ಈ ದೊಡ್ಡ ಕಂಪನಿಯ ಉದ್ಯೋಗಿಗಳ ಕೆಲಸ ಅತಂತ್ರ ಸ್ಥಿತಿಯಲ್ಲಿದೆ; ಒಂದೇ ಬಾರಿಗೆ 1,500 ಮಂದಿ ವಜಾ?

ವಾಲ್‌ಮಾರ್ಟ್ ಕಂಪನಿ ಸುಮಾರು 1,500 ಕಾರ್ಪೊರೇಟ್ ಉದ್ಯೋಗಗಳನ್ನು ಕಡಿತಗೊಳಿಸಲು ಯೋಜಿಸುತ್ತಿದೆ. ಇದರರ್ಥ ಈ ಕಂಪನಿಯು 1500 ಉದ್ಯೋಗಿಗಳು ಕೆಲಸ ಕಳೆದುಕೊಳ್ಳಬೇಕಾಗುತ್ತದೆ. ಈಗ ಸದ್ಯ ಅವರ ಕೆಲಸದ ಸ್ಥಿತಿ ಅತಂತ್ರ ಪರಿಸ್ಥಿತಿಯಲ್ಲಿದೆ.

ರಾಯಿಟರ್ಸ್ ವರದಿಯ ಪ್ರಕಾರ, ಕಾರ್ಯಾಚರಣೆಗಳನ್ನು ಸರಳ ಮತ್ತು ಹೆಚ್ಚು ಪರಿಣಾಮಕಾರಿಯಾಗಿ ಮಾಡುವುದು ಕಂಪನಿಯ ಉದ್ದೇಶವಾಗಿದೆ. ಕಂಪನಿಯ ಈ ನಿರ್ಧಾರವು ವಾಲ್‌ಮಾರ್ಟ್‌ನ ಜಾಗತಿಕ ತಂತ್ರಜ್ಞಾನ ವಿಭಾಗ, ಅಮೆರಿಕದ ಅಂಗಡಿಗಳಲ್ಲಿನ ಇ-ಕಾಮರ್ಸ್ ಕಾರ್ಯಾಚರಣೆಗಳು ಮತ್ತು ವಾಲ್‌ಮಾರ್ಟ್ ಕನೆಕ್ಟ್‌ನಲ್ಲಿ ಕೆಲಸ ಮಾಡುವ ಉದ್ಯೋಗಿಗಳಿಗೆ ದೊಡ್ಡ ಹೊಡೆತವಾಗಲಿದೆ.

ಬ್ಲೂಮ್‌ಬರ್ಗ್ ವರದಿಯ ಪ್ರಕಾರ, ಕಂಪನಿಯ ನಿರ್ಧಾರವು ಪ್ರಾಥಮಿಕವಾಗಿ ಬೆಂಟನ್‌ವಿಲ್ಲೆಯಲ್ಲಿರುವ ವಾಲ್‌ಮಾರ್ಟ್‌ನ ಪ್ರಧಾನ ಕಚೇರಿಯಲ್ಲಿ ಕೆಲಸ ಮಾಡುವ ಉದ್ಯೋಗಿಗಳ ಮೇಲೆ ಹಾಗೂ ಕಂಪನಿಯ ಜಾಗತಿಕ ತಂತ್ರಜ್ಞಾನ ತಂಡ ಸೇರಿದಂತೆ ಇತರ ಕಾರ್ಪೊರೇಟ್ ಕಚೇರಿಗಳಲ್ಲಿನ ಉದ್ಯೋಗಿಗಳ ಮೇಲೆ ಪರಿಣಾಮ ಬೀರುತ್ತದೆ.

