ಕೃತಕ ಬುದ್ಧಿಮತ್ತೆ ಇದೇ, ನಮಗ್ಯಾಕೆ ಭಾಷಾ ಸ್ಕಿಲ್, ಎಲ್ಲವನ್ನೂ ಅದೇ ನೋಡಿಕೊಳ್ಳುತ್ತದೆ ಅನ್ನೋದು ತಪ್ಪು. ಅದರಲ್ಲೂ ವಿಶೇಷವಾಗಿ ಇಂಗ್ಲಿಷ್ ಪ್ರಾವೀಣ್ಯತೆಯ ಮಹತ್ವವು ಕೃತಕ ಬುದ್ಧಿಮತ್ತೆ ಹೆಚ್ಚಾಗುತ್ತಿರುವ ನಡುವೆಯೂ, ಅದಕ್ಕಿರುವ ಡಿಮ್ಯಾಂಡ್ ಇನ್ನೂ ಕಡಿಮೆಯಾಗಿಲ್ಲ.
ಹೌದು, ಇದನ್ನು ನಾವು ಮಾತ್ರವಲ್ಲ, ವರದಿಗಳು ಕೂಡ ಇದನ್ನೇ ಹೇಳ್ತಿವೆ. AI ಇದ್ದರೂ ಸಾಲದು, ಉದ್ಯೋಗ ಪಡೆಯಲು ಇಂಗ್ಲಿಷ್ ಕೌಶಲ್ಯ ಮುಖ್ಯ .ನೇಮಕಾತಿ ಪ್ರಕ್ರಿಯೆಯಲ್ಲಿ ಅಭ್ಯರ್ಥಿಗಳ ಇಂಗ್ಲಿಷ್ ಕೌಶಲ್ಯವನ್ನು ಸರಿಯಾಗಿ ಮೌಲ್ಯಮಾಪನ ಮಾಡಿದರೆ ಸಂಸ್ಥೆಗಳ ಕೆಲಸದ ದಕ್ಷತೆ ಹೆಚ್ಚುತ್ತದೆ ಎಂದು ಭಾರತದಲ್ಲಿನ ಶೇ.98 ರಷ್ಟು ಉದ್ಯೋಗದಾತರು ನಂಬಿದ್ದಾರೆ ಎಂದು ಇತ್ತೀಚಿನ ಸಮೀಕ್ಷಾ ವರದಿ ತಿಳಿಸಿದೆ.
ಜಾಗತಿಕ ಪರೀಕ್ಷಾ ಸಂಸ್ಥೆ ETS ಬಿಡುಗಡೆ ಮಾಡಿದ ಈ ವರದಿ, ಜಾಗತಿಕ ಸಹಯೋಗ ಮತ್ತು ತಂತ್ರಜ್ಞಾನ ಬಳಕೆ ಹೆಚ್ಚಾಗುತ್ತಿರುವ ಸಂದರ್ಭದಲ್ಲಿ ಇಂಗ್ಲಿಷ್ ಕೌಶಲ್ಯವು ಉದ್ಯೋಗ ಕ್ಷೇತ್ರದಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿರುವುದನ್ನು ಉಲ್ಲೇಖಿಸಿದೆ.
ವರದಿ ಪ್ರಕಾರ, ಭಾರತದಲ್ಲಿ ಶೇ.98 ರಷ್ಟು ಮಾನವ ಸಂಪನ್ಮೂಲ (HR) ನಾಯಕರು ನೇಮಕಾತಿ ಪ್ರಕ್ರಿಯೆಯಲ್ಲಿ ಉತ್ತಮ ಇಂಗ್ಲಿಷ್ ಮೌಲ್ಯಮಾಪನಗಳನ್ನು ಬಳಸಿದರೆ ಸಂಸ್ಥೆಗಳು ಹೆಚ್ಚು ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತವೆ. ಕಳಪೆ ಇಂಗ್ಲಿಷ್ ಪ್ರಾವೀಣ್ಯತೆಯನ್ನು AI ಸರಿದೂಗಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದಾರೆ.
TOEFL ಮತ್ತು GRE ಮುಂತಾದ ಪರೀಕ್ಷೆಗಳನ್ನು ನಡೆಸುವ ಪ್ರಿನ್ಸ್ಟನ್ ಮೂಲದ ETS, ಭಾರತದಲ್ಲಿ 87 ಹೆಚ್ಆರ್ಗಳ ಅಭಿಪ್ರಾಯವನ್ನು ಆನ್ಲೈನ್ ಸಮೀಕ್ಷೆಯ ಆಧಾರದ ಮೇಲೆ ವರದಿ ಮಾಡಿದೆ.
ಈ ಸಂಶೋಧನೆ 17 ದೇಶಗಳ 1,325 HR ನಿರ್ಧಾರಗಾರರನ್ನು ಒಳಗೊಂಡ ವಿಶಾಲ ಸಮೀಕ್ಷೆಯ ಭಾಗವಾಗಿದೆ. ಬ್ರೆಜಿಲ್, ಚೀನಾ, ಫ್ರಾನ್ಸ್, ಜರ್ಮನಿ, ಇಂಡೋನೇಷ್ಯಾ, ಭಾರತ, ಜಪಾನ್, ಮೆಕ್ಸಿಕೊ, ಮೊರಾಕೊ, ಸೌದಿ ಅರೇಬಿಯಾ, ದಕ್ಷಿಣ ಕೊರಿಯಾ, ಸ್ಪೇನ್, ತೈವಾನ್, ಥೈಲ್ಯಾಂಡ್, ಟರ್ಕಿ, ಯುಎಇ ಮತ್ತು ವಿಯೆಟ್ನಾಂ ಸೇರಿದಂತೆ ಅನೇಕ ದೇಶಗಳ ಉದ್ಯೋಗದಾತರ ಅಭಿಪ್ರಾಯಗಳನ್ನು ಇದರಲ್ಲಿ ಅಧ್ಯಯನ ಮಾಡಲಾಗಿದೆ.
