ಆದರೆ ಮನೆಯಿಂದ ಕೆಲಸ ಮಾಡುವುದು ಎಂಬ ಪದ್ಧತಿ ದಿನಕ್ಕೆ ನಿಯಮಿತ ಒಂಭತ್ತು ಗಂಟೆಗಳ ಕಾಲ ಮಾತ್ರ ಕೆಲಸ ಮಾಡುವುದನ್ನು ಮಿತಿಗೊಳಿಸಿದೆಯೇ? ಅಥವಾ ಉದ್ಯೋಗಿ ಅದಕ್ಕಿಂತ ಹೆಚ್ಚು ಸಮಯ ಕೆಲಸ ಮಾಡಬೇಕಾದ ಅನಿವಾರ್ಯತೆಯನ್ನು ಸೃಷ್ಟಿಸಿದೆಯೇ ಎಂಬ ಸಂದೇಹವನ್ನು ಉಂಟುಮಾಡಿದೆ.
ಕೆಲವೊಂದು ಸಂಶೋಧನೆಗಳು ಹಾಗೂ ಸಮೀಕ್ಷೆಗಳು, ವರ್ಕ್ ಫ್ರಮ್ ಹೋಮ್ನ ಅಹಿತಕರ ಸತ್ಯಗಳನ್ನು ಬಹಿರಂಗಪಡಿಸಿದ್ದು ಯಾವುದೇ ರಚನೆ ಇಲ್ಲದ, ಫ್ಲೆಕ್ಸಿಬಲ್ ಉದ್ಯೋಗ ಸಮಯಗಳು ಉತ್ತಮ ಅಂಶಕ್ಕಿಂತ ಕೆಟ್ಟದ್ದನ್ನು ಮಾಡುತ್ತಿದೆ ಎಂದಾಗಿದೆ.
ವರ್ಕ್ ಫ್ರಮ್ ಹೋಮ್ ಪ್ರಯೋಜನಕ್ಕಿಂತ ಹೆಚ್ಚು ಮಾರಕವಾಗಿದ್ದು, ಕೆಲಸದ ಅವಧಿಯನ್ನು ವಿಸ್ತರಿಸಿದೆ. ಬೇಗನೇ ಲಾಗಿನ್ ಆಗುವುದು ಹಾಗೂ ತಡವಾಗಿ ಲಾಗ್ ಔಟ್ ಆಗುವುದು ತಡರಾತ್ರಿಯವರೆಗೆ ಮೆಸೇಜ್ಗಳಿಗೆ ಉತ್ತರಿಸುವುದು, ಸಂಪರ್ಕ ಕಡಿತಗೊಳಿಸಲು ಕಷ್ಟಪಡುವಂತಾಗಿದೆ ಎಂದು ವಿವಿಧ ವಲಯಗಳ ಉದ್ಯೋಗಿಗಳೇ ಮಾಹಿತಿ ನೀಡಿದ್ದಾರೆ.
ಬೆಂಗಳೂರಿನ ತಂತ್ರಜ್ಞಾನ ವ್ಯವಸ್ಥಾಪಕರೊಬ್ಬರು ತಮ್ಮ ಕೆಲಸದ ವಿಧಾನದ ಬಗ್ಗೆ ಹೇಳಿಕೊಂಡಿದ್ದು, ನನ್ನ ಕೆಲಸದ ವೇಳಾಪಟ್ಟಿ ಹೊಂದಿಕೊಳ್ಳುವಂತಿದ್ದರೂ, ನಾನು ಒಂದೇ ಸಮನೆ ಕೆಲಸ ಮಾಡುತ್ತಿದ್ದೇನೆ ಎಂದು ನನಗನ್ನಿಸುತ್ತಿದೆ ಎಂದಿದ್ದಾರೆ. ಜೀವನ ಹಾಗೂ ಕೆಲಸದ ನಡುವಿನ ಅಂತರ ಕಾಣಿಸುತ್ತಿಲ್ಲ ಎಲ್ಲವೂ ಮಿಶ್ರವಾಗಿದೆ ಎನ್ನುತ್ತಾರೆ.
ನೋಯ್ಡಾದ ಬಹುರಾಷ್ಟ್ರೀಯ ಕಂಪನಿಯೊಂದರಲ್ಲಿ ಕೆಲಸ ಮಾಡುವ ಹರೀಶ್, ವರ್ಕ್ ಫ್ರಮ್ ಹೋಮ್ ಯಾವಾಗ ಒಳ್ಳೆಯದು ಎಂದರೆ ನಿಮಗೆ ವಿಶ್ರಾಂತಿ ಮಾಡಲು ಸಮಯ ದೊರೆಯಬೇಕು ಹಾಗೂ ಹೆಚ್ಚಿನ ಒತ್ತಡವನ್ನುಂಟು ಮಾಡಬಾರದು, ಕೆಲಸ ಮಾಡುವುದು ಅಸಮಂಜಸ ಎಂದೆನ್ನಿಸಬಾರದು ಎಂದಿದ್ದಾರೆ.
