Last Updated:
RRB 2026 ಪರೀಕ್ಷಾ ಕ್ಯಾಲೆಂಡರ್ ಬಿಡುಗಡೆ, ALP, Technician, JE ಸೇರಿದಂತೆ ವಿವಿಧ ಹುದ್ದೆಗಳ ನೇಮಕಾತಿ ವಿವರಗಳು ಮತ್ತು ಪರೀಕ್ಷಾ ಅವಧಿ ಮಾಹಿತಿ ಇಲ್ಲಿದೆ.
ಗಳುರೈಲ್ವೆಯಲ್ಲಿ ಸರ್ಕಾರಿ ಉದ್ಯೋಗದ ಕನಸು ಕಾಣುತ್ತಿರುವ ಲಕ್ಷಾಂತರ ಯುವಕರಿಗೆ ರೈಲ್ವೆ ನೇಮಕಾತಿ ಮಂಡಳಿ (RRB) ಮಹತ್ವದ ಸುದ್ದಿಯನ್ನು ನೀಡಿದೆ. 2026ರಲ್ಲಿ ನಡೆಯಲಿರುವ ವಿವಿಧ ನೇಮಕಾತಿ ಪರೀಕ್ಷೆಗಳಿಗಾಗಿ RRB ತಾತ್ಕಾಲಿಕ ಪರೀಕ್ಷಾ ಕ್ಯಾಲೆಂಡರ್ ಅನ್ನು ಬಿಡುಗಡೆ ಮಾಡಿದೆ. ಪರೀಕ್ಷಾ ದಿನಾಂಕಗಳು ಹಾಗೂ ಅಧಿಸೂಚನೆಗಳ (Notification) ಬಗ್ಗೆ ದೀರ್ಘಕಾಲದಿಂದ ಉಂಟಾಗಿದ್ದ ಗೊಂದಲಕ್ಕೆ ಈ ಕ್ಯಾಲೆಂಡರ್ ಒಂದು ಮಟ್ಟಿಗೆ ತೆರೆ ಎಳೆದಿದ್ದು, ಅಭ್ಯರ್ಥಿಗಳಲ್ಲಿ ಹೊಸ ಆತ್ಮವಿಶ್ವಾಸವನ್ನು ಮೂಡಿಸುವಂತಿದೆ. ಈ ಕ್ಯಾಲೆಂಡರ್ (Calender) ಬಿಡುಗಡೆ ಆಗಿರುವುದರಿಂದ, ಮುಂಬರುವ ವರ್ಷದಲ್ಲಿ ಯಾವ ಹುದ್ದೆಗಳಿಗೆ ಯಾವ ಅವಧಿಯಲ್ಲಿ ಪರೀಕ್ಷೆ ನಡೆಯುವ ಸಾಧ್ಯತೆ ಇದೆ ಎಂಬ ಬಗ್ಗೆ ವಿದ್ಯಾರ್ಥಿಗಳಿಗೆ ಸ್ಪಷ್ಟ ಕಲ್ಪನೆ ಸಿಗುತ್ತದೆ. ಪರಿಣಾಮಕಾರಿಯಾಗಿ ಅಧ್ಯಯನ ವೇಳಾಪಟ್ಟಿಯನ್ನು ರೂಪಿಸಲು ಮತ್ತು ಸಿದ್ಧತೆಯನ್ನು ಹಂತ ಹಂತವಾಗಿ ಮುನ್ನಡೆಸಲು ಇದು ಸಹಾಯವಾಗಲಿದೆ. ಈ ಹಿನ್ನೆಲೆಯಲ್ಲಿ ಯಾವ ಪರೀಕ್ಷೆ ಯಾವಾಗ ಜರುಗುತ್ತವೆ ಎನ್ನುವುದನ್ನು ತಿಳಿಯೋಣ ಬನ್ನಿ.
