ಒಂದು ಕಡೆ ಶ್ರವಣದೋಷ, ಇನ್ನೊಂದು ಕಡೆ ಪುಟ್ಟ ಮಕ್ಕಳು: ಪಟ್ಟು ಬಿಡದೇ ಓದಿದ ಮಹಿಳೆ ಇಂದು IAS ಅಧಿಕಾರಿ!

ಇದೇ ರೀತಿ ಮಾಡಿ ಏಳನೇ ಬಾರಿ ಯುಪಿಎಸ್‌ಸಿ ಪಾಸ್‌ ಮಾಡಿ ಅಧಿಕಾರಿಯಾದವರು ಕೇರಳದ ನಿಸಾ ಉನ್ನಿರಾಜನ್. ಪ್ರಯತ್ನಗಳು ಫಲ ನೀಡುತ್ತವೆ, ಕನಸಿಗೆ ವಯಸ್ಸಿನ ಮಿತಿಯಿಲ್ಲ, ಕೆಲ ಆರೋಗ್ಯ ಸಮಸ್ಯೆ ಕೂಡ ಸಾಧನೆಗೆ ಅಡ್ಡ ಬರೋದಿಲ್ಲ ಎಂಬ ಎಲ್ಲಾ ವಿಷಯಗಳನ್ನು ಮೀರಿ ಇವರು ಸಾಧಿಸಿದ್ದಾರೆ.

ನಿರ್ಧಾರ ಏನೋ ಸರಿಯಾಗಿತ್ತು, ಆದರೆ ಸಾಧಿಸುವ ಹಾದಿ ಕಷ್ಟಗಳಿಂದ ತುಂಬಿತ್ತು. ಕುಟುಂಬ, ಗಂಡ, ಎರಡು ಹೆಣ್ಣು ಮಕ್ಕಳು, ಉದ್ಯೋಗ ಎಲ್ಲವನ್ನೂ ನಿಸಾ ನಿಭಾಯಿಸಬೇಕಿತ್ತು. ಬೆಳಿಗ್ಗೆ ಬೇಗ ಎದ್ದು ಅಡುಗೆ, ಮಕ್ಕಳು ಅಂತಾ ಬ್ಯುಸಿ ಇರುತ್ತಿದ್ದ ನಿಸಾ, ಎಲ್ಲಾ ತಯಾರಿ ಮಾಡಿ ಉದ್ಯೋಗಕ್ಕೆ ಹೋಗ್ತಿದ್ದರು. ಆಮೇಲೆ ರಾತ್ರಿ ತಮ್ಮ ಓದಿಗಾಗಿ ಸಮಯ ಮೀಸಲಿಟ್ಟಿದ್ದರು.

ಹಾಗೋ, ಹೀಗೋ ಎಲ್ಲವನ್ನೂ ನಿಭಾಯಿಸಿಕೊಂಡು ರಾತ್ರಿ ಯುಪಿಎಸ್‌ಸಿ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದರು. ಆದರೆ ಇದೆಲ್ಲದಕ್ಕಿಂತ ಈಕೆಗೆ ಕಠಿಣವಾಗಿದ್ದು ಇವರ ಆರೋಗ್ಯ ಸಮಸ್ಯೆ. ಹೌದು, ಶ್ರವಣದೋಷದಿಂದ ಹೋರಾಡುತ್ತಿದ್ದ ಇವರಿಗೆ ಇದು ಸವಾಲಾಗಿತ್ತು. ಆದರೆ ಇದನ್ನು ತಡೆಗೋಡೆಯನ್ನಾಗಿ ನೋಡದೇ, ಇದೇ ರೀತಿಯ ಸ್ಥಿತಿಯನ್ನು ಜಯಿಸಿದ ಮತ್ತೊಬ್ಬ ಅಧಿಕಾರಿ ಕೊಟ್ಟಾಯಂನ ಸಬ್-ಕಲೆಕ್ಟರ್ ರಂಜಿತ್ ಅವರಿಂದ ಅವರು ಸ್ಫೂರ್ತಿ ಪಡೆದರು.

ನಿಸಾ ಅವರ ಈ ಜರ್ನಿಯಲ್ಲಿ ಅವರ ಪತಿ ಅರುಣ್‌ ಮತ್ತು ಕುಟುಂಬ ಬೆಂಬಲ ನೀಡುತ್ತಲೇ ಬಂದಿದ್ದಾರೆ. ನಿಸಾ ಮಾಡಬೇಕಾದ ಮನೆ ಜವಾಬ್ದಾರಿಗಳನ್ನು ಅವರು ತೆಗೆದುಕೊಂಡು ಇವರಿಗೆ ಓದಲು ಹೆಚ್ಚಿನ ಸಮಯ ನೀಡಿದರು. ಪ್ರತಿ ಹಂತದಲ್ಲೂ ಅವರನ್ನು ಪ್ರೋತ್ಸಾಹಿಸಿದರು. “ನನ್ನ ಪತಿ ಮತ್ತು ಕುಟುಂಬ ಪ್ರತಿ ಹಂತದಲ್ಲೂ ನನಗೆ ಬೆಂಬಲ ನೀಡಿದರು. ಅವರು ಇಲ್ಲದಿದ್ದರೆ ಇದು ಸಾಧ್ಯವಾಗುತ್ತಿರಲಿಲ್ಲ” ಎಂದು ನಿಸಾ ಸಂದರ್ಶನವೊಂದರಲ್ಲಿ ಹೇಳಿದರು.

ನಿಸಾ ತಯಾರಿ ತಂತ್ರವು ಚುರುಕಾಗಿತ್ತು ಮತ್ತು ಕೇಂದ್ರೀಕೃತವಾಗಿತ್ತು. ಅವರು ವಿಶಾಲವಾದ UPSC ಪಠ್ಯಕ್ರಮವನ್ನು ಸಣ್ಣ, ನಿರ್ವಹಿಸಬಹುದಾದ ಭಾಗಗಳಾಗಿ ವಿಂಗಡಿಸಿದರು, ಸಣ್ಣ ಸಣ್ಣ ನೋಟ್‌ಗಳನ್ನು ಮಾಡಿಕೊಂಡು ಓದುತ್ತಿದ್ದರು. ಜೊತೆಗೆ ಪ್ರೇರಣೆಗಾಗಿ, ಅವರು ಇತರ UPSC ಟಾಪರ್‌ಗಳ ಯಶಸ್ಸಿನ ಕಥೆಗಳನ್ನು ಹೆಚ್ಚಾಗಿ ಓದುತ್ತಿದ್ದರು.

ನಿಸಾ ಒಂದೇ ಬಾರಿಗೆ ಈ ಪರೀಕ್ಷೆ ಪಾಸ್‌ ಮಾಡಲಿಲ್ಲ. ಸುಮಾರು ಆರು ಬಾರಿ ಪರೀಕ್ಷೆ ಬರೆದು ಏಳನೇ ಬಾರಿಗೆ ಉತ್ತೀರ್ಣರಾದರು. ಹೌದು‌, ನಿಸಾ ಅವರ ಈ ಹಾದಿಯು ದೀರ್ಘವಾಗಿತ್ತು ಮತ್ತು ಯಶಸ್ಸು ರಾತ್ರೋರಾತ್ರಿ ಬರಲಿಲ್ಲ. ಅದಕ್ಕೆ ಅವರ ಏಳು ಪ್ರಯತ್ನಗಳು ಬೇಕಾಯಿತು.