ತಮ್ಮ ಹಿಂದಿನ ಕಚೇರಿಯಲ್ಲಿ ಅಧಿಕೃತವಾಗಿ ಕಚೇರಿ ಸಮಯ 9.30ಕ್ಕೆ ಆರಂಭವಾಗುತ್ತಿತ್ತು ಆದರೆ ಮುಕ್ತಾಯ ಸಮಯ ಎಂದಿಗೂ ನಿರ್ದಿಷ್ಟವಾಗಿರಲಿಲ್ಲ.
ಸಂದರ್ಶನಗಳನ್ನು ಹೆಚ್ಚಾಗಿ ಸಂಜೆ 7 ಗಂಟೆಯ ನಂತರ ನಿಗದಿಪಡಿಸಲಾಗುತ್ತಿತ್ತು ಹೀಗಾಗಿ ಊಟಕ್ಕೂ ವಿರಾಮ ದೊರೆಯದಂತಾಯಿತು, ವಿಶ್ರಾಂತಿಯೂ ಇಲ್ಲದಂತೆ ದುಡಿಯುವ ಪರಿಸ್ಥಿತಿ ಬಂದೊದಗಿತು, ರಾತ್ರಿ ನಿದ್ರೆ ಕೂಡ ದೂರವಾಯಿತು ಎಂದಿದ್ದಾರೆ.
ಒಟ್ಟಿನಲ್ಲಿ ನೀವು ಮನೆಯಿಂದಲೇ ತಾನೇ ಕೆಲಸ ಮಾಡುವುದು ರಾತ್ರಿ 9 ಕ್ಕೂ ನಾವು ಹೇಳಿದ ಕೆಲಸ ಮಾಡಬಹುದಲ್ಲವೇ ಎನ್ನುವಷ್ಟರ ಮಟ್ಟಿಗೆ ನಮ್ಮನ್ನು ಗ್ರಾಂಟೆಡ್ ಆಗಿ ತೆಗೆದುಕೊಳ್ಳಲಾರಂಭಿಸಿದರು ಎಂದಿದ್ದಾರೆ.
ಹಾರ್ವರ್ಡ್-ಸಂಬಂಧಿತ ಸಂಶೋಧನೆಯು ಮನೆಯಿಂದ ಕೆಲಸ ಮಾಡುವ ಉದ್ಯೋಗಿಗಳಿಗೆ ಆರಂಭ ಹಾಗೂ ಕೆಲಸದ ಅಂತ್ಯದ ಸಮಯವನ್ನು ಸರಿಯಾಗಿ ನಿರ್ದಿಷ್ಟಪಡಿಸದೇ ಇರುವುದು ಅವರ ವೈಯಕ್ತಿಕ ಹಾಗೂ ಕಚೇರಿ ಕೆಲಸದ ನಡುವೆ ಗಾಢ ಅಂತರವನ್ನು ಸೃಷ್ಟಿಸುತ್ತದೆ ಎಂದಿದೆ.
ಇಮೇಲ್ಗಳು, ಸ್ಲಾಕ್ ಸಂದೇಶಗಳು ಮತ್ತು ತಡರಾತ್ರಿಯ ಕರೆಗಳು ಉದ್ಯೋಗಿ ಎಲ್ಲಾ ಸಮಯವೂ ಕೆಲಸಕ್ಕೆ ಲಭ್ಯವಿದ್ದಾರೆ ಎಂಬುದನ್ನು ಸೂಚಿಸುತ್ತದೆ, ಇದರಿಂದ ಮಾನಸಿಕವಾಗಿ ಹಾಗೂ ದೈಹಿಕವಾಗಿ ನಮ್ಮನ್ನು ಪುನಶ್ಚೇತನಗೊಳಿಸಲು ಕಷ್ಟವಾಗುತ್ತದೆ ಎಂದು ತಿಳಿಸಿದೆ.
ಇನ್ನು ಹಿರಿಯ ಉದ್ಯೋಗಿಗಳು ಕೂಡ ಇದರಿಂದ ದುರ್ಬಲತೆಯನ್ನು ಪಡೆದುಕೊಂಡಿದ್ದು, ಮುಂಬೈನ ಕಾರ್ಪೋರೇಟ್ ಉದ್ಯೋಗಿಯೊಬ್ಬರು ಹೀಗೆ ಹೇಳುತ್ತಾರೆ, ನನ್ನ ದಿನ ಬೇಗನೇ ಆರಂಭವಾಗುತ್ತದೆ.
ಆದರೆ ಕೆಲಸ ಮುಗಿಸುವುದು ಮಧ್ಯರಾತ್ರಿಯ ಸಮಯವನ್ನು ಮೀರುತ್ತದೆ. ಇದರಿಂದ ವಿಶ್ರಾಂತಿಗೆ ಸಮಯವಿರುವುದಿಲ್ಲ, ಸರಿಯಾದ ಸಮಯಕ್ಕೆ ನಿದ್ರಿಸಲಾಗುತ್ತಿಲ್ಲ ಎನ್ನುತ್ತಾರೆ.
