ಆದರೆ ಕೆಲವೊಂದು ಸಾರಿ ಉದ್ಯೋಗದ ಪ್ರಯಾಣ ಕೆಲವರಿಗೆ ಅಷ್ಟೊಂದು ಸುಖಕರವಾದ ಪ್ರಯಾಣವಾಗಿರುವುದಿಲ್ಲ. ಕೆಲವರು ಕೆಲಸವನ್ನು ಕಲಿತುಕೊಂಡು ಹಂತ ಹಂತವಾಗಿ ಬಡ್ತಿ ಪಡೆಯುತ್ತಾ ಅಭಿವೃದ್ದಿ ಹೊಂದುತ್ತಾ ಮುಂದಕ್ಕೆ ಸಾಗುತ್ತಾರೆ.
ಇನ್ನೂ ಕೆಲ ಉದ್ಯೋಗಿಗಳು ಇದಕ್ಕೆ ವಿರುದ್ಧ ಎಂಬಂತೆ ಒಳ್ಳೆಯ ಕಂಪನಿಯಲ್ಲಿ ಕೆಲಸ ಮಾಡುವ ಒಂದು ಅವಕಾಶವನ್ನು ಪಡೆಯುವುದಕ್ಕೆ ಕೂಡ ತುಂಬಾನೇ ಪ್ರಯತ್ನ ಪಡಬೇಕಾಗುತ್ತದೆ.
ಅರೇ ಈಗೇಕೆ ಇದರ ಬಗ್ಗೆ ಚರ್ಚೆ ಅಂತೀರಾ? ಬೆಂಗಳೂರಿನ 26 ವರ್ಷದ ಸಾಫ್ಟ್ವೇರ್ ಡೆವಲಪರ್ ಕೇವಲ ಮೂರೇ ಮೂರು ವರ್ಷಗಳಲ್ಲಿ ಕೆಲಸಗಳನ್ನು ಬದಲಾಯಿಸುತ್ತಾ ಮತ್ತು ಹೊಸ ಹೊಸ ರೀತಿಯ ಕೌಶಲ್ಯಗಳನ್ನು ಕರಗತ ಮಾಡಿಕೊಳ್ಳುತ್ತಾ ಮುಂದಕ್ಕೆ ಸಾಗಿ ವರ್ಷಕ್ಕೆ 3.2 ಲಕ್ಷ ಸಂಬಳದ ಪ್ಯಾಕೇಜಿನಿಂದ 80 ಲಕ್ಷ ರೂಪಾಯಿ ಸಂಬಳದ ಪ್ಯಾಕೇಜಿನ ದೊಡ್ಡ ಏಣಿಯನ್ನು ಹತ್ತುವ ಮೂಲಕ ಯಶಸ್ಸಿನ ಶಿಖರವನ್ನು ಹತ್ತಿ ನಿಂತಿದ್ದಾರೆ.
ಈಗ ಅವರು ತಮ್ಮ ವೃತ್ತಿಜೀವನದ ಪಥದ ವಿವರವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡ ನಂತರ ವೈರಲ್ ಆಗಿದೆಯಂತೆ ನೋಡಿ.
ಪ್ರಸ್ತುತ ಗೂಗಲ್ನಲ್ಲಿ ಕೆಲಸ ಮಾಡುತ್ತಿರುವ ಅರ್ಕಾ ಮಜುಂದಾರ್, ಕಂಪನಿಗೆ ನಿಷ್ಠರಾಗಿರುವುದು ಪ್ಯಾಕೇಜ್ ಅನ್ನು ಹೆಚ್ಚಿಸುವುದಿಲ್ಲ ಎಂದು ಹೇಳಿದ್ದಾರೆ.
ಇನ್ಸ್ಟಾಗ್ರಾಮ್ನಲ್ಲಿನ ವಿಡಿಯೋದಲ್ಲಿ, ಅವರು 23 ವರ್ಷ ವಯಸ್ಸಿನಲ್ಲಿ ಟಿಸಿಎಸ್ ಕಂಪನಿಯಲ್ಲಿ ಕೆಲಸಕ್ಕೆ ಸೇರಿಕೊಂಡರು ಮತ್ತು ಅವರ ಸಂಬಳ ಆಗ ಬರೀ ವರ್ಷಕ್ಕೆ 3.2 ಲಕ್ಷ ರೂಪಾಯಿ ಅಷ್ಟೇ ಆಗಿತ್ತು ಎಂದು ಹಂಚಿಕೊಂಡಿದ್ದಾರೆ.
