆಗಳು, ಪತಂಗಗಳನ್ನು ಆಕರ್ಷಿಸುತ್ತದೆ. ಚಿಕೂ ಮರ ಗಿಳಿಗಳು ಮತ್ತು ಬುಲ್‌ಬುಲ್ ಪಕ್ಷಿಗಳ ನೆಚ್ಚಿನ ತಾಣವಾಗಿದೆ. ಹಾಗಾಗಿ, ಇವು ಈಗ ನಗರದಲ್ಲಿ ವಿರಳವಾಗಿವೆ. ಹೀಗೆ ಮನೆಯಲ್ಲಿ ಸೃಷ್ಟಿಯಾದ ಪರಿಸರ ವ್ಯವಸ್ಥೆ ನೈಸರ್ಗಿಕ ಜೀವವೈವಿಧ್ಯವನ್ನು ಹಿಂದಿರುಗಿಸುತ್ತಿದೆ.

ಅವರ ತೋಟದಲ್ಲಿ ಮಾವು, ಪೇರಲ, ಸ್ಟಾರ್‌ಫ್ರೂಟ್, ಮಲ್ಬೆರಿ, ಆವಕಾಡೊ, ಡ್ರ್ಯಾಗನ್ ಹಣ್ಣು ಮುಂತಾದ ಹಲವಾರು ಹಣ್ಣುಗಳು ಬೆಳೆಯುತ್ತವೆ. ಎಲ್ಲವೂ ಹಸಿವನ್ನು ತಣಿಸುವಷ್ಟೇ ಅಲ್ಲ, ಪೋಷಕಾಂಶಗಳಲ್ಲಿ ಶ್ರೀಮಂತವಾಗಿವೆ. ಇದರೊಂದಿಗೆ ಈ ಹಣ್ಣುಗಳ ಬೆಳವಣಿಗೆಗಾಗಿ ಅವರು ಯಾವುದೇ ಕೃತಕ ಬೂಸ್ಟರ್ ಬಳಸಿಲ್ಲ. ಕೇವಲ ತಾಳ್ಮೆ ಮತ್ತು ಕಾಳಜಿಯೊಂದಿಗೆ ನೈಸರ್ಗಿಕ ಬೆಳವಣಿಗೆಯನ್ನು ಉತ್ತೇಜಿಸಿದ್ದಾರೆ.

ನಾಯಕ್‌ರ ಮನೆ ಸಂಪೂರ್ಣವಾಗಿ ಸೌರಶಕ್ತಿಯಿಂದ ಚಾಲಿತವಾಗಿದೆ. ಯಾವುದೇ ಇಲೆಕ್ಟ್ರಿಸಿಟಿ ಗ್ರಿಡ್‌ಗೆ ಅವಲಂಬನೆಯಿಲ್ಲ. ಇದರಿಂದ ಕೇವಲ ವಿದ್ಯುತ್ ಉಳಿತಾಯವಲ್ಲ, ಪರಿಸರ ಸಂರಕ್ಷಣೆಯತ್ತ ದೊಡ್ಡ ಹೆಜ್ಜೆಯಾಗಿದೆ. ಗರಿಷ್ಠ ಬೇಸಿಗೆಯಲ್ಲೂ ಈ ಮನೆ ನಗರದ ಇತರ ಭಾಗಗಳಿಗಿಂತ 5 – 6 ಡಿಗ್ರಿ ಸೆಲ್ಸಿಯಸ್ ತಂಪಾಗಿರುತ್ತದೆ.

“ನಾನು ಕೆಲವೊಂದು ಗಿಡಗಳನ್ನು ನೆಟ್ಟಿದ್ದೆ, ಈಗ ಅವುಗಳೇ ನನ್ನನ್ನು ನೋಡಿಕೊಳ್ಳುತ್ತಿವೆ,” ಎನ್ನುತ್ತಾರೆ ಸುಮೇಶ್ ನಗುತ್ತಾ. ಅವರ ಇನ್‌ಸ್ಟಾಗ್ರಾಂ ಖಾತೆಯು ಈಗ 1.3 ಲಕ್ಷಕ್ಕೂ ಹೆಚ್ಚು ಅನುಯಾಯಿಗಳನ್ನು ಹೊಂದಿದೆ. ಅವರು ತಮ್ಮ ಹಸಿರು ಪ್ರಯೋಗದ ಮೂಲಕ ಅನೇಕರಿಗೆ ಪ್ರೇರಣೆಯಾಗಿ, ಬಾಲ್ಕನಿಗಳು, ಹಿತ್ತಿಲುಗಳು ಮತ್ತು ಟೆರೇಸ್‌ಗಳನ್ನು ಆಹಾರ ಕಾಡುಗಳಾಗಿ ಪರಿವರ್ತಿಸಲು ಜನರನ್ನು ಪ್ರೇರಣೆಗೊಳಿಸುತ್ತಾರೆ. ಹಾಗಾಗಿ, ಈ ಸ್ಟೋರಿಯು ಸಣ್ಣ ಹವ್ಯಾಸವೊಂದು ಹೇಗೆ ಪರಿಸರ ಸಂರಕ್ಷಣೆಯ ಮಾದರಿಯಾಗಿ ಅರಳಬಹುದು ಎಂಬುದಕ್ಕೆ ಬೆಸ್ಟ್ ಎಕ್ಸಾಂಪಲ್.