ಅಸಾಧಾರಣ ಪ್ರತಿಭೆಗಳನ್ನು ಆಕರ್ಷಿಸಿ ಜಾಗತಿಕ ಮಟ್ಟದ ತಜ್ಞರನ್ನು ದೇಶಕ್ಕೆ ಸೆಳೆಯುವ ಉದ್ದೇಶದಿಂದ ಸೌದಿ ಅರೇಬಿಯಾ (Soudi Arebia) ಮಹತ್ವದ ಹೆಜ್ಜೆ ಇಟ್ಟಿದೆ. ವಿಜ್ಞಾನ, ತಂತ್ರಜ್ಞಾನ, ಆರೋಗ್ಯ(health), ಕ್ರೀಡೆ (Sports) ಹಾಗೂ ಸಂಸ್ಕೃತಿ (Culture) ಸೇರಿ ಹಲವು ಕ್ಷೇತ್ರಗಳಲ್ಲಿ ವಿಶಿಷ್ಟ ಸಾಧನೆ ಮಾಡಿದ ವ್ಯಕ್ತಿಗಳಿಗೆ ಪ್ರೀಮಿಯಂ ರೆಸಿಡೆನ್ಸಿ ನೀಡುವ ವಿಶೇಷ ಯೋಜನೆಯನ್ನು ಸರ್ಕಾರ ಆರಂಭಿಸಿದೆ. ಈ ವಾಸ ಅನುಮತಿ ಮೂಲಕ ಅರ್ಹ ಪ್ರತಿಭಾವಂತರಿಗೆ ದೇಶದಲ್ಲಿ ದೀರ್ಘಾವಧಿ ನೆಲೆಸಲು, ಉದ್ಯೋಗ ಹಾಗೂ ಹೂಡಿಕೆ (Invest) ಅವಕಾಶಗಳನ್ನು ಬಳಸಿಕೊಳ್ಳಲು ಸಾಧ್ಯವಾಗಲಿದೆ ಎಂಬುದು ಇದರ ಪ್ರಮುಖ ಉದ್ದೇಶವಾಗಿದೆ. ಈ ಕುರಿತು ಸಂಪೂರ್ಣ ವಿವರ ಇದೆ.
4,500ಕ್ಕೂ ಹೆಚ್ಚು ಸಂಸ್ಥೆಗಳಿಗೆ ನಾಮನಿರ್ದೇಶನ ಹಕ್ಕು!
ಇದೀಗ ಈ ಯೋಜನೆಗೆ ದೊಡ್ಡ ಮಟ್ಟದ ವಿಸ್ತರಣೆ ದೊರೆತಿದ್ದು, ವಿದೇಶಿ ತಜ್ಞರನ್ನು ನಾಮನಿರ್ದೇಶನ ಮಾಡಲು 1,028ಕ್ಕೂ ಹೆಚ್ಚು ಸರ್ಕಾರಿ ಹಾಗೂ ಅರೆ-ಸರ್ಕಾರಿ ಸಂಸ್ಥೆಗಳು ಮತ್ತು 3,484 ಖಾಸಗಿ ವಲಯದ ಕಂಪನಿಗಳಿಗೆ ಅನುಮತಿ ನೀಡಲಾಗಿದೆ.
ಕಟ್ಟುನಿಟ್ಟಿನ ಮಾನದಂಡಗಳು
ಈ ಮೂಲಕ ಅರ್ಹ ವೃತ್ತಿಪರರಿಗೆ ಹೊಸ ಅವಕಾಶಗಳ ಬಾಗಿಲು ತೆರೆದಿದ್ದರೂ, ಆಯ್ಕೆ ಪ್ರಕ್ರಿಯೆಯಲ್ಲಿ ಕಟ್ಟುನಿಟ್ಟಾದ ಅರ್ಹತಾ ನಿಯಮಗಳು ಜಾರಿಯಲ್ಲಿವೆ. ವಿಶೇಷವಾಗಿ ಉನ್ನತ ಸಂಬಳ ಮಾನದಂಡ, ವೃತ್ತಿಪರ ಸಾಧನೆಗಳ ದೃಢ ದಾಖಲೆ, ಅಂತಾರಾಷ್ಟ್ರೀಯ ಮಟ್ಟದ ಪರಿಣತಿ ಮತ್ತು ಅನುಭವ ಇತ್ಯಾದಿ ಅಂಶಗಳನ್ನು ಪ್ರಮುಖವಾಗಿ ಪರಿಗಣಿಸಲಾಗುತ್ತದೆ. ಕಟ್ಟುನಿಟ್ಟಿನ ನಿಯಮಗಳ ಮೂಲಕ ನಿಜವಾದ ಪ್ರತಿಭಾವಂತರನ್ನೇ ಆಯ್ಕೆ ಮಾಡಿ ದೇಶದ ಆರ್ಥಿಕ ಹಾಗೂ ತಂತ್ರಜ್ಞಾನ ಅಭಿವೃದ್ಧಿಗೆ ಅಗತ್ಯವಾದ ಅತ್ಯುತ್ತಮ ಕೌಶಲ್ಯಗಳನ್ನು ಸೆಳೆಯುವ ಗುರಿಯನ್ನು ಸೌದಿ ಸರ್ಕಾರ ಹೊಂದಿದೆ.
