MBBS: ಮಾರ್ಕ್ಸ್ ಕೂಡಾ ಮ್ಯಾಚಿಂಗ್! MBBS ಪರೀಕ್ಷೆಯಲ್ಲಿ ಒಂದೇ ರೀತಿಯ ಅಂಕ ಗಳಿಸಿದ ಟ್ವಿನ್ ಸಿಸ್ಟರ್ಸ್

ಇದೆಲ್ಲಾ ಮನಸ್ಸನ್ನು ವಿಚಲಿತಗೊಳಿಸುವ ಅಂತರ್ಜಾಲ ಸಾಧನಗಳಿಂದ ತಮ್ಮನ್ನು ದೂರವಿರಿಸಿಕೊಂಡ ಅವಳಿ ಸಹೋದರಿಯರು ಮಹತ್ವದ ಸಾಧನೆ ಮಾಡಿ ತೋರಿಸಿದ್ದಾರೆ.

24 ವರ್ಷ ವಯಸ್ಸಿನ ಅವಳಿ ಸಹೋದರಿಯರಾದ ರಹೀನ್ ಮತ್ತು ರಿಬಾ ಹಫಿಜ್ಜಿ ಅವರು ತಮ್ಮ ಬಾಲ್ಯದಲ್ಲಿ ವೈದ್ಯರಾಗಬೇಕೆಂದು ನಿರ್ಧರಿಸಿದ್ದಾಗ ಅವರಿಬ್ಬರು ಮೊಬೈಲ್ ಫೋನಿನ ಗೀಳಿನಿಂದ ತಮ್ಮನ್ನು ತಾವು ದೂರವೇ ಇರಿಸಿಕೊಂಡಿದ್ದರು.

ನೀವು ಇನ್‌ಸ್ಟಾಗ್ರಾಮ್ ಅಥವಾ ಫೇಸ್‌ಬುಕ್ ಅನ್ನು ಏಕೆ ಎಂದಿಗೂ ಬಳಸಲಿಲ್ಲ ಎಂದು ಕೇಳಿದಾಗ, ರಿಬಾ “ನಾನು ನನ್ನ ಸಮಯವನ್ನು ನಿಷ್ಪ್ರಯೋಜಕ ವಿಷಯಗಳಿಗೆ ವ್ಯರ್ಥ ಮಾಡಲು ಬಯಸಲಿಲ್ಲ.

ಅಂತಹ ವೇದಿಕೆಗಳಿಂದ ಸಾಕಷ್ಟು ಸಮಯ ಹಾಳಾಗುತ್ತದೆ ಮತ್ತು ಅವುಗಳಿಂದ ಅಧ್ಯಯನದ ಮೇಲೆ ಸರಿಯಾಗಿ ಗಮನ ಹರಿಸಲು ಸಹ ಸಾಧ್ಯವಾಗುವುದಿಲ್ಲ,’ ಅಂತ ಹೇಳುತ್ತಾರೆ ಮತ್ತು ಈ ಮಾತಿಗೆ ರಹಿನ್ ಸಹ ಒಪ್ಪುತ್ತಾರೆ.

ಅವರು ಸಾಮಾಜಿಕ ಮಾಧ್ಯಮಗಳಲ್ಲಿ ಸಕ್ರಿಯವಾಗಿರದ ಕಾರಣ ಅವರ ಜೀವನ ತುಂಬಾನೇ ನೀರಸವಾಗಿದೆ ಅಂತ ಅವರು ಭಾವಿಸುತ್ತಾರೆಯೇ? ಅಂತ ಕೇಳಿದ್ದಕ್ಕೆ ರಹಿನ್ ಅವರು ನಗುತ್ತಾ ‘ಸಾಮಾಜಿಕ ಮಾಧ್ಯಮದಲ್ಲಿರುವವರು ಖಂಡಿತವಾಗಿಯೂ ಹಾಗೆಯೇ ಭಾವಿಸುತ್ತಾರೆ.

ಜೀವನವೆಂದರೆ ಸಾಮಾಜಿಕ ಮಾಧ್ಯಮಗಳಲ್ಲಿ ಸಕ್ರಿಯವಾಗಿರುವುದಷ್ಟೆ ಅಲ್ಲ, ಇನ್ನೂ ಅನೇಕ ರೀತಿಯ ಆರೋಗ್ಯಕರ ಹವ್ಯಾಸಗಳಿಂದಲೂ ಸಹ ಮನವನ್ನು ರಂಜಿಸಿಕೊಳ್ಳಬಹುದು,’ ಅಂತ ಹೇಳುತ್ತಾರೆ.