ಹೆಚ್ಚು ಶಿಸ್ತಿನ, ಜಂಜಾಟಗಳಿಲ್ಲದ ಉದ್ಯೋಗಿಗಳು ಇದರಿಂದ ಉತ್ತಮ ಸಾಧನೆ ಮಾಡಬಹುದು ಆದರೆ ಎಲ್ಲರಿಗೂ ಇದು ಸರಿಯಾಗಿ ಹೊಂದಿಕೆಯಾಗುವುದಿಲ್ಲ. ಅತಿಯಾದ ಕೆಲಸ ಹಾಗೂ ವಿಶ್ರಾಂತಿ ಇಲ್ಲದಿರುವುದು ಅವರನ್ನು ಕಂಗೆಡಿಸಬಹುದು.
ಉದ್ಯೋಗದಾತರ ದೃಷ್ಟಿಕೋನದಿಂದ, ಫ್ಲೆಕ್ಸಿಬಲ್ ಟೈಮಿಂಗ್ ಕೆಲಸವನ್ನು ಪ್ರಗತಿಪರ ಪ್ರಯೋಜನವೆಂದು ಪರಿಗಣಿಸಲಾಗುತ್ತದೆ.
ಆದರೆ ಕಳಪೆ ಆಡಳಿತ ನಡೆಸಿದಾಗ, ಅದು ವೆಚ್ಚ-ಉಳಿತಾಯ ಕಾರ್ಯವಿಧಾನವಾಗಬಹುದು, ಅದು ಸಮತೋಲನದ ಜವಾಬ್ದಾರಿಯನ್ನು ಸಂಪೂರ್ಣವಾಗಿ ಉದ್ಯೋಗಿಗಳ ಮೇಲೆ ವರ್ಗಾಯಿಸುತ್ತದೆ.
ಈ ಫ್ಲೆಕ್ಸಿಬಿಲಿಟಿ ಎನ್ನುವುದು ಕೆಲಸದ ಅವಧಿಯನ್ನು ಸರಿಯಾಗಿ ಹಂಚುವ ಬದಲಿಗೆ ಅದನ್ನು ವಿಸ್ತರಿಸುತ್ತಿದೆ, ಇದು ಹೊರೆಯಾಗುತ್ತದೆ ಎಂದು ಭಾರತೀಯ ಸ್ಟಾರ್ಟಪ್ನ ಹಿರಿಯ ಮ್ಯಾನೇಜರ್ ಹೇಳುತ್ತಾರೆ.
ಫ್ಲೆಕ್ಸಿಬಲ್ ಕೆಲಸ ಪದ್ಧತಿಯನ್ನು ತ್ಯಜಿಸುವುದಲ್ಲ ಬದಲಿಗೆ ಮರುವಿನ್ಯಾಸಗೊಳಿಸುವುದೇ ಇದಕ್ಕಿರುವ ಪರಿಹಾರ ಎಂದು ತಜ್ಞರು ಸೂಚಿಸುತ್ತಾರೆ.
ಒಂದು ಸ್ಪಷ್ಟ ಮಾನದಂಡಗಳು, ಕೆಲಸವನ್ನು ನಿಲ್ಲಿಸುವ ಸರಿಯಾದ ಸಮಯ, ಫಲಿತಾಂಶ-ಆಧಾರಿತ ಮೌಲ್ಯಮಾಪನಗಳು, ಬೌಂಡರಿಗಳನ್ನು ಮಾಪನ ಮಾಡಲು ತರಬೇತಿ ಪಡೆದ ವ್ಯವಸ್ಥಾಪಕರು ಬೇಕು ಇದಿಲ್ಲದೆ ಫ್ಲೆಕ್ಸಿಬಲ್ ವರ್ಕ್ ಸಾಧ್ಯವಿಲ್ಲ ಎಂದಿದ್ದಾರೆ.
ಇಂತಹ ಸಮಯಕ್ಕೆ ಕೆಲಸ ಮಾಡಬಹುದು ಎಂಬುದು ಒಳ್ಳೆಯ ವಿಷಯವಾದರೂ ಬೌಂಡರಿ ಎಂಬುದು ಬೇಕಾಗುತ್ತದೆ, ಇಂತಿಷ್ಟೇ ಹೊತ್ತು ಕೆಲಸ ಮಾಡಬೇಕು ಎಂಬ ನಿಯಮ ವಿಧಿಸುವುದು ಮನೆಯಿಂದ ಮಾಡುವ ಕೆಲಸವನ್ನು ಹೊರೆಯಾಗಿಸದೆ ಸುಲಭಗೊಳಿಸುತ್ತದೆ ಎಂದು ಸಾಫ್ಟ್ವೇರ್ ಎಂಜಿನಿಯರ್ ಒಬ್ಬರು ತಿಳಿಸಿದ್ದಾರೆ.
