ಪದವೀಧರರಿಗೆ ಕೇಂದ್ರ ಸರ್ಕಾರದ ಆಫರ್, ರಾಷ್ಟ್ರೀಯ ರಕ್ಷಣಾ ವಿವಿಯಲ್ಲಿ 60 ಸಾವಿರ ಸಂಬಳದ ಕೆಲಸ ಖಾಲಿ ಇದೆ

ವಿಶ್ವವಿದ್ಯಾಲಯವು ಎರಡು ಬೇರೆ ಬೇರೆ ಅಧಿಸೂಚನೆಗಳ ಮೂಲಕ ಹುದ್ದೆಗಳನ್ನು ಪ್ರಕಟಿಸಿದೆ. EOI-41A-2025-HRB ಅಧಿಸೂಚನೆಯಲ್ಲಿ ಬೋಧಕ ಹುದ್ದೆಗಳಾದ ಸಹಾಯಕ ಪ್ರಾಧ್ಯಾಪಕ (Assistant Professor) ಮತ್ತು ತರಬೇತಿ ಕಮ ಸಂಶೋಧನಾ ಅಧಿಕಾರಿ (Teaching cum Research Officer) ಇವೆ. EOI-41B-2025-HRB ಅಧಿಸೂಚನೆಯಲ್ಲಿ ಬೋಧಕೇತರ ಹುದ್ದೆಗಳಾದ ಆಡಳಿತ ಸಹಾಯಕ, ಗ್ರಂಥಾಲಯ ಸಹಾಯಕ, ತಾಂತ್ರಿಕ ಸಹಾಯಕ, ಕ್ರೀಡಾ ತರಬೇತಿ ಅಧಿಕಾರಿ, ಉದ್ಯೋಗ ಸ್ಥಾಪನಾ ಅಧಿಕಾರಿ ಸೇರಿದಂತೆ ಹಲವು ಹುದ್ದೆಗಳಿವೆ.

ಸಹಾಯಕ ಪ್ರಾಧ್ಯಾಪಕ ಹುದ್ದೆಗಳು ಪೊಲೀಸ್ ಆಡಳಿತ, ಭದ್ರತಾ ಅಧ್ಯಯನ, ಅಪರಾಧಶಾಸ್ತ್ರ, ದೈಹಿಕ ಶಿಕ್ಷಣ, ಮಾಹಿತಿ ತಂತ್ರಜ್ಞಾನ ಮತ್ತು ಕಂಪ್ಯೂಟರ್ ವಿಜ್ಞಾನ, ಕ್ರಿಮಿನಲ್ ಲಾ, ಮಿಲಿಟರಿ ಲಾ, ಮಾರಿಟೈಮ್ ಲಾ, ಅಂತಾರಾಷ್ಟ್ರೀಯ ಕಾನೂನು, ಎಂಜಿನಿಯರಿಂಗ್ ತಂತ್ರಜ್ಞಾನ, ಫೊರೆನ್ಸಿಕ್ ಸೈನ್ಸ್, ಕ್ಲಿನಿಕಲ್ ಸೈಕಾಲಜಿ ವಿಭಾಗಗಳಲ್ಲಿವೆ.

ಬೋಧಕ ಹುದ್ದೆಗಳಿಗೆ ಸಂಬಂಧಿಸಿದ ವಿಷಯದಲ್ಲಿ ಕನಿಷ್ಠ ಶೇಕಡಾ 55 ಅಂಕಗಳೊಂದಿಗೆ ಸ್ನಾತಕೋತ್ತರ ಪದವಿ, ಜೊತೆಗೆ NET ಅಥವಾ SLET ಅಥವಾ SET ಅಥವಾ ಪಿಹೆಚ್‌ಡಿ ಅಗತ್ಯವಿದೆ. ಕ್ಲಿನಿಕಲ್ ಸೈಕಾಲಜಿ ಹುದ್ದೆಗೆ ಆರ್‌ಸಿಐ ಮಾನ್ಯತೆ ಪಡೆದ ಎಂಫಿಲ್ ಅಥವಾ ಪಿಹೆಚ್‌ಡಿ ಕಡ್ಡಾಯ. ಬೋಧಕೇತರ ಹುದ್ದೆಗಳಿಗೆ ಸಂಬಂಧಿಸಿದ ವಿಷಯದಲ್ಲಿ ಪದವಿ ಅಥವಾ ಸ್ನಾತಕೋತ್ತರ ಪದವಿ ಜೊತೆಗೆ ಎರಡರಿಂದ ಐದು ವರ್ಷಗಳ ಅನುಭವ ಅಗತ್ಯವಿದೆ. ಗ್ರಂಥಾಲಯ ಸಹಾಯಕ ಹುದ್ದೆಗೆ ಗ್ರಂಥಾಲಯ ವಿಜ್ಞಾನದಲ್ಲಿ ಪದವಿ, ತಾಂತ್ರಿಕ ಸಹಾಯಕ ಹುದ್ದೆಗೆ ಕಂಪ್ಯೂಟರ್ ಅಥವಾ ಐಟಿ ಪದವಿ ಜೊತೆಗೆ ಹಾರ್ಡ್‌ವೇರ್ ಮತ್ತು ಭದ್ರತಾ ವ್ಯವಸ್ಥೆಗಳ ಅನುಭವ ಬೇಕು.

