ಎಷ್ಟೋ ಜನ ವಿದ್ಯಾರ್ಥಿಗಳು ತಮ್ಮ ಸ್ನೇಹಿತರು ಆಯ್ಕೆ ಮಾಡಿಕೊಳ್ಳುವ ವಿಷಯವನ್ನು ಹಿಂದೆ ಮುಂದೆ ಆಲೋಚಿಸದೆ ಆಯ್ಕೆ ಮಾಡಿಕೊಳ್ಳುತ್ತಾರೆ.
ಅದರಲ್ಲೂ ಎಂಜಿನಿಯರಿಂಗ್ನಲ್ಲಿ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ವಿಷಯವನ್ನು ಬರೀ ಹುಡುಗರು ಮಾತ್ರವೇ ಆಯ್ಕೆ ಮಾಡಿಕೊಳ್ಳುತ್ತಾರೆ, ಆ ವಿಭಾಗದಲ್ಲಿ ಹುಡುಗಿಯರು ತುಂಬಾನೇ ಕಡಿಮೆ ಇರುತ್ತಾರೆ.
ಆದರೆ ಹಿಂದೊಮ್ಮೆ ಇಂತಹ ಪುರುಷ ಪ್ರಧಾನವಾದ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ವಿಭಾಗದಲ್ಲಿ ಓದುವುದಕ್ಕೆ ಧೈರ್ಯ ತೋರಿಸಿದಂತಹ ತಮ್ಮ ಮಹಿಳಾ ಸಹಪಾಠಿಗಳನ್ನು ಹಾಡಿ ಹೊಗಳಿದ್ದಾರೆ ಇಸ್ರೋದ ಮಾಜಿ ಅಧ್ಯಕ್ಷ ಡಾ. ಶ್ರೀಧರ ಪಣಿಕ್ಕರ್ ಸೋಮನಾಥ್.
ಅನೇಕ ವರ್ಷಗಳ ಹಿಂದೆಯೇ ತಮ್ಮ ಮಹಿಳಾ ಸಹಪಾಠಿಗಳು ಮೆಕ್ಯಾನಿಕಲ್ ಎಂಜಿನಿಯರಿಂಗ್ ವಿಷಯವನ್ನು ಆಯ್ಕೆ ಮಾಡಿಕೊಂಡಿದ್ದಕ್ಕೆ ಅವರ ಧೈರ್ಯವನ್ನು ಮೆಚ್ಚಿಕೊಂಡು ಸಾಮಾಜಿಕ ಮಾಧ್ಯಮದಲ್ಲಿ ಸೋಮನಾಥ್ ಅವರು ಮೆಚ್ಚುಗೆಯನ್ನು ವ್ಯಕ್ತಪಡಿಸಿದ್ದಾರೆ. ಈ ಹೃತ್ಪೂರ್ವಕ ಮೆಚ್ಚುಗೆಯ ಪೋಸ್ಟ್ ಇದೀಗ ಸಾಮಾಜಿಕ ಮಾಧ್ಯಮದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.
ಸ್ಟೆಮ್ (STEM) ಕ್ಷೇತ್ರಗಳಲ್ಲಿ ಸಾಮಾನ್ಯವಾಗಿರದ ಸಮಯದಲ್ಲಿ ‘ಕೆಲವೇ ಕೆಲವು ಮಹಿಳೆಯರು ಗದ್ದಲದ, ಪುರುಷ ಪ್ರಾಬಲ್ಯದ ಜಾಗವನ್ನು ಪ್ರವೇಶಿಸಲು ಧೈರ್ಯ ಮಾಡಿದರು’ ಎಂದು ಮಾಜಿ ಇಸ್ರೋ ಮುಖ್ಯಸ್ಥರು ಗಮನಿಸಿದರು. ಇತ್ತೀಚಿನ ಎಕ್ಸ್ ಪೋಸ್ಟ್ನಲ್ಲಿ, ಡಾ. ಶ್ರೀಧರ ಪಣಿಕ್ಕರ್ ಸೋಮನಾಥ್ ಅವರು ಕೇರಳದ ಕೆವಿಎಂ ಕಾಲೇಜಿನ ತಮ್ಮ ಮಹಿಳಾ ಕಾಲೇಜು ಸಹೋದ್ಯೋಗಿಗಳೊಂದಿಗೆ ಕ್ಲಿಕ್ಕಿಸಿಕೊಂಡ ಸೆಲ್ಫಿಯನ್ನು ಇದೀಗ ಹಂಚಿಕೊಂಡಿದ್ದಾರೆ.
ಹಿಂದಿನ ಕಾಲೇಜು ದಿನಗಳ ನೆನಪುಗಳನ್ನು ಮೆಲುಕು ಹಾಕುತ್ತಾ, ಕೆಲವೇ ಮಹಿಳೆಯರು ಎಂಜಿನಿಯರಿಂಗ್ ಆಯ್ಕೆ ಮಾಡಿಕೊಂಡಿದ್ದ ಸಮಯದಲ್ಲಿ ಅವರು ಹೇಗೆ ಒಟ್ಟಿಗೆ ಅಧ್ಯಯನ ಮಾಡಿದರು ಎಂದು ಮಾಜಿ ಅಧಿಕಾರಿ ಬರೆದಿದ್ದಾರೆ.
