ಕೌಶಲ್ಯದ ಕೊರತೆ!
ಆದರೆ ಕುತೂಹಲಕರ ಅಂಶವೆಂದರೆ, ಶೇ. 72 ರಷ್ಟು ಜನರು 2026ರಲ್ಲಿ ಹೊಸ ಉದ್ಯೋಗವನ್ನು ಹುಡುಕಲು ಉತ್ಸುಕರಾಗಿದ್ದಾರೆ. ಇದರಿಂದ ಬದಲಾವಣೆಯ ಆಸೆ ಇದ್ದರೂ, ಅದನ್ನು ಎದುರಿಸುವ ಧೈರ್ಯ ಕಡಿಮೆ ಎಂಬ ಚಿತ್ರಣ ಸಿಗುತ್ತದೆ.
AI ಕೆಲಸ ಸುಲಭಗೊಳಿಸಿದೆ… ಆದರೆ ನೇಮಕಾತಿ ಭಯ ಏಕೆ?
ಇಂದು ಕೆಲಸದ ಸ್ಥಳದಲ್ಲಿ ಕೃತಕ ಬುದ್ಧಿಮತ್ತೆ (AI) ಬಳಕೆ ಸಾಮಾನ್ಯವಾಗಿದೆ. ವರದಿಯಂತೆ, 87% ವೃತ್ತಿಪರರು ತಮ್ಮ ದೈನಂದಿನ ಕೆಲಸದಲ್ಲಿ AI ಬಳಸಲು ಆರಾಮದಾಯಕರು. ಆದರೆ, ಸಂದರ್ಶನ ಮತ್ತು ನೇಮಕಾತಿ ಪ್ರಕ್ರಿಯೆಗೆ ಬಂದಾಗ ಆತ್ಮವಿಶ್ವಾಸ ಕುಸಿಯುತ್ತದೆ. 77% ಜನರಿಗೆ ನೇಮಕಾತಿ ಪ್ರಕ್ರಿಯೆ ತುಂಬಾ ದೀರ್ಘವಾಗಿದೆ ಎಂಬ ಭಾವನೆ ಇದೆ. 66% ಜನರು ನೇಮಕಾತಿಯಲ್ಲಿ ಮಾನವೀಯ ಸ್ಪರ್ಶ ಕಡಿಮೆಯಾಗಿದೆ ಎಂದು ಹೇಳುತ್ತಾರೆ.
48% ಅಭ್ಯರ್ಥಿಗಳು ತಮ್ಮ ಉದ್ಯೋಗ ಅರ್ಜಿ ಅಥವಾ ರೆಸ್ಯೂಮ್ ಹೇಗೆ ಮೌಲ್ಯಮಾಪನವಾಗುತ್ತದೆ ಎಂಬುದೇ ಗೊತ್ತಿಲ್ಲ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ಇದಕ್ಕಿಂತಲೂ ದೊಡ್ಡ ಸಮಸ್ಯೆ ಎಂದರೆ, ನೇಮಕಾತಿದಾರರಿಂದ ತಡವಾದ ಪ್ರತಿಕ್ರಿಯೆ ಅಥವಾ ಯಾವುದೇ ಉತ್ತರವೇ ಇಲ್ಲದಿರುವುದು. ಇದು ಉದ್ಯೋಗ ಹುಡುಕುವವರಲ್ಲಿ ಒತ್ತಡ ಮತ್ತು ನಿರಾಸೆಯನ್ನು ಮತ್ತಷ್ಟು ಹೆಚ್ಚಿಸುತ್ತಿದೆ.
ಒಂದು ಕೆಲಸಕ್ಕೆ ಸಾವಿರಾರು ಅರ್ಜಿಗಳು!