ಮೂರು ಪ್ರಮುಖ ಆದಾಯ ಮಾನದಂಡಗಳು
ಯೋಜನೆ ಮೂರು ಪ್ರಮುಖ ಆದಾಯ ಮಟ್ಟಗಳ ಆಧಾರದ ಮೇಲೆ ವಿನ್ಯಾಸಗೊಳಿಸಲಾಗಿದೆ.
1. ಸಂಶೋಧಕರಿಗೆ ಕನಿಷ್ಠ ತಿಂಗಳಿಗೆ SR14,000 ಸಂಬಳ, ಸಂಬಂಧಿತ ಕ್ಷೇತ್ರದಲ್ಲಿ ಉದ್ಯೋಗ ಒಪ್ಪಂದ, ಕನಿಷ್ಠ ಮೂರು ವರ್ಷಗಳ ಅನುಭವ ಮತ್ತು ಮೂರು ಸಂಶೋಧನಾ ಪ್ರಬಂಧಗಳ ಸಲ್ಲಿಕೆ ಕಡ್ಡಾಯವಾಗಿದೆ.
2. ವೈಜ್ಞಾನಿಕ ಮತ್ತು ಆರೋಗ್ಯ ವೃತ್ತಿಪರರಿಗೆ ಇನ್ನಷ್ಟು ಉನ್ನತ ಮಾನದಂಡ ಅನ್ವಯವಾಗಿದ್ದು, ಅವರು ಕನಿಷ್ಠ SR35,000 ಮಾಸಿಕ ವೇತನ ಹೊಂದಿರಬೇಕು ಹಾಗೂ ಅಂಕ ಆಧಾರಿತ ಮೌಲ್ಯಮಾಪನ ವ್ಯವಸ್ಥೆಯಲ್ಲಿ ಉತ್ತೀರ್ಣರಾಗಿರಬೇಕು.
3. ಇನ್ನೂ ಉನ್ನತ ಮಟ್ಟದಲ್ಲಿ ಕಾರ್ಯನಿರ್ವಾಹಕ ನಾಯಕತ್ವದ ಹುದ್ದೆಗಳಿಗೆ ಕನಿಷ್ಠ SR80,000 ಸಂಬಳದ ಅಗತ್ಯವಿದ್ದು, ಉದ್ಯೋಗದಾತರಿಂದ ಶಿಫಾರಸು ಪತ್ರವನ್ನು ಸಲ್ಲಿಸಬೇಕು.
ಉನ್ನತ ಮಟ್ಟದ ಪರಿಣತಿಯ ಮೇಲೆ ಕೇಂದ್ರೀಕೃತವಾದ ಕಾರ್ಯಕ್ರಮ
ಈ ಕಾರ್ಯಕ್ರಮವು ಮುಖ್ಯವಾಗಿ ವಿಜ್ಞಾನ, ಸಂಶೋಧನೆ, ಆಡಳಿತ ಮತ್ತು ಆರೋಗ್ಯ ಕ್ಷೇತ್ರಗಳಲ್ಲಿ ಪರಿಣತಿ ಹೊಂದಿರುವ ವೃತ್ತಿಪರರನ್ನು ಆಕರ್ಷಿಸುವುದಕ್ಕೆ ಕೇಂದ್ರೀಕೃತವಾಗಿದೆ. ಅವರ ಪರಿಣತಿ ಸ್ಥಳೀಯ ಸಾಮರ್ಥ್ಯವನ್ನು ಹೆಚ್ಚಿಸುವುದರ ಜೊತೆಗೆ ಜ್ಞಾನ ವರ್ಗಾವಣೆಗೆ ಸಹಕಾರಿಯಾಗುತ್ತದೆ ಎಂಬುದು ಸರ್ಕಾರದ ಅಭಿಪ್ರಾಯ. ಪ್ರೀಮಿಯಂ ರೆಸಿಡೆನ್ಸಿ ಕೇಂದ್ರದ ಪ್ರಕಾರ, ಈ ಉಪಕ್ರಮವು ಸಾರ್ವಜನಿಕ ವಲಯದಲ್ಲಿ ನವೀನತೆ ಮತ್ತು ಸಂಸ್ಥಾತ್ಮಕ ಅಭಿವೃದ್ಧಿಗೆ ಉತ್ತೇಜನ ನೀಡುವುದರ ಜೊತೆಗೆ ಅರ್ಹರಿಗೆ ವೃತ್ತಿಪರ ಹಾಗೂ ಕುಟುಂಬ ಸ್ಥಿರತೆಯನ್ನೂ ಒದಗಿಸುತ್ತದೆ.