• ಸಹಾಯಕ ಪ್ರಾಧ್ಯಾಪಕ (Assistant Professor) ಹುದ್ದೆಗಳಿಗೆ, ಅಂದರೆ ಪೊಲೀಸ್ ಅಡ್ಮಿನಿಸ್ಟ್ರೇಷನ್, ಸೆಕ್ಯೂರಿಟಿ ಸ್ಟಡೀಸ್, ಕ್ರಿಮಿನಲ್ ಲಾ, ಫೊರೆನ್ಸಿಕ್ ಸೈನ್ಸ್ ಮತ್ತು ಕ್ಲಿನಿಕಲ್ ಸೈಕಾಲಜಿ ವಿಭಾಗದ ಹುದ್ದೆಗಳಿಗೆ ಪೇ ಲೆವೆಲ್ 10 ಅನ್ನು ನಿಗದಿಪಡಿಸಲಾಗಿದೆ. 7ನೇ ವೇತನ ಆಯೋಗದ ಮ್ಯಾಟ್ರಿಕ್ಸ್ ಪ್ರಕಾರ ಪೇ ಲೆವೆಲ್ 10ರ ಆರಂಭಿಕ ಮೂಲ ವೇತನವು 56,100 ರೂಪಾಯಿಗಳು ಇರುತ್ತದೆ.
• ಟೀಚಿಂಗ್ ಕಮ್ ರಿಸರ್ಚ್ ಆಫೀಸರ್ (Teaching cum Research Officer) ಹುದ್ದೆಗೆ ಪೇ ಲೆವೆಲ್ 8 ಅನ್ನು ನಿಗದಿಪಡಿಸಲಾಗಿದೆ. ಈ ಹಂತದ ಆರಂಭಿಕ ಮೂಲ ವೇತನವು 47,600 ರೂಪಾಯಿಗಳು ಇರುತ್ತದೆ.

• ಅಡ್ಮಿನಿಸ್ಟ್ರೇಟಿವ್ ಆಫೀಸರ್, ಸ್ಪೋರ್ಟ್ಸ್ ಟ್ರೈನಿಂಗ್ ಆಫೀಸರ್ ಹಾಗೂ ಟ್ರೈನಿಂಗ್, ಇಂಟರ್ನ್ ಶಿಪ್ ಮತ್ತು ಪ್ಲೇಸ್ ಮೆಂಟ್ ಆಫೀಸರ್ ಹುದ್ದೆಗಳಿಗೆ ಪೇ ಲೆವೆಲ್ 6 ಅನ್ನು ನಿಗದಿಪಡಿಸಲಾಗಿದೆ. 7ನೇ ವೇತನ ಆಯೋಗದ ಪ್ರಕಾರ ಪೇ ಲೆವೆಲ್ 6ರ ಆರಂಭಿಕ ಮೂಲ ವೇತನವು 35,400 ರೂಪಾಯಿಗಳು ಇರುತ್ತದೆ.
• ಅಡ್ಮಿನಿಸ್ಟ್ರೇಟಿವ್ ಅಸಿಸ್ಟೆಂಟ್ ಕಮ್ ಕೋ ಆರ್ಡಿನೇಟರ್, ಲೈಬ್ರರಿ ಮತ್ತು ಇನ್ಫಾರ್ಮೇಷನ್ ಅಸಿಸ್ಟೆಂಟ್ ಹಾಗೂ ಟೆಕ್ನಿಕಲ್ ಅಸಿಸ್ಟೆಂಟ್ ಹುದ್ದೆಗಳಿಗೆ ಪೇ ಲೆವೆಲ್ 4 ಅನ್ನು ನಿಗದಿಪಡಿಸಲಾಗಿದೆ. ಈ ಹಂತದ ಆರಂಭಿಕ ಮೂಲ ವೇತನವು 25,500 ರೂಪಾಯಿಗಳು ಇರುತ್ತದೆ.