ವಾಲ್ಮಾರ್ಟ್ ಅಮೆರಿಕದ ಅತಿದೊಡ್ಡ ಚಿಲ್ಲರೆ ಕಂಪನಿಯಾಗಿದ್ದು, ಅಮೆರಿಕದಲ್ಲಿ ಸುಮಾರು 1.6 ಮಿಲಿಯನ್ ಉದ್ಯೋಗಿಗಳನ್ನು ನೇಮಿಸಿಕೊಂಡಿದೆ. ವಾಲ್ಮಾರ್ಟ್ ತನ್ನ ವೆಬ್‌ಸೈಟ್‌ನಲ್ಲಿ ಲಭ್ಯವಿರುವ ಮಾಹಿತಿಯ ಪ್ರಕಾರ, ವಿಶ್ವಾದ್ಯಂತ ಸುಮಾರು 2.1 ಮಿಲಿಯನ್ ಜನರನ್ನು ನೇಮಿಸಿಕೊಂಡಿದೆ. ಇದು ಅಮೆರಿಕದ ಅತಿದೊಡ್ಡ ಆಮದುದಾರರಾಗಿದ್ದು, ವಾಲ್‌ಮಾರ್ಟ್‌ನ ಸುಮಾರು 60% ಆಮದು ಚೀನಾದಿಂದ ಬರುತ್ತಿದೆ, ಮುಖ್ಯವಾಗಿ ಬಟ್ಟೆ, ಎಲೆಕ್ಟ್ರಾನಿಕ್ಸ್ ಮತ್ತು ಆಟಿಕೆಗಳು ಸೇರಿದಂತೆ.

ವಾಲ್ಮಾರ್ಟ್ ಫೆಬ್ರವರಿಯಲ್ಲಿ ಕೆಲವು ಉದ್ಯೋಗಿಗಳನ್ನು ವಜಾಗೊಳಿಸಿತು ಮತ್ತು ಉತ್ತರ ಕೆರೊಲಿನಾದಲ್ಲಿ ತನ್ನ ಕಚೇರಿಯನ್ನು ಮುಚ್ಚಿತು. ಕ್ಯಾಲಿಫೋರ್ನಿಯಾ ಮತ್ತು ಅರ್ಕಾನ್ಸಾಸ್‌ನಲ್ಲಿರುವ ಪ್ರಮುಖ ಕೇಂದ್ರಗಳಿಗೆ ಉದ್ಯೋಗಿಗಳನ್ನು ಸ್ಥಳಾಂತರಿಸುವ ಉದ್ದೇಶದಿಂದ ಇದನ್ನು ಮಾಡಲಾಯಿತು. ಬ್ಲೂಮ್‌ಬರ್ಗ್ ವರದಿಯ ನಂತರ, ಈ ವಿಷಯದ ಬಗ್ಗೆ ಸಾಮಾಜಿಕ ಮಾಧ್ಯಮದಲ್ಲಿ ಚರ್ಚೆ ಆರಂಭವಾಗಿದೆ.

ಅಮೆರಿಕದ ಕೆಲಸಗಾರರ ಬದಲಿಗೆ H1B ವೀಸಾ ಹೊಂದಿರುವವರನ್ನು ನೇಮಿಸಿಕೊಳ್ಳಲಾಗುತ್ತಿದೆ ಎಂದು ಕೆಲವರು ಹೇಳುತ್ತಾರೆ. H1B ವೀಸಾ ಕಾರ್ಯಕ್ರಮವು ಅಮೆರಿಕ ಸಂಯುಕ್ತ ಸಂಸ್ಥಾನದಲ್ಲಿ, ವಿಶೇಷವಾಗಿ ಐಟಿ ನಂತಹ ಕ್ಷೇತ್ರಗಳಲ್ಲಿ ಕೌಶಲ್ಯಪೂರ್ಣ ವಿದೇಶಿ ಕಾರ್ಮಿಕರಿಗೆ ಉದ್ಯೋಗವನ್ನು ಒದಗಿಸುತ್ತದೆ. H1B ವೀಸಾ ಹೊಂದಿರುವವರಲ್ಲಿ ಭಾರತೀಯರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಅದಾಗ್ಯೂ, ಅದರ ದುರುಪಯೋಗದ ಬಗ್ಗೆ ಕಳವಳ ವ್ಯಕ್ತಪಡಿಸಲಾಗಿದೆ.