Last Updated:
Success Story: ಭಾರತೀಯ ಚೆಸ್ ಲೋಕಕ್ಕೆ ಈಗ ಹಬ್ಬದ ಸಂಭ್ರಮ. ಯಾಕೆಂದರೆ, ಭಾರತಕ್ಕೆ ಈಗ 92ನೇ ಗ್ರ್ಯಾಂಡ್ಮಾಸ್ಟರ್ (GM) ಸಿಕ್ಕಿದ್ದಾರೆ. ಅವರೇ 21 ವರ್ಷದ ಆರ್ಯನ್ ವರ್ಷ್ನೆಯ್. ಹೌದು, ಸಾಮಾನ್ಯವಾಗಿ ಒಬ್ಬ ಚೆಸ್ ಆಟಗಾರ ಗ್ರ್ಯಾಂಡ್ಮಾಸ್ಟರ್ ಆಗಬೇಕೆಂದರೆ ಲಕ್ಷಾಂತರ ರೂಪಾಯಿ ಖರ್ಚು ಮಾಡಬೇಕು, ವಿದೇಶಿ ಕೋಚ್ಗಳ ಸಹಾಯ ಪಡೆಯಬೇಕು ಮತ್ತು ಹಗಲಿರುಳು ಪುಸ್ತಕಗಳನ್ನು ಓದಬೇಕು.
Success Story: ಭಾರತೀಯ ಚೆಸ್ ಲೋಕಕ್ಕೆ (Indian chess world) ಈಗ ಹಬ್ಬದ ಸಂಭ್ರಮ. ಯಾಕೆಂದರೆ, ಭಾರತಕ್ಕೆ ಈಗ 92ನೇ ಗ್ರ್ಯಾಂಡ್ಮಾಸ್ಟರ್ (GM) ಸಿಕ್ಕಿದ್ದಾರೆ. ಅವರೇ 21 ವರ್ಷದ ಆರ್ಯನ್ ವರ್ಷ್ನೆಯ್ (Aryan Varshney). ಹೌದು, ಸಾಮಾನ್ಯವಾಗಿ ಒಬ್ಬ ಚೆಸ್ ಆಟಗಾರ ಗ್ರ್ಯಾಂಡ್ಮಾಸ್ಟರ್ (Grandmaster) ಆಗಬೇಕೆಂದರೆ ಲಕ್ಷಾಂತರ ರೂಪಾಯಿ ಖರ್ಚು ಮಾಡಬೇಕು, ವಿದೇಶಿ ಕೋಚ್ಗಳ ಸಹಾಯ ಪಡೆಯಬೇಕು ಮತ್ತು ಹಗಲಿರುಳು ಪುಸ್ತಕಗಳನ್ನು ಓದಬೇಕು.
ಆದರೆ ಆರ್ಯನ್ ಕಥೆ ಇದಕ್ಕಿಂತ ಪೂರ್ತಿ ವಿಭಿನ್ನವಾಗಿದೆ. ಇವರ ಯಶಸ್ಸಿನ ಹಿಂದೆ ಒಬ್ಬ ವೃತ್ತಿಪರ ಕೋಚ್ ಇಲ್ಲ, ಬದಲಾಗಿ ಒಬ್ಬಂಟಿ ತಂದೆಯ 15 ವರ್ಷಗಳ ನಿರಂತರ ಪರಿಶ್ರಮವಿದೆ. 2026ರ ಆರಂಭದಲ್ಲೇ ಭಾರತಕ್ಕೆ ಈ ದೊಡ್ಡ ಕೀರ್ತಿ ತಂದುಕೊಟ್ಟಿರುವ ಆರ್ಯನ್, ದೆಹಲಿಯ ಏಳನೇ ಗ್ರ್ಯಾಂಡ್ಮಾಸ್ಟರ್ ಆಗಿ ಹೊರಹೊಮ್ಮಿದ್ದಾರೆ.