‘ಸಾಮಾಜಿಕ ಮಾಧ್ಯಮಗಳು ಅನೇಕ ರೀತಿಯ ಕ್ಷುಲ್ಲಕ ವಿಷಯಗಳಿಂದ ತುಂಬಿವೆ, ದಿನದ ಸುದ್ದಿಗಳನ್ನು ನಾವು ನ್ಯೂಸ್ ಪೋರ್ಟಲ್‌ಗಳಲ್ಲಿ ಓದಿ ತಿಳಿದುಕೊಳ್ಳುತ್ತೇವೆ,’ ಅಂತ ಈ ಅವಳಿ ಸಹೋದರಿಯರು ಹೇಳುತ್ತಾರೆ.

ಬರೀ ಓದುತ್ತಾ ಕುಳಿತುಕೊಳ್ಳುವುದು ಬೇಸರ ಅಂತ ಅನ್ನಿಸುವುದಿಲ್ಲವೇ ಅಂತ ಕೇಳಿದ ಪ್ರಶ್ನೆಗೆ ರಹಿನ್ ನಗುತ್ತಾ, ‘ಯಾರಾದರೂ ಅದನ್ನು ಎತ್ತಿ ತೋರಿಸಿದಾಗ ಮತ್ತು ಅದರ ಬಗ್ಗೆ ಯೋಚಿಸಿದಾಗ ಮಾತ್ರವೆ ನಮ್ಮ ಜೀವನ ನೀರಸವಾಗಿದೆ ಅಂತ ನಮಗೆ ಅನ್ನಿಸುತ್ತದೆ.

ನಾವು ಅಧ್ಯಯನದಲ್ಲಿ ತುಂಬಾನೇ ಮಗ್ನರಾಗಿದ್ದೇವೆ ಮತ್ತು ಪ್ರಸ್ತುತ, ಅದು ನಮಗೆ ತುಂಬಾನೇ ಸಂತೋಷ ನೀಡುತ್ತಿದೆ,’ ಅಂತ ಹೇಳುತ್ತಾರೆ. ಈ ಅವಳಿ ಸಹೋದರಿಯರು ವೈದ್ಯಕೀಯ ಕಾಲೇಜಿನ ಮೆಟ್ಟಿಲು ಹತ್ತಿದಾಗ ಎರಡನೇ ವರ್ಷದವರೆಗೆ ತಮ್ಮ ನಡುವೆ ಒಂದು ಫೋನ್ ಅನ್ನು ಇರಿಸಿಕೊಂಡಿದ್ದರಂತೆ.

‘ನಾವು ನಮ್ಮ ದಿನದ ಹೆಚ್ಚಿನ ಸಮಯವನ್ನು ಒಟ್ಟಿಗೆ ಕಳೆಯುತ್ತೇವೆ’ ಎಂದು ರಹಿನ್ ಹೇಳುತ್ತಾರೆ, ‘ಆದ್ದರಿಂದ, ನಾವು ಎಂದಿಗೂ ಎರಡು ಫೋನ್‌ಗಳನ್ನು ಹೊಂದುವ ಹಂಬಲವಾಗಲಿ ಅಥವಾ ಬಯಕೆಯಾಗಲಿ ಅನುಭವಿಸಲಿಲ್ಲ, ಎರಡು ಫೋನಿನ ಖರ್ಚು ನಮಗ್ಯಾಕೆ’ ಅಂತ ಹೇಳಿದರು.

‘ನಮಗೆ ಸರ್ಕಾರಿ ಅನುದಾನಿತ ಸೀಟುಗಳು ಸಿಕ್ಕರೆ ಮಾತ್ರವೇ, ನಾವು ನಮ್ಮ ವೈದ್ಯಕೀಯ ಅಧ್ಯಯನವನ್ನು ಮುಂದುವರಿಸುತ್ತೇವೆ. ನಮ್ಮ ತಾಯಿ ವೈದ್ಯಕೀಯ ಶಿಕ್ಷಣಕ್ಕೆ ಅಗತ್ಯವಾದ ಭಾರಿ ಶುಲ್ಕವನ್ನು ಪಾವತಿಸಲು ಸಾಧ್ಯವಾಗುವುದಿಲ್ಲ ಮತ್ತು ನಾವು ಉತ್ತಮ ಅಂಕಗಳನ್ನು ಗಳಿಸಿದರೆ ಮಾತ್ರ ಸರ್ಕಾರಿ ಕೋಟಾದ ಮೂಲಕ ಪ್ರವೇಶ ಪಡೆಯಬಹುದು ಎಂದು ನಮಗೆ ತಿಳಿದಿತ್ತು, ಹಾಗಾಗಿ ಮೊದಲಿನಿಂದಲೂ ಚೆನ್ನಾಗಿ ಓದಿದೆವು,’ ಅಂತ ಹೇಳುತ್ತಾರೆ ಈ ಸಹೋದರಿಯರು.