ಅಧಿಕಾರಿಯು ತಮ್ಮ ಪೋಸ್ಟ್ನಲ್ಲಿ ‘ಹಲವು ವರ್ಷಗಳ ನಂತರ, ಟಿಕೆಎಂ ಎಂಜಿನಿಯರಿಂಗ್ ಕಾಲೇಜಿನ (1980–85) ನನ್ನ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಸಹಪಾಠಿಗಳೊಂದಿಗೆ ಒಂದು ಸರಳ ಸೆಲ್ಫಿ ಧೈರ್ಯದ ಪ್ರಬಲ ಜ್ಞಾಪನೆಯಾಯಿತು’ ಅಂತ ಬರೆದುಕೊಂಡಿದ್ದಾರೆ.
‘ಗದ್ದಲದ, ಪುರುಷ ಪ್ರಧಾನ ಜಾಗವನ್ನು ಪ್ರವೇಶಿಸಲು ಕೆಲವೇ ಮಹಿಳೆಯರು ಧೈರ್ಯ ಮಾಡಿದರು. ಅದರಲ್ಲೂ ಶುರಾಫತ್, ಜಯಶ್ರೀ ಮತ್ತು ಲೀಲಾ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಅನ್ನು ಆಯ್ಕೆ ಮಾಡಿಕೊಂಡು ಚೆನ್ನಾಗಿ ಓದಿದರು,’ ಅಂತ ಮಾಜಿ ಅಧ್ಯಕ್ಷರು ಬರೆದುಕೊಂಡಿದ್ದಾರೆ.
ಅಂಕಗಳು, ಶಿಕ್ಷಣ ಮತ್ತು ಸಂಸ್ಥೆಗಳಿಗೆ ತಮ್ಮನ್ನು ಸೀಮಿತಗೊಳಿಸಿಕೊಳ್ಳದೆ, ಮಹಿಳಾ ಸಹಪಾಠಿಗಳು ಬೇರೆ ಬೇರೆ ಕ್ಷೇತ್ರದಲ್ಲಿಯೂ ಸಹ ತಮ್ಮನ್ನು ತಾವು ತೊಡಗಿಸಿಕೊಂಡರು ಅಂತ ಡಾ. ಸೋಮನಾಥ್ ಅವರು ತಮ್ಮ ಸಹಪಾಠಿಗಳನ್ನು ಶ್ಲಾಘಿಸಿದರು.
ಇವರ ಪೋಸ್ಟ್ ಆನ್ಲೈನ್ನಲ್ಲಿ ತ್ವರಿತವಾಗಿಯೇ ಜನಪ್ರಿಯತೆಯನ್ನು ಗಳಿಸಿತು, ಸಾಮಾಜಿಕ ಮಾಧ್ಯಮ ಬಳಕೆದಾರರು ಸಹ ತಮ್ಮ ಜೀವನದಲ್ಲಿ ನಡೆದ ಇದೇ ರೀತಿಯ ಅನುಭವವನ್ನು ಹಂಚಿಕೊಂಡರು ಮತ್ತು ಮಹಿಳೆಯರು ತಮಗಾಗಿ ತೆಗೆದುಕೊಂಡ ಧೈರ್ಯಶಾಲಿ ನಿರ್ಧಾರಗಳಿಗಾಗಿ ತುಂಬಾನೇ ಶ್ಲಾಘಿಸಿದರು.
‘ವಾವ್! ಆ ಸಮಯದಲ್ಲಿ ಇಂತಹ ನಿರ್ಧಾರ ತೆಗೆದುಕೊಂಡದ್ದು ನಿಜಕ್ಕೂ ಧೈರ್ಯವೇ ಅಂತ ಹೇಳಬಹುದು. ಇವರನ್ನ ನೋಡಿ ತುಂಬಾ ಸಂತೋಷವಾಯಿತು ಸರ್’ ಅಂತ ಸಾಫ್ಟ್ವೇರ್ ಎಂಜಿನಿಯರ್ ರಾಜೇಶ್ ಪಟ್ನಾಯಕ್ ಅವರು ಶ್ಲಾಘಿಸಿದರು.
ಎರಡನೇ ಬಳಕೆದಾರರು ಕಾಮೆಂಟ್ ಮಾಡಿ ‘ಎಂಜಿನಿಯರಿಂಗ್ ಕೋರ್ಸ್ನಲ್ಲಿ ಕಂಪ್ಯೂಟರ್ಗಳನ್ನು ಪರಿಚಯಿಸುವುದರಿಂದ ಹಲವಾರು ಹುಡುಗಿಯರು ಬಿ.ಇ, ಬಿ.ಟೆಕ್. ಕೋರ್ಸ್ಗಳನ್ನು ಮುಂದುವರಿಸಲು ಪ್ರಾರಂಭಿಸಿದ್ದಾರೆ,’ ಅಂತ ಹೇಳಿದರು.