ವರದಿ ಪ್ರಕಾರ, ಭಾರತದಲ್ಲಿ ಶೇ.97 ರಷ್ಟು ಉದ್ಯೋಗದಾತರು ಐದು ವರ್ಷಗಳ ಹಿಂದೆ ಇದ್ದಕ್ಕಿಂತ ಈಗ ಇಂಗ್ಲಿಷ್ ಪ್ರಾವೀಣ್ಯತೆಯ ಮಹತ್ವ ಹೆಚ್ಚಾಗಿದೆ ಎಂದಿದ್ದಾರೆ. ಜಾಗತಿಕ ಸಹಯೋಗದ ಪ್ರಮಾಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇಂಗ್ಲಿಷ್ ತಿಳುವಳಿಕೆಯ ಅಗತ್ಯವೂ ಹೆಚ್ಚುತ್ತಿದೆ ಎಂದು ಶೇ.94ರಷ್ಟು ಹೆಚ್ಆರ್ಗಳು ಅಭಿಪ್ರಾಯಪಟ್ಟಿದ್ದಾರೆ.
ಇದರ ಜೊತೆಗೆ, ಶೇ.84 ರಷ್ಟು ಹೆಚ್ಆರ್ ನಾಯಕರು ಇಂಗ್ಲಿಷ್ ಕೌಶಲ್ಯದ ಕೊರತೆಯು ಸಂಸ್ಥೆಗಳಿಗೆ ಸ್ಪರ್ಧಾತ್ಮಕ ಅನಾನುಕೂಲತೆಯನ್ನು ಉಂಟುಮಾಡುತ್ತದೆ ಎಂದು ಹೇಳಿದ್ದಾರೆ. ಮತ್ತೊಂದೆಡೆ, ಶೇ.87 ರಷ್ಟು ಹೆಚ್ಆರ್ಗಳು AI ಏಕೀಕರಣ ಹೆಚ್ಚಾಗುತ್ತಿರುವುದರಿಂದ ಇಂಗ್ಲಿಷ್ ಪ್ರಾವೀಣ್ಯತೆಯ ಅಗತ್ಯ ಇನ್ನಷ್ಟು ಹೆಚ್ಚುತ್ತದೆ ಎಂದಿದ್ದಾರೆ.
ಭಾರತವು ಜಾಗತಿಕ ವ್ಯವಹಾರ ಮತ್ತು ತಂತ್ರಜ್ಞಾನ ಪರಿಸರ ವ್ಯವಸ್ಥೆಗಳಲ್ಲಿ ಪ್ರಮುಖ ಪ್ರತಿಭೆಯ ನೆಲೆಯಾಗಿ ಬೆಳೆಯುತ್ತಿದೆ. ಸಂಸ್ಥೆಗಳು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವಿಸ್ತರಿಸುತ್ತಿರುವುದರಿಂದ ಹಾಗೂ ಹೊಸ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುತ್ತಿರುವುದರಿಂದ, ಉದ್ಯೋಗಿಗಳ ಭಾಷಾ ಸಾಮರ್ಥ್ಯಕ್ಕೂ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತಿದೆ.
ಸಂಸ್ಥೆಗಳು ಜಾಗತಿಕ ಸಹಯೋಗ ಮತ್ತು ಬದಲಾಗುತ್ತಿರುವ ಕೆಲಸದ ಸ್ಥಳದ ಅಗತ್ಯಗಳಿಗೆ ಸಿದ್ಧವಾಗಿರುವ ತಂಡಗಳನ್ನು ನಿರ್ಮಿಸಲು ಇಂಗ್ಲಿಷ್ ಪ್ರಾವೀಣ್ಯತೆಯನ್ನು ಮೌಲ್ಯಮಾಪನ ಮಾಡಲು ಸ್ಪಷ್ಟವಾದ ವಿಧಾನಗಳನ್ನು ಹುಡುಕುತ್ತಿವೆ ಎಂದು ಅವರು ತಿಳಿಸಿದ್ದಾರೆ.
AI ಕೌಶಲ್ಯದ ಅಂತರವನ್ನು ಕಡಿಮೆ ಮಾಡುವುದಿಲ್ಲ. ಅದನ್ನು ಕಡಿಮೆ ಮಾಡುವವರು ಜನರು. ಇಂಗ್ಲಿಷ್ ಈಗ ಕೇವಲ ಸಾಫ್ಟ್ ಸ್ಕಿಲ್ ಮಾತ್ರವಲ್ಲ, ಅದು ಪ್ರಮುಖ ಕಾರ್ಯಪಡೆಯ ಸಾಮರ್ಥ್ಯವಾಗಿದೆ. ಇದು ಜಾಗತಿಕ ಸಹಯೋಗ, AI ಬಳಕೆ ಮತ್ತು ವೇಗವಾಗಿ ಬದಲಾಗುತ್ತಿರುವ ಆರ್ಥಿಕತೆಯಲ್ಲಿ ಪ್ರತಿಭೆಯ ಸ್ಪರ್ಧಾತ್ಮಕತೆಯನ್ನು ನಿರ್ಧರಿಸುವ ಪ್ರಮುಖ ಅಂಶವಾಗಿದೆ ಎಂದು ತಜ್ಞರು ಹೇಳಿದ್ದಾರೆ.
