Last Updated:
ಎಐ ತಂತ್ರಜ್ಞಾನದ ಹಾವಳಿಯ ನಡುವೆ, ಇಂತಹ ಪರ್ಯಾಯ ವೃತ್ತಿಗಳು ಜನರಿಗೆ ಹೊಸ ಭರವಸೆ ನೀಡುತ್ತಿವೆ. ಕಂಪನಿಯ ಕೆಲಸ ‘ಪ್ರೈಮರಿ ಟ್ಯಾಬ್’ ಆಗಿದ್ದರೆ, ಸೈಡ್ ಹಸ್ಟಲ್ ಎನ್ನುವುದು ‘ಸೆಕೆಂಡ್ ಟ್ಯಾಬ್’ ಆಗಿ ಮಾರ್ಪಟ್ಟಿದೆ. ಬದಲಾಗುತ್ತಿರುವ ಈ ಕೆಲಸದ ಸಂಸ್ಕೃತಿಯನ್ನು ನಾವೆಲ್ಲರೂ ಒಪ್ಪಿಕೊಳ್ಳಲೇಬೇಕಿದೆ.
ಸಂಜೆ 6 ಗಂಟೆ ಆಯಿತೆಂದರೆ ಸಾಕು, ಕಚೇರಿ ಕೆಲಸ (Office Work) ಮುಗಿಸಿ ಮನೆಗೆ ಓಡುವ ಕಾಲ ಈಗ ಮರೆಯಾಗಿದೆ. ಈಗಿನ ಯುವ ಪೀಳಿಗೆಗೆ ಒಂದೇ ಕೆಲಸದಲ್ಲಿ ನೆಮ್ಮದಿ ಇಲ್ಲ ಅಥವಾ ಒಂದೇ ಆದಾಯ ಸಾಲದು ಎಂಬ ಭಾವನೆ (Feel) ಮೂಡಿದೆ. ಎಐ (AI) ತಂತ್ರಜ್ಞಾನದ ಹಾವಳಿ ಮತ್ತು ಕಂಪನಿಗಳಲ್ಲಿ (Company) ಆಗಾಗ ನಡೆಯುತ್ತಿರುವ ಉದ್ಯೋಗ ಕಡಿತದಿಂದಾಗಿ ಜನರು ತಮ್ಮ ಭವಿಷ್ಯದ ಬಗ್ಗೆ ಆತಂಕದಲ್ಲಿದ್ದಾರೆ. ಇದೇ ಕಾರಣಕ್ಕೆ ಈಗ ‘ಮೂನ್ಲೈಟಿಂಗ್’ (Moonlighting) ಅಥವಾ ಒಂದೇ ಸಮಯದಲ್ಲಿ ಎರಡು-ಮೂರು ಕೆಲಸಗಳನ್ನು ಮಾಡುವುದು ಸಾಮಾನ್ಯವಾಗಿದೆ. ಕಚೇರಿ ಕೆಲಸದ ಜೊತೆಗೆ ಪಾಡ್ಕಾಸ್ಟ್ (Podcast) ಮಾಡುವುದು, ರೀಲ್ಸ್ (Reels) ಮಾಡುವುದು ಅಥವಾ ಫ್ರೀಲ್ಯಾನ್ಸ್ ಕೆಲಸ ಮಾಡುವುದು ಈಗ ಹೊಸ ಫ್ಯಾಷನ್ ಆಗಿದೆ. ವರದಿಯ ಪ್ರಕಾರ, ಜನರು ಈಗ ಒಂದೇ ವೃತ್ತಿಯನ್ನು ನಂಬಿ ಕೂರುವ ಬದಲು, ತಮ್ಮ ಕೌಶಲಗಳನ್ನು ವಿವಿಧ ಕ್ಷೇತ್ರಗಳಲ್ಲಿ ಹಂಚುತ್ತಿದ್ದಾರೆ.
ಉದ್ಯೋಗದಲ್ಲಿ ‘ಸಂದರ್ಭೋಚಿತ’ವಾಗಿ ಉಳಿಯುವ ಹಂಬಲ!