RRB ಪರೀಕ್ಷಾ ಕ್ಯಾಲೆಂಡರ್ 2026ರ ಪ್ರಕಾರ, ವರ್ಷವಿಡೀ ವಿವಿಧ ನೇಮಕಾತಿಗಳನ್ನು ಹಂತ ಹಂತವಾಗಿ ನಡೆಸಲು ಯೋಜಿಸಲಾಗಿದೆ. ಸಹಾಯಕ ಲೋಕೋ ಪೈಲಟ್ (ALP) ಹುದ್ದೆಗಳ ನೇಮಕಾತಿ ಪ್ರಕ್ರಿಯೆಯು ಜನವರಿಯಿಂದ ಮಾರ್ಚ್ ನಡುವೆ ನಡೆಯಲಿದೆ. ಈ ಹುದ್ದೆಗಳ ಖಾಲಿ ಸ್ಥಾನಗಳನ್ನು ಡಿಸೆಂಬರ್ 2025ರಲ್ಲಿ ಆನ್ಲೈನ್ ಇಂಟಿಗ್ರೇಟೆಡ್ ರೈಲ್ವೆ ಮ್ಯಾನೇಜ್ಮೆಂಟ್ ಸಿಸ್ಟಮ್ (OIRMS) ಮೂಲಕ ಅಂತಿಮಗೊಳಿಸಲಾಗುತ್ತದೆ. ಫೆಬ್ರವರಿ 2026ರಲ್ಲಿ ಕರಡು ಅಧಿಸೂಚನೆ ಸಿದ್ಧಪಡಿಸುವ ಸಾಧ್ಯತೆ ಇದೆ. ಅಲ್ಲದೇ ನೇಮಕಾತಿ ಪ್ರಕ್ರಿಯೆಯನ್ನು ಹೆಚ್ಚು ಪಾರದರ್ಶಕ, ವ್ಯವಸ್ಥಿತ ಮತ್ತು ಸಕಾಲಿಕವಾಗಿಸಲು ರೈಲ್ವೆ ಮಂಡಳಿ ಕೈಗೊಂಡಿರುವ ಈ ಕ್ರಮವನ್ನು ಮಹತ್ವದ ಸುಧಾರಣೆ ಎಂದು ಪರಿಗಣಿಸಲಾಗಿದೆ.
ತಂತ್ರಜ್ಞ (Technician) ಮತ್ತು ವಿಭಾಗ ನಿಯಂತ್ರಕ (Controller) ಹುದ್ದೆಗಳ ನೇಮಕಾತಿಯನ್ನು ಏಪ್ರಿಲ್ನಿಂದ ಜೂನ್ ಅವಧಿಯಲ್ಲಿ ನಡೆಸಲು ಯೋಜಿಸಲಾಗಿದೆ. ಜುಲೈ ಮತ್ತು ಸೆಪ್ಟೆಂಬರ್ ನಡುವೆ ಜೂನಿಯರ್ ಎಂಜಿನಿಯರ್ (JE), ಡಿಪೋ ಮೆಟೀರಿಯಲ್ ಸೂಪರಿಂಟೆಂಡೆಂಟ್ (DMS), ಕೆಮಿಕಲ್ ಮತ್ತು ಮೆಟಲರ್ಜಿಕಲ್ ಅಸಿಸ್ಟೆಂಟ್ (CMA), ಪ್ಯಾರಾಮೆಡಿಕಲ್ ಸಿಬ್ಬಂದಿ ಹಾಗೂ NTPC (ಪದವಿ ಮತ್ತು ಪದವಿಪೂರ್ವ) ಹುದ್ದೆಗಳ ನೇಮಕಾತಿ ನಡೆಯಲಿದೆ.