ಐದು ವರ್ಷಗಳವರೆಗೆ ಮಾನ್ಯ!
ಈ ನಿವಾಸ ಅನುಮತಿ ಐದು ವರ್ಷಗಳವರೆಗೆ ಮಾನ್ಯವಾಗಿದ್ದು, ನಂತರ ನವೀಕರಿಸಬಹುದಾಗಿದೆ. ನಿರಂತರವಾಗಿ ಅಥವಾ ಒಟ್ಟಾರೆ ಐದು ವರ್ಷಗಳ ಅವಧಿಯಲ್ಲಿ ಕನಿಷ್ಠ 30 ತಿಂಗಳು ದೇಶದಲ್ಲಿ ವಾಸಿಸಿದವರು ಶಾಶ್ವತ ನಿವಾಸಕ್ಕೂ ಅರ್ಜಿ ಸಲ್ಲಿಸಬಹುದು.
ಕುಟುಂಬಗಳಿಗೂ ಸಿಗಲಿದೆ ಪ್ರಯೋಜನ!
ಕುಟುಂಬಗಳಿಗೆ ದೊರೆಯುವ ಸೌಲಭ್ಯಗಳು ಈ ಯೋಜನೆಯ ಪ್ರಮುಖ ವಿಶೇಷತೆಯಾಗಿದೆ. ಅರ್ಹರಿಗೆ ವಲಸಿಗ ಮತ್ತು ಅವಲಂಬಿತ ಶುಲ್ಕ ವಿನಾಯಿತಿ, ವೀಸಾ ಇಲ್ಲದೆ ಸ್ವಯಂ ಪ್ರಾಯೋಜಿತ ಪ್ರವೇಶ-ನಿರ್ಗಮನ, ವಿಶೇಷ ಪ್ರವೇಶ ಲೇನ್ಗಳು, ಉದ್ಯೋಗ ಬದಲಾಯಿಸುವ ಸ್ವಾತಂತ್ರ್ಯ, ಆಸ್ತಿ ಖರೀದಿ ಹಾಗೂ ವ್ಯಾಪಾರ ಚಟುವಟಿಕೆಗಳ ಅವಕಾಶ ದೊರೆಯುತ್ತವೆ. ಈ ಪ್ರಯೋಜನಗಳು ಪೋಷಕರು ಮತ್ತು 25 ವರ್ಷ ವಯಸ್ಸಿನವರೆಗಿನ ಮಕ್ಕಳಿಗೂ ವಿಸ್ತರಿಸಲ್ಪಡುತ್ತವೆ.
ವಿಶೇಷ ವಾಸ ಯೋಜನೆ!
“ಅಸಾಧಾರಣ ಪ್ರತಿಭೆ ನಿವಾಸ” ಯೋಜನೆಯ ಅಡಿಯಲ್ಲಿ ಅರ್ಜಿ ಶುಲ್ಕ SR4,000 ಆಗಿದ್ದು (ಅರಬ್ ಮೂಲಬೆಲೆಯಲ್ಲಿ), ಇದು ಸಾಮಾನ್ಯ ಉದ್ಯೋಗ ವೀಸಾ ಯೋಜನೆಯಲ್ಲ. ಬದಲಾಗಿ ಅತ್ಯುತ್ತಮ ಪರಿಣತಿ ಹೊಂದಿದ ಹಿರಿಯ ವೃತ್ತಿಪರರನ್ನು ಆಯ್ದು ಸೆಳೆಯುವ ಉದ್ದೇಶದ ವಿಶೇಷ ವ್ಯವಸ್ಥೆಯಾಗಿದೆ. ದೇಶವು ವಿಶ್ವದ ಪ್ರತಿಭಾವಂತರನ್ನು ಆಕರ್ಷಿಸುವ ಪ್ರಮುಖ ಕೇಂದ್ರವಾಗಲು ಪ್ರಯತ್ನಿಸುತ್ತಿದೆ. ಅದಕ್ಕಾಗಿ ಒಂದು ಕಡೆ ಉತ್ತಮ ಗುಣಮಟ್ಟದ ನಿಯಮಗಳನ್ನು ಕಾಪಾಡುತ್ತಾ, ಈ ಕಾರ್ಯಕ್ರಮದಲ್ಲಿ ಭಾಗವಹಿಸುವ ಸಂಸ್ಥೆಗಳ ಸಂಖ್ಯೆಯನ್ನು ಹೆಚ್ಚಿಸುವ ಕ್ರಮವನ್ನು ತೆಗೆದುಕೊಂಡಿದೆ.
