ಭಾರತೀಯ ಸೇನೆಯು (Indian Army) ಶಾರ್ಟ್ ಸರ್ವಿಸ್ ಕಮಿಷನ್ (SSC) ಎನ್ಸಿಸಿ ಸ್ಪೆಷಿಯಲ್ ಎಂಟ್ರಿ ಯೋಜನೆಯ 24ನೇ ಕೋರ್ಸ್ (ಅಕ್ಟೋಬರ್ 2026)ಗಾಗಿ ಅರ್ಜಿಗಳನ್ನು(Application) ಆಹ್ವಾನಿಸಿದೆ. ಅವಿವಾಹಿತ ಪದವೀಧರ (Degree) ಪುರುಷರು (Men) ಮತ್ತು ಮಹಿಳೆಯರಿಗೆ (Women) ದೇಶಸೇವೆಯೊಂದಿಗೆ ಅಧಿಕಾರಿಯಾಗುವ ಸುವರ್ಣಾವಕಾಶ ಇದು. ಆಸಕ್ತ ಅಭ್ಯರ್ಥಿಗಳು ಅಧಿಕೃತ ವೆಬ್ಸೈಟ್ ಇಂಡಿಯನ್ ಆರ್ಮಿ ಮೂಲಕ ಆನ್ಲೈನ್ನಲ್ಲಿ ಮಾರ್ಚ್ 16 ರೊಳಗಾಗಿ ಅರ್ಜಿ ಸಲ್ಲಿಸಬಹುದು.
ಈ ವಿಶೇಷ ಪ್ರವೇಶ ಯೋಜನೆಯ ಪ್ರಮುಖ ವೈಶಿಷ್ಟ್ಯವೆಂದರೆ ಲಿಖಿತ ಪರೀಕ್ಷೆ ಇಲ್ಲದಿರುವುದು. ಸಾಮಾನ್ಯವಾಗಿ ಸೇನೆಗೆ ಅಧಿಕಾರಿಗಳ ನೇಮಕಾತಿಯಲ್ಲಿ ಕಠಿಣ ಲಿಖಿತ ಪರೀಕ್ಷೆಯನ್ನು ಎದುರಿಸಬೇಕಾಗುತ್ತದೆ. ಆದರೆ SSC NCC ವಿಶೇಷ ಪ್ರವೇಶದಡಿ ಅಭ್ಯರ್ಥಿಗಳು ನೇರವಾಗಿ ಎಸ್ಎಸ್ಬಿ (Services Selection Board) ಸಂದರ್ಶನಕ್ಕೆ ಹಾಜರಾಗುತ್ತಾರೆ. ಇದರಿಂದ ಎನ್ಸಿಸಿ ತರಬೇತಿ ಪಡೆದ ಯುವಕರಿಗೆ ಮತ್ತಷ್ಟು ಸುಲಭ ಮಾರ್ಗ ದೊರೆಯುತ್ತದೆ.
ಅರ್ಹತೆ ಏನು?
SSC NCC ವಿಶೇಷ ಪ್ರವೇಶಕ್ಕೆ ಅರ್ಜಿ ಸಲ್ಲಿಸಲು ಅಭ್ಯರ್ಥಿಗಳು ಕನಿಷ್ಠ 50% ಅಂಕಗಳೊಂದಿಗೆ ಪದವೀಧರರಾಗಿರಬೇಕು. ಜೊತೆಗೆ ಕನಿಷ್ಠ ‘B’ ದರ್ಜೆಯೊಂದಿಗೆ NCC ‘C’ ಪ್ರಮಾಣಪತ್ರ ಹೊಂದಿರಬೇಕು. ವಯೋಮಿತಿ ಜುಲೈ 1, 2026 ರಂತೆ 19 ರಿಂದ 25 ವರ್ಷಗಳ ನಡುವೆ ಇರಬೇಕು.
ರಾಷ್ಟ್ರೀಯತೆಗೆ ಸಂಬಂಧಿಸಿದಂತೆ!
ಅಭ್ಯರ್ಥಿಗಳು ಭಾರತದ ನಾಗರಿಕರಾಗಿರಬೇಕು. ನೇಪಾಳದ ನಾಗರಿಕರು ಅಥವಾ ಭಾರತದಲ್ಲಿ ಶಾಶ್ವತವಾಗಿ ನೆಲೆಸುವ ಉದ್ದೇಶದಿಂದ ಕೆಲವು ದೇಶಗಳಿಂದ ವಲಸೆ ಬಂದ ಭಾರತೀಯ ಮೂಲದ ವ್ಯಕ್ತಿಗಳಿಗೂ ಅವಕಾಶವಿದೆ. ಅಗತ್ಯವಿದ್ದಲ್ಲಿ ಭಾರತ ಸರ್ಕಾರ ನೀಡಿದ ಅರ್ಹತಾ ಪ್ರಮಾಣಪತ್ರ ಸಲ್ಲಿಸಬೇಕು. ಆದರೆ ನೇಪಾಳದ ಗೂರ್ಖಾಗಳು ಈ ಪ್ರಮಾಣಪತ್ರದಿಂದ ವಿನಾಯಿತಿ ಹೊಂದಿದ್ದಾರೆ.