ಬೆಂಗಳೂರಿನ ವಿಪ್ರೋ ಕಂಪನಿಯಲ್ಲಿ ಕೆಲಸ ಮಾಡುವ ಟೆಕ್ಕಿಯೊಬ್ಬರು ಹೇಳುವಂತೆ, “ಇವತ್ತಿನ ಮಾರ್ಕೆಟ್ನಲ್ಲಿ ನಾವು ಬೇಡಿಕೆಯಲ್ಲಿರಬೇಕು ಎಂದರೆ ಹೊಸ ಹೊಸ ವಿಷಯಗಳನ್ನು ಕಲಿಯುತ್ತಲೇ ಇರಬೇಕು” ಎಂದು ಹೇಳಿದ್ದಾರೆ. ಒಂದೇ ಕೆಲಸದ ಮೇಲೆ ಅವಲಂಬಿತರಾಗುವುದು ಈಗಿನ ಕಾಲದಲ್ಲಿ ರಿಸ್ಕ್ ಎಂಬ ಭಾವನೆ ಎಲ್ಲರಲ್ಲೂ ಮೂಡಿದೆ. ಮುಂಬೈ ಮೂಲದ ಡೇಟಾ ಅನಾಲಿಸ್ಟ್ ರೀಟಾ ಈ ಬಗ್ಗೆ ಮಾತನಾಡುತ್ತಾ, “ನಾನು ಈಗ ಇದನ್ನು ಬರೀ ಎರಡನೇ ಕೆಲಸ ಎಂದು ನೋಡುವುದಿಲ್ಲ, ಬದಲಿಗೆ ವೃತ್ತಿ ವೈವಿಧ್ಯತೆ ಎಂದು ಭಾವಿಸುತ್ತೇನೆ. ಈ ಆರ್ಥಿಕತೆಯಲ್ಲಿ ಒಂದೇ ಕೆಲಸ ನೆಚ್ಚಿಕೊಳ್ಳುವುದು ಅಪಾಯಕಾರಿ” ಎನ್ನುತ್ತಾರೆ. ಅವರು ಕಚೇರಿ ಕೆಲಸದ ನಂತರ ಕನ್ಸಲ್ಟಿಂಗ್ ಕೆಲಸಗಳನ್ನು ಮಾಡುತ್ತಾರೆ.
ಕೇವಲ ಹಣಕ್ಕಾಗಿ ಅಲ್ಲ, ಕ್ರಿಯೇಟಿವ್ ತೃಪ್ತಿಗಾಗಿ!
ಗುರ್ಗಾಂವ್ನ ಸ್ಯಾಮ್ಸಂಗ್ ಕಂಪನಿಯಲ್ಲಿ ಕೆಲಸ ಮಾಡುವ ರೋಹಿತ್ ದಾಸ್ ಅವರು ಕೆಲಸ ಮುಗಿದ ನಂತರ ಪಾಡ್ಕಾಸ್ಟ್ ಮಾಡುತ್ತಾರೆ. “ಇದರಿಂದ ನನಗೆ ಈಗಲೇ ದೊಡ್ಡ ಹಣ ಸಿಗುತ್ತಿಲ್ಲ, ಆದರೆ ಆಫೀಸ್ ಕೆಲಸದಲ್ಲಿ ಸಿಗದ ಕ್ರಿಯೇಟಿವ್ ತೃಪ್ತಿ ಈ ಕೆಲಸದಲ್ಲಿ ಸಿಗುತ್ತಿದೆ” ಎನ್ನುತ್ತಾರೆ ಅವರು. ಹೈದರಾಬಾದ್ನ ಸಾಫ್ಟ್ವೇರ್ ಇಂಜಿನಿಯರ್ ಧೀರಜ್ ಬಕ್ಷಿ ಹೇಳುವಂತೆ, ಅವರ ಇಡೀ ಟೀಮ್ನಲ್ಲಿ ಬಹುತೇಕ ಎಲ್ಲರೂ ಒಂದಲ್ಲ ಒಂದು ಸೈಡ್ ಬಿಸಿನೆಸ್ ಅಥವಾ ಕಂಟೆಂಟ್ ಕ್ರಿಯೇಷನ್ನಲ್ಲಿ ತೊಡಗಿಸಿಕೊಂಡಿದ್ದಾರೆ. ಇದು ಈಗಿನ ಕಾರ್ಪೊರೇಟ್ ಜಗತ್ತಿನಲ್ಲಿ ಒಂದು ಅಲಿಖಿತ ನಿಯಮದಂತೆ ಬೆಳೆಯುತ್ತಿದೆ.