ಅಕ್ಟೋಬರ್ನಿಂದ ಡಿಸೆಂಬರ್ 2026ರ ನಡುವೆ ಮಂತ್ರಿ ಮತ್ತು ಪ್ರತ್ಯೇಕ ವಿಭಾಗಗಳು ಹಾಗೂ ಲೆವೆಲ್-1 ಹುದ್ದೆಗಳ ನೇಮಕಾತಿ ಪ್ರಕ್ರಿಯೆ ಆರಂಭವಾಗಲಿದೆ ಎಂದು ಕ್ಯಾಲೆಂಡರ್ ಸೂಚಿಸುತ್ತದೆ. ಆದರೆ, ಪ್ರತಿಯೊಂದು ಪರೀಕ್ಷೆಯ ನಿಖರ ದಿನಾಂಕಗಳು ಮತ್ತು ಅಧಿಸೂಚನೆಗಳನ್ನು ಆಯಾ RRB ಘಟಕಗಳು ಪ್ರತ್ಯೇಕವಾಗಿ ಅಧಿಕೃತವಾಗಿ ಪ್ರಕಟಿಸುವುದಾಗಿ ರೈಲ್ವೆ ಮಂಡಳಿ ಸ್ಪಷ್ಟಪಡಿಸಿದೆ.
ನೇಮಕಾತಿ ಪ್ರಕ್ರಿಯೆಯನ್ನು ಸಕಾಲಿಕವಾಗಿ ಪೂರ್ಣಗೊಳಿಸುವುದಕ್ಕೆ ರೈಲ್ವೆ ಮಂಡಳಿ ಹೆಚ್ಚಿನ ಒತ್ತು ನೀಡಿದೆ. ಎಲ್ಲಾ ವಲಯ ರೈಲ್ವೆಗಳು ಮತ್ತು ಉತ್ಪಾದನಾ ಘಟಕಗಳಿಗೆ ತಮ್ಮ ಖಾಲಿ ಹುದ್ದೆಗಳ ಮೌಲ್ಯಮಾಪನವನ್ನು ನಿಗದಿತ ಸಮಯದೊಳಗೆ ಪೂರ್ಣಗೊಳಿಸಲು ಸೂಚಿಸಲಾಗಿದೆ. ಸಂಪೂರ್ಣ ಪ್ರಕ್ರಿಯೆಯನ್ನು OIRMS ಮೂಲಕ ನಡೆಸುವುದರಿಂದ, ಎಲ್ಲಾ ಖಾಲಿ ಹುದ್ದೆಗಳು ಒಂದೇ ವೇದಿಕೆಯಲ್ಲಿ ಲಭ್ಯವಾಗಲಿದ್ದು, ನೇಮಕಾತಿ ಪ್ರಕ್ರಿಯೆ ಸರಳ, ವೇಗ ಮತ್ತು ಪಾರದರ್ಶಕವಾಗಲಿದೆ ಎಂಬ ನಿರೀಕ್ಷೆ ಇದೆ ಎಂದು ರೈಲ್ವೆ ಇಲಾಖೆ ತಿಳಿಸಿದೆ.
ಒಟ್ಟಿನಲ್ಲಿ, RRB 2026 ಪರೀಕ್ಷಾ ಕ್ಯಾಲೆಂಡರ್ ರೈಲ್ವೆ ಉದ್ಯೋಗಾಕಾಂಕ್ಷಿಗಳಿಗೆ ಮುಂಚಿತ ಯೋಜನೆ ರೂಪಿಸಿಕೊಳ್ಳಲು ನೆರವಾಗುವ ಮಹತ್ವದ ಮಾರ್ಗಸೂಚಿಯಾಗಿದೆ. ಈ ನಿಟ್ಟಿನಲ್ಲಿ ಅಭ್ಯರ್ಥಿಗಳು ಈ ಮುನ್ನೆಚ್ಚರಿಕೆಯ ಘಂಟೆಯನ್ನು ಹೇಗೆ ತೆಗೆದುಕೊಂಡು ಸಫಲರಾಗುತ್ತಾರೆ ಎನ್ನುವುದರ ಮೇಲೆ ನಿಂತಿದೆ.
Bangalore [Bangalore],Bangalore,Karnataka
December 14, 2025 2:28 PM IST
