ಉಜ್ವಲ್ ಅವರು ಅಮೆರಿಕದ ಸಿಯಾಟಲ್ನಲ್ಲಿ ಮೈಕ್ರೋಸಾಫ್ಟ್ ಕಂಪನಿಯಲ್ಲಿ ಡೆವಲಪರ್ ಆಗಿ ಮೂರು ವರ್ಷಗಳ ಕಾಲ ಕೆಲಸ ಮಾಡಿದ್ದರು. ಅಲ್ಲಿ ಅವರಿಗೆ ಸಿಗುತ್ತಿದ್ದ ಸಂಬಳ ದೊಡ್ಡದಾಗಿದ್ದರೂ, ಸಿಯಾಟಲ್ನಂತಹ ನಗರದಲ್ಲಿ ಬದುಕುವುದು ಅಷ್ಟು ಸುಲಭವಾಗಿರಲಿಲ್ಲ.
ಅಲ್ಲಿನ ಖರ್ಚುಗಳು ಕೂಡ ಅಷ್ಟೇ ಹೆಚ್ಚಿದ್ದವು. ಆದರೆ ಭಾರತಕ್ಕೆ ಮರಳಿ ‘ರಿಮೋಟ್’ (ಮನೆಯಿಂದಲೇ ಕೆಲಸ) ಕೆಲಸ ಮಾಡಲು ಶುರು ಮಾಡಿದ ಮೇಲೆ ಅವರ ಉಳಿತಾಯದ ಪ್ರಮಾಣ ಶೇ. 90 ರಷ್ಟು ಹೆಚ್ಚಾಗಿದೆ.
“ಡೆಲ್ಲಿಯಲ್ಲಿರುವ ನಮ್ಮ ಸ್ವಂತ ಮನೆಯಲ್ಲಿ ನಾನು ವಾಸಿಸುತ್ತಿದ್ದೇನೆ, ಇದರಿಂದ ಬಾಡಿಗೆ ಖರ್ಚು ಶೇ. 80 ರಷ್ಟು ಕಡಿಮೆಯಾಗಿದೆ. ಈಗ ನಾನು ಹೋಟೆಲ್ಗೆ ಹೋದರೆ ಮೆನು ಕಾರ್ಡ್ನಲ್ಲಿ ರೇಟ್ ನೋಡುವ ಪ್ರಮೇಯವೇ ಬರುವುದಿಲ್ಲ,” ಎಂದು ಅವರು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
ಅಮೆರಿಕದಲ್ಲಿ ಎಷ್ಟೇ ದೊಡ್ಡ ಕೆಲಸ ಮಾಡಿಕೊಂಡಿದ್ದರೂ, ಮನೆಯ ಕೆಲಸಗಳನ್ನು ನಾವೇ ಮಾಡಿಕೊಳ್ಳಬೇಕು. ಅಲ್ಲಿ ಅಡುಗೆ ಮಾಡುವುದು, ಪಾತ್ರೆ ತೊಳೆಯುವುದು ಎಲ್ಲವೂ ಕಿರಿಕಿರಿ ಎನ್ನುತ್ತಾರೆ ಉಜ್ವಲ್. ಆದರೆ ಭಾರತದಲ್ಲಿ ಹಾಗಲ್ಲ.
“ಈಗ ನನಗೆ ಅಡುಗೆ ಮಾಡಲು ಒಬ್ಬರು ಇದ್ದಾರೆ, ಕಾರ್ ಓಡಿಸಲು ಒಬ್ಬ ಡ್ರೈವರ್ ಇದ್ದಾರೆ. ಅವರಿಗೆ ನಾನು ಒಳ್ಳೆಯ ಸಂಬಳವನ್ನೂ ನೀಡುತ್ತಿದ್ದೇನೆ. ಇದರಿಂದ ನನಗೆ ವೈಯಕ್ತಿಕವಾಗಿ ತುಂಬಾ ಸಮಯ ಸಿಗುತ್ತಿದೆ,” ಎನ್ನುತ್ತಾರೆ ಅವರು.
ಅಮೆರಿಕದಲ್ಲಿ ‘ಫ್ರೋಜನ್ ಡಿನ್ನರ್’ (ಕವರ್ನಲ್ಲಿರುವ ಹಳೆಯ ಆಹಾರ) ತಿಂದು ಬದುಕುತ್ತಿದ್ದ ಉಜ್ವಲ್, ಈಗ ಪ್ರತಿದಿನ ಸಂಜೆ ತಮ್ಮ ಪೋಷಕರ ಜೊತೆ ಕುಳಿತು ಬಿಸಿಬಿಸಿ ಚಹಾ ಕುಡಿಯುತ್ತಾ ಸಮಯ ಕಳೆಯುತ್ತಿದ್ದಾರೆ.
ಅಮೆರಿಕದಲ್ಲಿ ಇರುವ ಭಾರತೀಯರಿಗೆ ದೊಡ್ಡ ತಲೆನೋವು ಎಂದರೆ ಅದು ವೀಸಾ ಸಮಸ್ಯೆ. ಯಾವಾಗ ವೀಸಾ ಅವಧಿ ಮುಗಿಯುತ್ತದೋ, ಯಾವಾಗ ಕೆಲಸ ಹೋಗುತ್ತದೋ ಎಂಬ ಭಯ ಸದಾ ಕಾಡುತ್ತಿರುತ್ತದೆ.
“ಭಾರತಕ್ಕೆ ಮರಳಿದ ಮೇಲೆ ನನಗೆ ಅಂತಹ ಯಾವುದೇ ‘ವೀಸಾ ಆತಂಕ’ ಇಲ್ಲ. ಈಗ ನಾನು ಕೆಲಸದ ಮೇಲೆ ಮತ್ತು ನನ್ನ ಹೊಸ ಆಲೋಚನೆಗಳ ಮೇಲೆ ಹೆಚ್ಚು ಗಮನ ಹರಿಸುತ್ತಿದ್ದೇನೆ.
ನಾನು ಅಮೆರಿಕ ಬಿಟ್ಟಿದ್ದು ನಿವೃತ್ತಿ ಪಡೆಯಲು ಅಲ್ಲ, ಬದಲಾಗಿ ನಿಜವಾದ ಜೀವನವನ್ನು ನಡೆಸಲು” ಎಂದು ಉಜ್ವಲ್ ಕಿವಿಮಾತು ಹೇಳಿದ್ದಾರೆ. ಅಮೆರಿಕದ ಜೀವನ ಕೇವಲ ಬದುಕುಳಿಯುವ ಹೋರಾಟದಂತಿದ್ದರೆ, ಭಾರತದ ಜೀವನವು ನಿಜವಾದ ಖುಷಿ ನೀಡುತ್ತಿದೆ ಎಂಬುದು ಅವರ ಅನುಭವ.
ಕೇವಲ ಸಂಬಳದ ಅಂಕಿ ಅಂಶಗಳನ್ನು ನೋಡಿ ಜೀವನವನ್ನು ಅಳೆಯಬಾರದು, ಬದಲಾಗಿ ನಮಗೆ ಸಿಗುವ ನೆಮ್ಮದಿಯ ಮೇಲೆ ಜೀವನವನ್ನು ಅಳೆಯಬೇಕು ಎಂದು ಅವರು ಈ ಮೂಲಕ ಇಂದಿನ ಯುವ ಪೀಳಿಗೆಗೆ ತಿಳಿಸಿದ್ದಾರೆ.