ಎಲ್ಲ ಹುದ್ದೆಗಳೂ ಮೊದಲು ಒಂದು ವರ್ಷದ ಒಪ್ಪಂದ ಆಧಾರದಲ್ಲಿ ನೇಮಕಗೊಳ್ಳುತ್ತವೆ. ಕಾರ್ಯಕ್ಷಮತೆ, ವಿಶ್ವವಿದ್ಯಾಲಯದ ಅಗತ್ಯ ಮತ್ತು ನಿಧಿ ಲಭ್ಯತೆಯ ಆಧಾರದ ಮೇಲೆ ಗರಿಷ್ಠ ಐದು ವರ್ಷಗಳವರೆಗೆ ವಿಸ್ತರಣೆ ಮಾಡಿಕೊಡಬಹುದು.

ಆಯ್ಕೆಯಾದ ಅಭ್ಯರ್ಥಿಗಳು ಲವಾಡ್, ಗಾಂಧೀನಗರ ಸೇರಿದಂತೆ ವಿಶ್ವವಿದ್ಯಾಲಯದ ಯಾವುದೇ ಕ್ಯಾಂಪಸ್‌ನಲ್ಲಿ ಕೆಲಸ ಮಾಡಬೇಕಾಗುತ್ತದೆ.

ಅಧಿಸೂಚನೆಯಲ್ಲಿ ನೀಡಿರುವ ಫಾರ್ಮ್ಯಾಟ್‌ನಲ್ಲಿ ಅರ್ಜಿ ಭರ್ತಿ ಮಾಡಿ, ಎಲ್ಲ ಅಗತ್ಯ ದಾಖಲೆಗಳ ನಕಲುಗಳನ್ನು ಜೊತೆಯಾಗಿ ಸೇರಿಸಿ, Deputy Registrar, Human Resources Branch, Rashtriya Raksha University, Lavad, Dahegam, Gandhinagar, Gujarat – 382305 ಈ ವಿಳಾಸಕ್ಕೆ ಪೋಸ್ಟ್ ಮೂಲಕ ಕಳುಹಿಸಬೇಕು. ಯಾವುದೇ ಅರ್ಜಿ ಶುಲ್ಕ ಇಲ್ಲ.

ಬೋಧಕೇತರ ಹುದ್ದೆಗಳಾದ ಅಡ್ಮಿನಿಸ್ಟ್ರೇಟಿವ್ ಅಸಿಸ್ಟೆಂಟ್, ಲೈಬ್ರರಿ ಅಸಿಸ್ಟೆಂಟ್, ಟೆಕ್ನಿಕಲ್ ಅಸಿಸ್ಟೆಂಟ್ ಮತ್ತು ಅಡ್ಮಿನಿಸ್ಟ್ರೇಟಿವ್ ಆಫೀಸರ್ ಹುದ್ದೆಗಳಿಗೆ ಹಾಗೂ ಎಲ್ಲಾ ಬೋಧಕ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ 01.12.2025. ಬೋಧಕೇತರ ವಿಭಾಗದ ಸ್ಪೋರ್ಟ್ಸ್ ಟ್ರೈನಿಂಗ್ ಆಫೀಸರ್ ಮತ್ತು ಪ್ಲೇಸ್ ಮೆಂಟ್ ಆಫೀಸರ್ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ 18.12.2025. ಈ ದಿನಾಂಕಗಳ ಸಂಜೆ 5:00 ಗಂಟೆಯ ಒಳಗೆ ಅರ್ಜಿ ತಲುಪಬೇಕು.

ಅರ್ಹ ಅಭ್ಯರ್ಥಿಗಳನ್ನು ಸಂದರ್ಶನಕ್ಕೆ ಕರೆಯಲಾಗುತ್ತದೆ. ಅರ್ಜಿಗಳು ಹೆಚ್ಚಾದಲ್ಲಿ ಶೈಕ್ಷಣಿಕ ಯೋಗ್ಯತೆ ಮತ್ತು ಅನುಭವದ ಆಧಾರದ ಮೇಲೆ ಶಾರ್ಟ್‌ಲಿಸ್ಟ್ ಮಾಡಲಾಗುತ್ತದೆ. ಸಂದರ್ಶನಕ್ಕೆ ಯಾವುದೇ ಪ್ರಯಾಣ ಭತ್ಯೆ ನೀಡಲಾಗುವುದಿಲ್ಲ.