ಆರ್ಯನ್ ಅವರ ತಂದೆ ಗೌರವ್ ವರ್ಷ್ನೆಯ್ ದೆಹಲಿಯಲ್ಲಿ ಭೌತಶಾಸ್ತ್ರ ಶಿಕ್ಷಕರಾಗಿ ಕೆಲಸ ಮಾಡುತ್ತಿದ್ದಾರೆ. ಆರ್ಯನ್ಗೆ ಕೇವಲ 5 ವರ್ಷವಿದ್ದಾಗ ಅವರ ತಾಯಿ ಕುಟುಂಬದಿಂದ ದೂರವಾದರು. ಅಂದಿನಿಂದ ಗೌರವ್ ಅವರೇ ತಾಯಿ-ತಂದೆಯಾಗಿ ಮಗನನ್ನು ಬೆಳೆಸಿದರು. ಗೌರವ್ ಅವರಿಗೆ ಚೆಸ್ನಲ್ಲಿ ಆಸಕ್ತಿ ಇತ್ತು, ಆದರೆ ದೊಡ್ಡ ಆಟಗಾರನಾಗಲು ಸಾಧ್ಯವಾಗಿರಲಿಲ್ಲ. “ನಾನು ದೊಡ್ಡ ಆಟಗಾರನಾಗದಿದ್ದರೆ ಏನಂತೆ, ನನ್ನ ಮಗನನ್ನು ದೊಡ್ಡ ಆಟಗಾರನನ್ನಾಗಿ ಮಾಡುತ್ತೇನೆ” ಎಂಬ ಹಠ ಅವರದಾಗಿತ್ತು.
ಆರ್ಯನ್ಗೆ 7 ವರ್ಷವಿದ್ದಾಗ ಗೌರವ್ ಅವರೇ ಮನೆಯಲ್ಲಿ ಚೆಸ್ ಕಲಿಸಲು ಶುರು ಮಾಡಿದರು. ಸುಮಾರು 2 ವರ್ಷಗಳ ಕಾಲ ಆರ್ಯನ್ ಮನೆಯಲ್ಲೇ ಅಭ್ಯಾಸ ಮಾಡಿದರು. ಅಚ್ಚರಿಯ ವಿಷಯವೆಂದರೆ, ಆರ್ಯನ್ ಇದುವರೆಗೆ ಒಬ್ಬರೇ ಒಬ್ಬ ಕೋಚ್ ಹತ್ತಿರ ತರಬೇತಿ ಪಡೆದಿಲ್ಲ ಮತ್ತು ಯಾವುದೇ ಚೆಸ್ ಅಕಾಡೆಮಿಗೆ ಹೋಗಿಲ್ಲ. ಇವರು ಯಾವುದೇ ಚೆಸ್ ಪುಸ್ತಕವನ್ನೂ ಓದಿಲ್ಲ. “ಚೆಸ್ ಎಂಬುದು ಓದುವ ವಿಷಯವಲ್ಲ, ಅದು ಆಡಿ ಕಲಿಯುವ ಆಟ” ಎಂಬುದು ಇವರ ಪಾಲಿಸಿ. ಕೇವಲ ‘ChessBase’ ಸಾಫ್ಟ್ವೇರ್ ಬಳಸಿ ಮತ್ತು ಆಟಗಳನ್ನು ವಿಶ್ಲೇಷಣೆ ಮಾಡುವ ಮೂಲಕವೇ ಆರ್ಯನ್ ಜ್ಞಾನ ಸಂಪಾದಿಸಿದರು.
ಗೌರವ್ ಅವರು ತಮ್ಮ ವಯಸ್ಸಾದ ಪೋಷಕರನ್ನೂ ನೋಡಿಕೊಳ್ಳಬೇಕಿತ್ತು. ಹೀಗಾಗಿ ತಮ್ಮ ಕೆಲಸ ಬಿಟ್ಟು ಮಗನ ಜೊತೆ ವಿದೇಶಗಳಿಗೆ ಹೋಗಲು ಅವರಿಗೆ ಸಾಧ್ಯವಾಗುತ್ತಿರಲಿಲ್ಲ. ಬೇರೆ ಪೋಷಕರು ಕೋಚ್ಗಳಿಗಾಗಿ ತಿಂಗಳಿಗೆ 50,000 ರಿಂದ 1 ಲಕ್ಷ ರೂಪಾಯಿ ಖರ್ಚು ಮಾಡುತ್ತಿದ್ದರೆ, ಆರ್ಯನ್ ತನ್ನ ತಂದೆಯ ಮೇಲೆ ಅಂತಹ ಯಾವುದೇ ಹೊರೆ ಹಾಕಲಿಲ್ಲ. 2014 ರಲ್ಲಿ ಕೇವಲ 1261 ರೇಟಿಂಗ್ನಿಂದ ಶುರುವಾದ ಆರ್ಯನ್ ಪಯಣ, 2018 ರ ವೇಳೆಗೆ 2309 ರೇಟಿಂಗ್ ತಲುಪಿತು. 2024 ರಲ್ಲಿ ಅವರು ಇಂಟರ್ನ್ಯಾಷನಲ್ ಮಾಸ್ಟರ್ (IM) ಆಗಿ ಹೊರಹೊಮ್ಮಿದರು.