ಎರಡು ವರ್ಷಗಳ ನಂತರ, ಅರ್ಕಾ ಕುಕು ಎಫ್ಎಂನಲ್ಲಿ ಕೆಲಸಕ್ಕೆ ಸೇರಿಕೊಂಡರು, ಅಲ್ಲಿ ಅವರು ವರ್ಷಕ್ಕೆ 14 ಲಕ್ಷ ರೂಪಾಯಿ ಸಂಬಳ ಪಡೆದರು.
ಈಗ ಅಂತಿಮವಾಗಿ ಅವರ ಸಂಬಳದ ಪ್ಯಾಕೇಜ್ ವರ್ಷಕ್ಕೆ 80 ಲಕ್ಷ ರೂಪಾಯಿ ಆಗಿದೆ ಮತ್ತು ಈಗ ಅವರು ಗೂಗಲ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದಾರಂತೆ.
ಅರ್ಕಾ 2021 ರಲ್ಲಿ ಟಿಸಿಎಸ್ನ ನಿಂಜಾ ಕಾರ್ಯಕ್ರಮದ ಮೂಲಕ ಸಹಾಯಕ ಸಿಸ್ಟಮ್ ಎಂಜಿನಿಯರ್ ಆಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಕಾಲೇಜಿನಿಂದ ಹೊರಬಂದ ಅವರು ಕಣ್ಣಿಗೆ ಬಿದ್ದ ಕೌಶಲ್ಯಗಳ ಬಗ್ಗೆ ಕಲಿತುಕೊಳ್ಳಲು ತುಂಬಾನೇ ಉತ್ಸುಕರಾಗಿದ್ದರು ಅಂತ ಹೇಳಿಕೊಂಡರು.
2022ರಲ್ಲಿ, ಅವರು ಟಿಸಿಎಸ್ನ ಡಿಜಿಟಲ್ ಪ್ರೋಗ್ರಾಂ (ವಿಂಗ್ಸ್ 1) ಅನ್ನು ಪೂರ್ಣಗೊಳಿಸಿದ ನಂತರ ಸಿಸ್ಟಮ್ ಎಂಜಿನಿಯರ್ ಆಗಿ ಬಡ್ತಿ ಪಡೆದರು, ಇದು ಅವರ ಸಂಬಳವನ್ನು ಸುಮಾರು 7 ಲಕ್ಷ ರೂಪಾಯಿಗೆ ಹೆಚ್ಚಿಸಿತು.
2025 ರಲ್ಲಿ, ಅರ್ಕಾ ವರ್ಷಕ್ಕೆ 80 ಲಕ್ಷ ರೂಪಾಯಿಯ ಪ್ಯಾಕೇಜ್ನೊಂದಿಗೆ ಗೂಗಲ್ ಕಂಪನಿಗೆ ಕೆಲಸಕ್ಕೆ ಸೇರಿದರು. ಇದನ್ನು ಅವರ ವೃತ್ತಿಜೀವನದ ಅತಿದೊಡ್ಡ ಜಿಗಿತ ಅಂತ ಅವರು ಹೇಳಿದರು.
‘ಪ್ರತಿಯೊಬ್ಬ ಬಿಟೆಕ್ ವಿದ್ಯಾರ್ಥಿಯಂತೆ ನಾನು ಕಾಲೇಜಿನಲ್ಲಿ ಗೂಗಲ್ ಕಂಪನಿಯಲ್ಲಿ ಕೆಲಸ ಮಾಡುವ ಕನಸನ್ನು ಹೊಂದಿದ್ದೆ. ಆದರೆ ಮಾರ್ಗದರ್ಶನದ ಕೊರತೆ ತುಂಬಾನೇ ಇತ್ತು ಮತ್ತು ಮೊದಲು ಸಿಕ್ಕ ಕೆಲಸವನ್ನು ಮಾಡಬೇಕಾಯಿತು.