ಲಿಂಕ್ಡ್ಇನ್ ದತ್ತಾಂಶದ ಪ್ರಕಾರ, 2022ರಿಂದ ಭಾರತದಲ್ಲಿ ಉದ್ಯೋಗ ಅರ್ಜಿ ಸಲ್ಲಿಸುವವರ ಸಂಖ್ಯೆ ದ್ವಿಗುಣಗೊಂಡಿದೆ. ಇದರ ಪರಿಣಾಮವಾಗಿ, 76% ವೃತ್ತಿಪರರು ಕಳೆದ ವರ್ಷಕ್ಕಿಂತ ಈಗ ಉದ್ಯೋಗ ಹುಡುಕುವುದು ಹೆಚ್ಚು ಕಷ್ಟವಾಗಿದೆ‘ ಎಂದು ನಂಬುತ್ತಾರೆ. ಆಶ್ಚರ್ಯಕರ ಸಂಗತಿ ಎಂದರೆ, ಈ ಸಮಸ್ಯೆ ಅಭ್ಯರ್ಥಿಗಳಿಗೆ ಮಾತ್ರ ಸೀಮಿತವಲ್ಲ. 74% ನೇಮಕಾತಿದಾರರು ಸಹ ಸರಿಯಾದ ಅಭ್ಯರ್ಥಿಗಳನ್ನು ಹುಡುಕುವುದು ಈಗ ಹೆಚ್ಚು ಕಷ್ಟವಾಗಿದೆ ಎಂದು ಒಪ್ಪಿಕೊಂಡಿದ್ದಾರೆ. ಅಂದರೆ, ಸ್ಪರ್ಧೆ ಎರಡೂ ಕಡೆ ತೀವ್ರಗೊಂಡಿದ್ದು, ಉದ್ಯೋಗ ಮಾರುಕಟ್ಟೆ ಇನ್ನಷ್ಟು ಸಂಕೀರ್ಣವಾಗಿದೆ.
ಉದ್ಯೋಗ ಹುಡುಕಾಟದಲ್ಲಿ AI ಭಯವಲ್ಲ, ಬೆಂಬಲ!
AI ಬಗ್ಗೆ ಆತಂಕ ಇದ್ದರೂ, ಅದೇ ಸಮಯದಲ್ಲಿ ಅದು ದೊಡ್ಡ ಬೆಂಬಲವಾಗಿಯೂ ಪರಿಣಮಿಸುತ್ತಿದೆ. ಇಂದು AI ಕೇವಲ ರೆಸ್ಯೂಮ್ ಬರೆಯುವುದಕ್ಕಷ್ಟೇ ಸೀಮಿತವಲ್ಲ. ಸರಿಯಾದ ಉದ್ಯೋಗವನ್ನು ಹುಡುಕಲು, ಕೌಶಲ್ಯಗಳನ್ನು ಹೊಂದಿಸಲು ಮತ್ತು ಸಂದರ್ಶನಕ್ಕೆ ತಯಾರಿ ಮಾಡಲು AI ಪ್ರಮುಖ ಪಾತ್ರ ವಹಿಸುತ್ತಿದೆ. ವರದಿ ಪ್ರಕಾರ, 94% ಭಾರತೀಯ ವೃತ್ತಿಪರರು ತಮ್ಮ ಉದ್ಯೋಗ ಹುಡುಕಾಟದಲ್ಲಿ AI ಬಳಸಲು ಯೋಜಿಸಿದ್ದಾರೆ. ಜೊತೆಗೆ, 66% ಜನರು AI ಬಳಕೆಯಿಂದ ಸಂದರ್ಶನದ ವಿಶ್ವಾಸ ಹೆಚ್ಚುತ್ತದೆ ಎಂದು ಹೇಳಿದ್ದಾರೆ. ಹೀಗಾಗಿ, ಭಯ ಹುಟ್ಟಿಸಿದ್ದ AI ಈಗ ಉದ್ಯೋಗ ಹುಡುಕುವವರ ಕೈ ಹಿಡಿಯುತ್ತಿದೆ.
AI ಇನ್ನು ಮುಂದೆ ವೃತ್ತಿಜೀವನ ನಿರ್ಮಿಸುವ ಸಾಧನ!