IM ಪಟ್ಟ ಗೆದ್ದ ನಂತರ ಆರ್ಯನ್ ಕೇವಲ 1 ವರ್ಷ 6 ತಿಂಗಳಲ್ಲಿ ಗ್ರ್ಯಾಂಡ್ಮಾಸ್ಟರ್ ಪಟ್ಟಕ್ಕೇರಿದರು. ಕಳೆದ ಆರು ತಿಂಗಳಲ್ಲಿ ಗ್ರೀಸ್, ಬಾಂಗ್ಲಾದೇಶ ಮತ್ತು ಈಗ ಅರ್ಮೇನಿಯಾದಲ್ಲಿ ನಡೆದ ಪಂದ್ಯಗಳಲ್ಲಿ ಜಯಗಳಿಸುವ ಮೂಲಕ 3 ಜಿಎಂ ನಾರ್ಮ್ಗಳನ್ನು ಪೂರ್ಣಗೊಳಿಸಿದ್ದಾರೆ. “ಆರು ತಿಂಗಳಲ್ಲಿ ಮೂರು ಜಿಎಂ(GM) ನಾರ್ಮ್ ಪಡೆಯುವುದು ವಿಶ್ವದಾಖಲೆಯೇ ಎಂದು ನಾನು ಹುಡುಕುತ್ತಿದ್ದೇನೆ” ಎಂದು ಗೌರವ್ ಹೆಮ್ಮೆಯಿಂದ ನಗುತ್ತಾರೆ.
ಆರ್ಯನ್ ಅವರ ಮುಂದೆ ಈಗ ಎರಡು ದೊಡ್ಡ ಗುರಿಗಳಿವೆ. ಮೊದಲನೆಯದು ವಿಶ್ವ ಚಾಂಪಿಯನ್ ಆಗುವುದು. ಎರಡನೆಯದು, ಭಾರತದ ಸ್ಟಾರ್ ಆಟಗಾರ ಗುಕೇಶ್ ಅವರನ್ನು ಸೋಲಿಸುವುದು. ಈವರೆಗೆ ಗುಕೇಶ್ ವಿರುದ್ಧ ಆಡಿರುವ 3 ಪಂದ್ಯಗಳಲ್ಲಿ ಆರ್ಯನ್ ಎರಡು ಪಂದ್ಯಗಳನ್ನು ಡ್ರಾ ಮಾಡಿಕೊಂಡಿದ್ದಾರೆ ಮತ್ತು ಒಂದರಲ್ಲಿ ಸೋತಿದ್ದಾರೆ. ಈಗ ಅವರನ್ನು ಸೋಲಿಸಿಯೇ ತೀರುತ್ತೇನೆ ಎಂಬ ಛಲ ಅವರಲ್ಲಿದೆ.
ಸಾಧನೆ ಮಾಡಲು ಕೇವಲ ಹಣ ಅಥವಾ ದೊಡ್ಡ ಸೌಲಭ್ಯಗಳ ಅಗತ್ಯವಿಲ್ಲ, ಬದಲಾಗಿ ದೃಢವಾದ ಸಂಕಲ್ಪ ಮತ್ತು ಕುಟುಂಬದ ಬೆಂಬಲವಿದ್ದರೆ ಸಾಕು ಎಂಬುದಕ್ಕೆ ಇವರೇ ಸಾಕ್ಷಿ. ಒಬ್ಬಂಟಿ ತಂದೆಯಾಗಿ ಗೌರವ್ ಅವರು ಮಗನಿಗಾಗಿ ಪಟ್ಟ ಶ್ರಮ ಇವತ್ತು ಸಾರ್ಥಕವಾಗಿದೆ. ಇಂದಿನ ಯುವಕರಿಗೆ ಆರ್ಯನ್ ದೊಡ್ಡ ಸ್ಪೂರ್ತಿಯಾಗಿದ್ದಾರೆ.