ಖಾಲಿ ಹುದ್ದೆಗಳ ವಿವರ
ಈ ನೇಮಕಾತಿ ಅಭಿಯಾನದಲ್ಲಿ ಒಟ್ಟು 170 ಹುದ್ದೆಗಳನ್ನು ಭರ್ತಿ ಮಾಡಲಾಗುತ್ತಿದೆ. ಅದರಲ್ಲಿ 63 ಹುದ್ದೆಗಳು ಸಾಮಾನ್ಯ ವರ್ಗಕ್ಕೆ ಮೀಸಲಾಗಿದ್ದು, 7 ಹುದ್ದೆಗಳು ಭಾರತೀಯ ಸೇನಾ ಸಿಬ್ಬಂದಿಯ ಯುದ್ಧದಲ್ಲಿ ಸಾವನ್ನಪ್ಪಿದವರ ವಾರ್ಡ್ಗಳಿಗೆ ಮೀಸಲಾಗಿದೆ. ಉಳಿದ ಹುದ್ದೆಗಳು ವಿವಿಧ ವರ್ಗಗಳ ಪ್ರಕಾರ ಹಂಚಿಕೆಯಾಗುತ್ತವೆ.
ಆಯ್ಕೆ ಪ್ರಕ್ರಿಯೆ ಹೇಗೆ?
SSC NCC ವಿಶೇಷ ಪ್ರವೇಶದ ಆಯ್ಕೆ ಪ್ರಕ್ರಿಯೆ ನಾಲ್ಕು ಹಂತಗಳಲ್ಲಿ ನಡೆಯುತ್ತದೆ!
- ಆನ್ಲೈನ್ ಅರ್ಜಿ ಪರಿಶೀಲನೆ• ಎಸ್ಎಸ್ಬಿ ಸಂದರ್ಶನ• ವೈದ್ಯಕೀಯ ಪರೀಕ್ಷೆ
• ಅಂತಿಮ ಅರ್ಹತಾ ಪಟ್ಟಿ
ಎಸ್ಎಸ್ಬಿ (Short Selection Board) ಸಂದರ್ಶನವು ಅಭ್ಯರ್ಥಿಯ ನಾಯಕತ್ವ ಗುಣ, ಮನೋಬಲ, ನಿರ್ಧಾರ ಸಾಮರ್ಥ್ಯ ಮತ್ತು ದೈಹಿಕ ಕ್ಷಮತೆಯನ್ನು ಸಮಗ್ರವಾಗಿ ಪರೀಕ್ಷಿಸುತ್ತದೆ. ವೈದ್ಯಕೀಯ ಪರೀಕ್ಷೆಯಲ್ಲಿ ದೈಹಿಕ ಆರೋಗ್ಯ ಮತ್ತು ಫಿಟ್ನೆಸ್ ಮಾನದಂಡಗಳನ್ನು ಪರಿಶೀಲಿಸಲಾಗುತ್ತದೆ.
ಆಯ್ಕೆಯಾದ ನಂತರ ತರಬೇತಿ!
ಅಂತಿಮವಾಗಿ ಆಯ್ಕೆಯಾದ ಅಭ್ಯರ್ಥಿಗಳನ್ನು ಚೆನ್ನೈನಲ್ಲಿರುವ ಆಫೀಸರ್ ಟ್ರೈನಿಂಗ್ ಅಕಾಡೆಮಿಗೆ ಸುಮಾರು 49 ವಾರಗಳ ತರಬೇತಿಗಾಗಿ ಕಳುಹಿಸಲಾಗುತ್ತದೆ. ಇಲ್ಲಿ ಸೈನಿಕ ತರಬೇತಿ, ನಾಯಕತ್ವ ಕೌಶಲ್ಯಗಳು ಮತ್ತು ಯುದ್ಧ ತಂತ್ರಗಳ ಬಗ್ಗೆ ಸಮಗ್ರ ತರಬೇತಿ ನೀಡಲಾಗುತ್ತದೆ. ತರಬೇತಿ ಪೂರ್ಣಗೊಂಡ ಬಳಿಕ ಅಭ್ಯರ್ಥಿಗಳನ್ನು ಲೆಫ್ಟಿನೆಂಟ್ ಹುದ್ದೆಯಲ್ಲಿ ನಿಯೋಜಿಸಲಾಗುತ್ತದೆ.
ಸಂಬಳ ಮತ್ತು ಭತ್ಯೆಗಳು!
ತರಬೇತಿ ಅವಧಿಯಲ್ಲಿ ತಿಂಗಳಿಗೆ ₹56,100 ಸ್ಟೈಫಂಡ್ ನೀಡಲಾಗುತ್ತದೆ. ತರಬೇತಿ ನಂತರ ಲೆಫ್ಟಿನೆಂಟ್ ಹುದ್ದೆಗೆ ಮೂಲ ವೇತನ ₹56,100 ರಿಂದ ₹1,77,500 ರವರೆಗೆ ಇರುತ್ತದೆ. ಜೊತೆಗೆ ತುಟ್ಟಿ ಭತ್ಯೆ, ಗೃಹ ಬಾಡಿಗೆ ಭತ್ಯೆ (HRA) ಅಥವಾ ಕ್ಷೇತ್ರ ಭತ್ಯೆ, ಪ್ರಯಾಣ ಭತ್ಯೆ ಸೇರಿದಂತೆ ಹಲವು ಸೌಲಭ್ಯಗಳು ಲಭ್ಯವಿರುತ್ತವೆ. ಒಟ್ಟಾರೆ ಆರಂಭಿಕ ಸಂಬಳವು ₹70,000 ರಿಂದ ₹80,000 ಅಥವಾ ಅದಕ್ಕಿಂತ ಹೆಚ್ಚು ಇರಬಹುದು. ಎನ್ಸಿಸಿ ಮೂಲಕ ಸೇನೆ ಸೇರುವ ಕನಸು ಹೊಂದಿರುವ ಯುವಕರಿಗೆ ಇದು ಅಪರೂಪದ ಅವಕಾಶ.