ಈ ಬದಲಾವಣೆಗಳು ವೃತ್ತಿ ಮಾರ್ಗಗಳ ಮೇಲೂ ಸ್ಪಷ್ಟ ಪರಿಣಾಮ ಬೀರಿವೆ. ಜನರೇಷನ್ X ನ 32% ಜನರು ಹೊಸ ಪಾತ್ರ ಅಥವಾ ಹೊಸ ಕ್ಷೇತ್ರವನ್ನು ಪರಿಗಣಿಸುತ್ತಿದ್ದಾರೆ, ಜನರೇಷನ್ Z ನ 32% ಜನರು ತಮ್ಮ ಉದ್ಯಮದ ಹೊರಗೆ ಅವಕಾಶ ಹುಡುಕುತ್ತಿದ್ದಾರೆ. ಸ್ವಂತ ವ್ಯವಹಾರ ಆರಂಭಿಸುವ ಪ್ರವೃತ್ತಿಯೂ ಹೆಚ್ಚುತ್ತಿದೆ. ಸ್ಥಾಪಕ (Founder)’ ಎಂಬುದು ಲಿಂಕ್ಡ್ಇನ್ನಲ್ಲಿ ವೇಗವಾಗಿ ಬೆಳೆಯುತ್ತಿರುವ ಪ್ರೊಫೈಲ್ ಶೀರ್ಷಿಕೆಗಳಲ್ಲಿ ಒಂದಾಗಿದೆ. ಲಿಂಕ್ಡ್ಇನ್ ವೃತ್ತಿ ತಜ್ಞೆ ನೀರಜಿತಾ ಬ್ಯಾನರ್ಜಿ ಅವರ ಪ್ರಕಾರ, ‘AI ಇನ್ನು ಮುಂದೆ ಕೇವಲ ಸಾಧನವಲ್ಲ, ವೃತ್ತಿಜೀವನವನ್ನು ನಿರ್ಮಿಸುವ ಆಧಾರವಾಗಿದೆ. ಕೌಶಲ್ಯಗಳನ್ನು ಸರಿಯಾದ ಅವಕಾಶಗಳಾಗಿ ಪರಿವರ್ತಿಸಿಕೊಳ್ಳುವುದು ಈಗ ಅತ್ಯಗತ್ಯ ಎಂದಿದ್ದಾರೆ.
2026ರಲ್ಲಿ ಯಾವ ಉದ್ಯೋಗಗಳು ಸುರಕ್ಷಿತ?
ಲಿಂಕ್ಡ್ಇನ್ನ ‘ಭಾರತದ ಉದ್ಯೋಗಗಳು ಹೆಚ್ಚುತ್ತಿರುವ ವರದಿ’ ಪ್ರಕಾರ, ಪ್ರಾಂಪ್ಟ್ ಎಂಜಿನಿಯರ್, AI ಎಂಜಿನಿಯರ್ ಮತ್ತು ಸಾಫ್ಟ್ವೇರ್ ಎಂಜಿನಿಯರ್ಗಳಿಗೆ ಭವಿಷ್ಯದಲ್ಲಿ ಭಾರೀ ಬೇಡಿಕೆ ಇದೆ. ಜೊತೆಗೆ, ಮಾರಾಟ, ಸೈಬರ್ ಭದ್ರತೆ ಮತ್ತು ಸಲಹಾ ಕ್ಷೇತ್ರಗಳಲ್ಲಿ ಸಾಕಷ್ಟು ಅವಕಾಶಗಳು ಕಾಣಿಸಿಕೊಳ್ಳುತ್ತಿವೆ. ಆಶ್ಚರ್ಯಕರವಾಗಿ, ಪಶುವೈದ್ಯರು, ಸೌರ ಸಲಹೆಗಾರರು ಮತ್ತು ವರ್ತನೆಯ ಚಿಕಿತ್ಸಕರು ಎಂಬ ವಿಶಿಷ್ಟ ವೃತ್ತಿಗಳೂ ವೇಗವಾಗಿ ಬೆಳೆಯುತ್ತಿವೆ. ಭಾರತದ ಉದ್ಯೋಗ ಮಾರುಕಟ್ಟೆಯಲ್ಲಿ ಬದಲಾವಣೆ ಅನಿವಾರ್ಯ. ಭಯವನ್ನು ಬಿಟ್ಟು, ಕೌಶಲ್ಯ ಮತ್ತು AI ಯನ್ನು ಸರಿಯಾಗಿ ಬಳಸಿದರೆ, ಭವಿಷ್ಯ ಇನ್ನೂ ಅವಕಾಶಗಳಿಂದ ತುಂಬಿದೆ.
Bangalore [Bangalore],Bangalore,Karnataka
Jan 09, 2026 11:34 AM IST