ಕಂಪನಿಗಳ ನಿಲುವು ಮತ್ತು ಭವಿಷ್ಯದ ಭದ್ರತೆ!
ಮೊದಲೆಲ್ಲಾ ಎರಡು ಕೆಲಸ ಮಾಡುವುದು ದೊಡ್ಡ ತಪ್ಪು ಎಂದು ಭಾವಿಸಲಾಗುತ್ತಿತ್ತು. ಆದರೆ ಈಗ ಕಂಪನಿಗಳ ಎಚ್ಆರ್ ವಿಭಾಗ ಕೂಡ ಈ ಬಗ್ಗೆ ಮೃದು ಧೋರಣೆ ತಳೆದಿದೆ. ಸಿಐಇಎಲ್ ಎಚ್ಆರ್ ಸಂಸ್ಥೆಯ ಎಂಡಿ ಆದಿತ್ಯ ನಾರಾಯಣ ಮಿಶ್ರಾ ಅವರ ಪ್ರಕಾರ, “ಮೂನ್ಲೈಟಿಂಗ್ ಈಗ ನಂಬಿಕೆ ದ್ರೋಹದ ಕೆಲಸವಲ್ಲ, ಬದಲಿಗೆ ಇದು ನೌಕರರು ತಮ್ಮ ಕೌಶಲ ಹೆಚ್ಚಿಸಿಕೊಳ್ಳುವ ದಾರಿಯಾಗಿದೆ” ಎಂದು ಹೇಳಿದ್ದಾರೆ.
ದೆಹಲಿಯ ಪತ್ರಕರ್ತೆ ದೀಪಿಕಾ ಹೇಳುವಂತೆ, ರೀಲ್ಸ್ ಮಾಡುವುದು ಅವರಿಗೆ ಕೇವಲ ಹವ್ಯಾಸವಲ್ಲ, ಅದು ಅವರ ಭವಿಷ್ಯಕ್ಕಾಗಿ ಕಟ್ಟಿಕೊಳ್ಳುತ್ತಿರುವ ಒಂದು ಬ್ರ್ಯಾಂಡ್. ಕೆಲಸ ಹೋದರೂ ಜೀವನ ನಡೆಸಲು ಇವು ಆಸರೆಯಾಗುತ್ತದೆ ಎಂಬುದು ಅವರ ನಂಬಿಕೆ. ಒಂದೇ ಕೆಲಸದಲ್ಲಿ ಜೀವನ ಕಳೆಯುವ ಕಾಲ ಮುಗಿದುಹೋಗಿದೆ. ಜನರು ಈಗ ಆರ್ಥಿಕ ಭದ್ರತೆ ಮತ್ತು ವೈಯಕ್ತಿಕ ಬೆಳವಣಿಗೆಗಾಗಿ ಹತ್ತಾರು ದಾರಿಗಳನ್ನು ಹುಡುಕುತ್ತಿದ್ದಾರೆ. ಎಐ ತಂತ್ರಜ್ಞಾನದ ಹಾವಳಿಯ ನಡುವೆ, ಇಂತಹ ಪರ್ಯಾಯ ವೃತ್ತಿಗಳು ಜನರಿಗೆ ಹೊಸ ಭರವಸೆ ನೀಡುತ್ತಿವೆ. ಕಂಪನಿಯ ಕೆಲಸ ‘ಪ್ರೈಮರಿ ಟ್ಯಾಬ್’ ಆಗಿದ್ದರೆ, ಸೈಡ್ ಹಸ್ಟಲ್ ಎನ್ನುವುದು ‘ಸೆಕೆಂಡ್ ಟ್ಯಾಬ್’ ಆಗಿ ಮಾರ್ಪಟ್ಟಿದೆ. ಬದಲಾಗುತ್ತಿರುವ ಈ ಕೆಲಸದ ಸಂಸ್ಕೃತಿಯನ್ನು ನಾವೆಲ್ಲರೂ ಒಪ್ಪಿಕೊಳ್ಳಲೇಬೇಕಿದೆ.
